༢༠༡༨ ཟླ་ ༥ ཚེས་ ༣༠ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་གསར་པ་སྐུ་ཞབས་ཀུ་མ་ར་སྭ་མི་ Shri HD Kumaraswamy མཆོག་ལ་མངའ་སྡེའི་སྤྱི་ཁྱབ་བློན་ཆེན་དུ་འདེམས་ཐོན་བྱུང་བར་དགའ་བསུའི་འཚམས་འདྲི་གནང་དོན།
ངས་བོད་མི་རྣམས་ཀྱི་ཚབ་ཞུས་ནས་སྐུ་ཉིད་མཆོག་ཀར་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་དུ་བསྐོ་གཞག་གནང་བར་སྙིང་ཐག་པ་ནས་དགའ་བསུའི་འཚམས་འདྲི་དང་འབྲེལ་སྐུ་ཉིད་མཆོག་གི་ལས་ཡུན་རིང་ལས་དོན་གང་ཅིར་བྱ་བ་ལམ་ལྷོངས་ཡོང་བ་དང་མི་མང་གི་མངོན་འདོད་དང་རེ་བ་ལྟར་ལས་དོན་རྣམས་འགེགས་བར་ཆད་མེད་པར་ཡིད་བཞིན་དུ་འགྲུབ་ཐུབ་པའི་སྨོན་འདུན་ཞུ་རྒྱུ་ཡིན། ཀར་ན་ཊ་ཀ་མངའ་སྡེར་མཚོན་ན་བོད་མི་བཙན་བྱོལ་བ་རྣམས་རྒྱ་གར་ས་ཐོག་ཏུ་ཐོག་མར་འབྱོར་མཚམས་མཐུན་འགྱུར་རོགས་རམ་གནང་མཁན་དང་པོའི་གྲས་ཡིན། དེ་ནས་རིམ་བཞིན་བོད་མི་བཙན་བྱོལ་བ་གྲངས་མང་ཤོས་གཏན་སྡོད་བྱེད་ཡུལ་གཞི་ཏུ་གྱུར་བ་མ་ཟད། འཇིགས་ཞུམ་སྤུ་ཙམ་མེད་པར་རང་དབང་གི་ཁོར་ཡུག་ལོངས་སུ་སྤྱད་ནས་བོད་མི་རྣམས་ཀྱིས་རང་གི་ཐུན་མིན་ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སླར་གསོའི་ལས་འགུལ་ཐོག་འབུང་བཞིན་ཡོད།
བོད་མི་བཙན་བྱོལ་བ་རྣམས་མངའ་སྡེ་འདིའི་ནང་གཞིས་ཆགས་པ་ནས་བཟུང་ད་བར་མངའ་སྡེའི་གཞུང་མང་གཉིས་ཀྱིས་མཐུན་འགྱུར་རོགས་རམ་ཟམ་མ་ཆད་པར་གནང་དང་གནང་མུས་ཡིན་སྟབས་བོད་མི་རྣམས་ཀྱིས་དུས་རྟག་ཏུ་བཀའ་དྲིན་བསམ་ཤེས་ཞུ་བཞིན་ཡོད། སྐུ་ཉིད་མཆོག་གི་དབུ་ཁྲིད་ལམ་སྟོན་འོག་བོད་མི་དང་ཀར་ན་ཊ་ཀ་མངའ་སྡེའི་གཞུང་མང་གཉིས་དབར་གྱི་མཛའ་བརྩེའི་འབྲེལ་ལམ་སྔར་ལས་དར་ཞིང་རྒྱས་པ་ཡོང་ཐུབ་རྒྱུར་ངས་རེ་བ་ཞུ་བཞིན་ཡོད། ཅེས་འཁོད།
ཕྱི་ཚེས་༢༣ ཉིན་སྐུ་ཞབསཀུ་མ་ར་སྭ་མི་ Shri HD Kumaraswamy མཆོག་མངའ་སྡེའི་སྤྱི་ཁྱབ་བློན་ཆེན་གསར་པའི་དམ་འབུལ་ཞུས་ཡོད་པ་བཅས།
