ཕྱི་ལོ་ ༢༠༡༨ ཟླ་ ༥ ཚེས་ ༢༣ རེས་གཟའ་ལྷག་པ།

༄༅། །བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་དང་དྲུང་ཆེ་ཀརྨ་སེངྒེ་ལགས་རྣམ་གཉིས་ཕྱི་ལོ་ ༢༠༡༨ ཟླ་ ༥ ཚེས་ ༢༡ ནས་བཟུང་བདུན་གཅིག་རིང་ཀ་རྡོར་སྒང་གསུམ་དང་། ར་ཝང་ལ་ཀུན་ཕན་གླིང་། བསུ་ན་མདའ་བཀྲ་ཤིས་གླིང་བཅས་སུ་རྟེན་གཞི་བྱས་པའི་བཙན་བྱོལ་བོད་མིའི་སློབ་གྲྭ་ཁག་གཅིག་ལ་གཞུང་འབྲེལ་འཚམས་གཟིགས་གནང་ཡོད། 

ཕྱི་ཚེས་ ༢༠ རེས་གཟའ་ལྷག་པ་ཉིན་ཀ་སྦུག་ས་གནས་སུ་ཕེབས་འབྱོར་སྐབས་ས་གནས་འགོ་འཛིན་གྱིས་གཙོས་ས་གནས་འཐུས་ཚོགས་ཀྱི་ཚོགས་གཙོ་དང་། སློབ་གྲྭའི་སློབ་སྤྱི་དང་ཚོགས་པ་ཁག་གི་འཐུས་ཚབ་བཅས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། 

ཕྱི་ཚེས་ ༢༡ ཉིན་ཀ་སྦུག་སློབ་གྲྭར་འཚམས་གཟིགས་ཕེབས་སྐབས་སློབ་གྲྭའི་སློབ་སྤྱིས་སྣེ་འཁྲིད་ཀྱིས་དགེ་རྒན་དང་ལས་བྱེད། སློབ་ཕྲུག་རྣམས་ཀྱིས་སྣེ་ལེན་ཞུས་ཡོད། 

 གོང་ཚེས་ཉིན་སློབ་གྲྭའི་སློབ་སྤྱིས་སློབ་གྲྭའི་ཤེས་ཡོན་དང་། རྩེད་མོ་རིགས་སོགས་སྔར་ལས་ཡར་རྒྱས་ཕྱིན་ཡོད་པའི་སྐོར་གསུང་བཤད་གནང་ཡོད་པ་མ་ཟད།  ཕ་རན་སིའི་རོགས་ཚོགས་ LTDM France  དང་ནེ་ཐར་ལན་ཌའི་སྒྲོལ་མ་ཐེབས་རྩ་ཁང་ Dolma Foundation  བཅས་ནས་སློབ་གྲྭའི་འཐུང་ཆུ་སོགས་ཀྱི་དཀའ་ངལ་སེལ་བར་ཐུགས་རྗེ་ཆེ་ཞུས་ཡོད། 

ཤེས་རིག་བཀའ་བློན་མཆོག་གིས་རང་ཉིད་ཀྱི་སློབ་སྦྱོང་གི་བརྒྱུད་རིམ་དང་། མཐར་ཤེས་རིག་བཀའ་བློན་དུ་བདམས་ཐོན་བྱུང་བའི་སྐོར། ཕྱོགས་མཚུངས་སློབ་ཕྲུག་རྣམ་པས་སློབ་སྦྱོང་བྱེད་སྐབས་འཆར་གཞི་དང་ལྡན་པའི་སྒོ་ནས་དེབ་ལྟ་ཀློག་གང་ཐུབ་བྱེད་དགོས་པའི་སྐོར་གསུང་ཡོད།

ཉིན་རྒྱབ་ཤེས་རིག་བཀའ་བློན་མཆོག་གིས་ས་གནས་བོད་མི་དང་།  སློབ་གྲྭའི་དགེ་རྒན། ཕ་མ་རྣམས་ལ་ཐུགས་འཕྲད་གནང་སྟེ་ཕྲུ་གུ་ཚོར་སློབ་སྦྱོང་ཡག་པོ་སྤྲོད་དགོས་པའི་སྐོར་གསུང་བཤད་གནང་ཡོད་པ་བཅས།།