ཕྱི་ལོ་ ༢༠༡༨ ཟླ་ ༥ ཚེས་ ༣༠ རེས་གཟའ་ལྷག་པ།
༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༥ ཚེས་ ༢༩ བོད་ཚེས་ ༡༥ ས་ག་ཟླ་བའི་ཉིན་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་སུ་ཇཱ་བོད་ཁྱིམ་སློབ་གྲྭའི་ཁང་ཚན་ནང་ཁུལ་བོད་ཀྱི་ཐུན་མིན་རྐང་བྲོ་གླུ་གཞས་འགྲན་བསྡུར་སྐབས་སྐུ་མགྲོན་གཙོ་བོར་མགྲོན་འབོད་ལྟར་ཕེབས་འདུག
དེ་ཡང་གོང་ཚེས་ཉིན་སློབ་གྲྭའི་སློབ་སྤྱིས་རྐང་བྲོ་གླུ་གཞས་འགྲན་བསྡུར་དང་འབྲེལ་བའི་སྐོར་ངོ་སྤྲོད་གནང་གྲུབ་མཚམས་ཁང་ཚན་སོ་སོའི་སློབ་ཕྲུག་རྣམས་ནས་འཁྲབ་སྟོན་གནང་སྐབས་འཁྲབ་གཞས་དང་། མཉམ་གཞས། རྐྱང་གཞས་སོགས་གཟིགས་འབུལ་ཞུས།
སྐབས་དེར་སྐུ་མགྲོན་གཙོ་བོ་དཔལ་ལྡན་ཆོས་རིག་བཀའ་བློན་མཆོག་གིས། ཕྱི་ལོ་ ༢༠༡༨ ལོའི་ཁང་ཚན་ནང་ཁུལ་གཞས་སྣ་འགྲན་བསྡུར་རྩེར་སོན་པའི་ཁང་ཚན་ལ་བྱ་དགའ་གསོལ་རས་གནང་བ་དང་སྦྲགས་དགེ་སློབ་ཡོངས་ལ་གསུང་བཤད་གནང་དོན། ང་ཚོའི་ཐུན་མོང་མ་ཡིན་པའི་རིག་གཞུང་དེ་མི་ཐོག་གོང་མ་ཚོས་སྐུ་ལས་མང་པོ་རྒྱབ་ནས་མི་ཉམས་རྒྱུན་འཛིན་གནང་ཡོད་རེད། ད་ལྟ་ང་རང་ཚོར་སྐབས་སུ་བབ་པའི་ལས་འགན་གཙོ་བོ་དེ་བོད་ཀྱི་རིག་གཞུང་དེ་དག་མུ་མཐུད་མི་ཉམས་རྒྱུན་འཛིན་གནང་དགོས་རྒྱུ་དེ་ཤིན་ཏུ་གལ་གནད་ཆེན་པོ་ཡིན་པའི་སྐོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར་སོ་སོར་སྐབས་བབ་འགན་འཁྲི་དེ་དག་རྣམས་ཕྱི་ཚུལ་གྱི་རྣམ་པ་ཙམ་སྟོན་པ་མ་ཡིན་པར་ཡིད་སེམས་བརྟན་པོས་གྲུབ་ཐུབ་པ་བྱ་རྒྱུ་ཧ་ཅང་གལ་ཆེ་ཡིན་པ་དང་། ལྷག་པར་དུ་སློབ་ཕྲུག་ཞིག་ཡིན་པའི་ཆ་ནས་སློབ་སྦྱོང་ཡག་པོ་བྱ་རྒྱུ་དང་། ཀུན་སྤྱོད་བཟང་པོ་བྱ་རྒྱུ། ཕྱིན་ཆད་རང་ཉིད་ཤེས་བྱ་ཡོན་ཏན་གྱི་གནས་ལ་མཐར་སོན་པ་ཞིག་ཆགས་སྐབས་དུས་རྟགས་ཏུ་སྤྱི་སེམས་བརྟན་པོ་བཅང་དགོས་པ་སོགས་ཀྱི་སྐོར་གསུངས། 
