༢༠༡༨ ཟླ་ ༥ ཚེས་ ༢༣ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་བཞུགས་སྒར་དྷརྨ་ཤཱ་ལར་བོད་མི་གཞོན་སྐྱེས་ལྔ་དང་ལྔ་བཅུའི་ཚོགས་འདུ་༼ ལྔ་དང་ལྔ་བཅུའི་གཞོན་སྐྱེས་ཚོགས་འདུ། འབྱུང་འགྱུར་བོད་ཀྱི་མདུན་ལམ། ༽ ཞེས་པའི་ལྷན་ཚོགས་དེ་བཞིན་ཕྱི་ལོ་ ༢༠༡༨ ཟླ་ ༨ ཚེས་ ༡༧ ནས་ ༢༠ བར་ཚོགས་གཏན་འཁེལ་ཡོད། ཚོགས་བཅར་བ་རྣམས་ནི་གཞོན་སྐྱེས་ལོ་ན་ ༢༠ ནས་ ༤༠ བར་ཡིན་ཞིང་། དབུ་འབྱེད་མཛད་སྒོ་ཕྱི་ཚེས་ ༡༧ ཉིན་འཚོགས་རྒྱུ་དང་། ཕྱི་ཚེས་ ༢༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བཀའ་དྲིན་དང་བཀའ་སློབ་སྩལ་གཏན་འཁེལ་འདུག
ལྔ་དང་ལྔ་བཅུའི་འཆར་སྣང་། ཞེས་པ་ནི་གཙོ་བོ་བོད་མི་ཚོར་ཆེ་མཐོང་དང་རང་དབང་སླར་གསོ་ཐུབ་པ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་ཐུབ་པ་བྱ་རྒྱུ་བཅས་འཆར་སྣང་གཙོ་བོར་འཛིན་ནས་གཞོན་སྐྱེས་མིང་ཐོ་དེབ་འགོད་གནང་མཁན་ཁྲོད་དྲག་འདེམ་གྱིས་གོང་གི་གནད་དོན་དེ་དག་ཐད་གོ་བསྡུར་སྦྱང་བཤད་ལྷུག་པོ་གནང་རྒྱུ་ཡིན་འདུག
ལྷན་ཚོགས་སྐབས་ཚན་པ་ཆ་བགོས་ཀྱིས་གོ་བསྡུར་སྦྱང་བཤད་ཙམ་མ་ཟད། ཕྱེད་ཡོལ་སྒོར་གཞས་དང་། དེ་བཞིན་རི་འཛེགས། ཉེ་འགྲམ་ས་གནས་གཞན་ལ་ལྟ་སྐོར་འཁྲིད་རྒྱུ་བཅས་ལས་རིམ་འཁྲུག་ཆ་དོད་པོ་ཞིག་ཡོང་ཐབས་གནང་རྒྱུ་ཡིན་འདུག
ཚོགས་འདུར་གོ་བསྡུར་སྦྱང་བཤད་གནང་རྒྱུའི་གནད་དོན་བཞི་ནི།
༡ ༽ བོད་རྒྱ་གཉིས་ལོ་རྒྱུས་ཐོག་འབྲེལ་ལམ་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་དང་ལྷན་གཞུང་སྒེར་སྤྱི་གསུམ་ཐོག་ནས་འབྲོལ་མོལ་བསྐྱར་གསོ་ཡོང་ཐབས་གནང་རྒྱུའི་ཐད་ཐབས་ལམ་གསར་པ།
༢ ༽ གཞོན་སྐྱེས་ཚོས་བོད་མིའི་རང་དབང་འཐབ་རྩོད་ཀྱི་ལས་འགུལ་ཐོག་མཉམ་ཞུགས་ཚགས་ཚུད་ཡོང་སླད། འབྲེལ་ལམ་རྒྱ་སྐྱེད་དང་། ཞུ་གཏུག་ཀྱི་ལས་འགུལ། རྒྱལ་སྤྱིའི་འབྲེལ་ལམ།
༣ ༽ རང་ཡུལ་དང་ཡུལ་གྱར། གཞིས་བྱེས་བོད་རིགས་སྤུན་ཟླའི་དབར་འབྲེལ་བ་འཛུགས་ཐབས།
༤ ༽ ལྔ་དང་ལྔ་བཅུའི་འཆར་སྣང་ལག་བསྟར་ཚགས་ཚུད་ཡོང་སླད། བོད་མིའི་སྒྲིག་འཛུགས་ཀྱིས་འགོ་ཁྲིད་ནུས་པ་སྐྱེད་སྲིང་དང་། ཕྱི་ནང་གི་མཐུན་རྐྱེན་མཁོ་སྒྲུབ་ཞུ་རྒྱུའི་ལས་འཆར།
ཐེངས་འདིར་ལྷན་ཚོགས་སྐབས་གསུང་བཤད་གནང་མཁན་གཞུང་དང་གཞུང་འབྲེལ་མིན་པའི་ཚོགས་པ། ཤེས་ཡོན་སྡེ་ཚན་སོགས་ཀྱི་སྐུ་ཚབ་བཅས་མགྲོན་འབོད་ཞུས་ཏེ་བགྲོ་གླེང་ལྷུགས་པོ་ཞིག་ཡོང་ཐབས་ལ་དམིགས་ཡོད།
ཚན་པ་ཆ་བགོས་ཀྱི་ལྷན་ཚོགས་སྐབས་བོད་མི་གཞོན་སྐྱེས་ཚོའི་ནུས་པ་གཅིག་ཏུ་སྤུངས་ནས་འབྱུང་འགྱུར་བོད་མིའི་འཐབ་རྩོད་མདུན་ལམ་སྲ་བརྟན་བཟོ་ཐབས་བྱ་རྒྱུ།
ང་ཚོས་ཚོགས་འདུའི་ནང་ཤེས་ཡོན་མི་སྣ་དང་། ཁེ་ལས་པ། རིག་གཅིག་རྐང་འཛིན་སོགས་རིག་གནས་འདྲ་མིན་ཐོག་ནས་གཞོན་སྐྱེས་ཚོགས་བཅར་བ་གང་མང་མཉམ་ཞུགས་གནང་ཐུབ་རྒྱུར་སྐུལ་དེད་ཞུ་རྒྱུ་ཡིན་ཡང་། སྤྱི་ཚོགས་ཞབས་ཞུའི་ལས་དོན་ཐོག་གཟེངས་སུ་ཐོན་པའི་གཞོན་སྐྱེས་རྣམས་ལ་དམིགས་བསལ་བསམ་ཞིབ་བྱ་རྒྱུ།
༼ འོན་ཀྱང་སྤྱི་ཚོགས་ལས་དོན་འགན་ཁུར་ཞུ་རྒྱུའི་གོ་སྐབས་རྩ་བ་ནས་མ་ཐོབ་མཁན་གཞོན་སྐྱེས་ལྷ་བསམ་ཅན་ཁག་གཅིག་ལའང་གོ་སྐབས་འབུལ་རྒྱུ་ཡིན། ༽
ཚོགས་བཅར་བ་འདེམས་སྒྲུག་བྱེད་ཕྱོགས་ཐད་འགྱུར་བཅོས་ཕྲན་བུ་བྱུང་བ།
ཀ ༽ ཚོགས་འདུར་ཞུགས་བློ་ཡོད་རིགས་རྣམས་ཀྱིས་གཤམ་འཁོད་ཡིག་ཆ་ཁག་དྲ་ལམ་ཐོག་ནས་ཕུལ་བ་མ་གཏོགས་ལག་ཐོག་ནས་འབུལ་མི་དགོས།
རང་ཉིད་ཤེས་ཡོན་ཐོག་གྲུབ་འབྲས་ཇི་ཐོན་གྱི་ངོ་སྤྲོད་སྙིང་བསྡུས། ལས་ཀའི་ཉམས་མྱོང་སྐོར་དང་། ཚོགས་པ་སྒྲིག་འཛུགས་ཁག་ནང་འགོ་ཁྲིད་ཀྱི་ལས་དོན་སྤེལ་བའི་ཉམས་མྱོང་། དཔྱ་ཁྲལ་ལག་དེབ་ཀྱི་ཨང་གྲངས་ཁ་གསལ་འགོད་དགོས།
Email: [email protected]
ཁ༽ མིང་ཐོ་དེབ་འགོད་བྱ་རྒྱུའི་མཐའ་མའི་དུས་བཀག་འཕར་འགྱངས་ཕྱི་ལོ་ ༢༠༡༨ ཟླ་ ༦ ཚེས་ ༦ བར།
ག༽ ཚོགས་བཅར་བ་རྣམས་ལོ་ན་ ༢༠ ནས་ ༤༠ བར་ཡིན་དགོས། ༼ དེ་སྔ་ཚོགས་བཅར་བའི་ལོ་ཚད་ ༢༥ ནས་ ༤༠ བར་ཡིན་ཡང་། ད་ཆ་འགྱུར་བཅོས་ཀྱིས་ལོ་ན་ ༢༠ ནས་ ༤༠ བར་གཏན་འབེབས་བྱུང་བ་དེ་ཚད་ལྡན་བསམ་འཆར་དང་ལམ་སྟོན་འོག་ཞུས་ཡོད། ༽
༼ འགྲོ་གྲོན་ཡོངས་རྫོགས་ཕྱི་དྲིལ་ལས་ཁུངས་ནས་འགན་ཁུར་ཞུ་རྒྱུ། ༽
ཚོགས་ཞུགས་བ་མི་གྲངས་ས་བགོས།
༡། རྒྱ་གར་ནས་ཚོགས་བཅར་བའི་ས་མིག་གྲངས་ ༣༥
༢། བལ་ཡུལ་དང་འབྲུག་ནས་ཚོགས་བཅར་བའི་ས་མིག་གྲངས་ ༥
༣། བྱང་ཨ་རི་ནས་ཚོགས་བཅར་བའི་ས་མིག་གྲངས་ ༢༥
༤། ཡུ་རོབ་ནས་ཚོགས་བཅར་བའི་ས་མིག་གྲངས་ ༢༥
༥། ཨོ་གླིང་དང་ནིའུ་ཛི་ལེནཌི། ཨེ་ཤི་ཡའི་ས་ཁུལ་ཉི་ཧོང་དང་ཐེ་ཝན་ནས་ཚོགས་བཅར་བའི་ས་མིག་གྲངས་ ༥
༦། སྲི་ཞུའི་ལས་བྱེད་ཆེད་ཟུར་བཅད་ས་མིག་གྲངས་ ༥
ཁྱོན་ཚོགས་བཅར་བ་མི་གྲངས་ ༡༠༠ ཡོད་པ་ནས་ས་མིག་གྲངས་ ༥ དགེ་བཙུན་རྣམས་ལ་ཟུར་བཅད་བྱ་རྒྱུ་དང་། གཞན་ས་མིག་གྲངས་ ༥ ཕ་མ་གང་རུང་བོད་མི་ཡིན་པའི་མི་རིགས་འདྲེས་མའི་གཞོན་སྐྱེས་རྣམས་ལ་ཟུར་བཅད་ཞུ་རྒྱུ།
གསལ་བསྒྲགས་རྙིང་པ།
སྤེལ་ཚེས། ༢༠༡༨ ཟླ་ ༥ ཚེས་ ༩
སྙན་ཞུ་འབུལ་རྒྱུའི་མཐའ་མའི་དུས་བཀག་གཏན་འབེབས་ ༢༠༡༨ ཟླ་ ༥ ཚེས་ ༣༠
གསལ་བསྒྲགས་གསར་པ།
སྤེལ་ཚེས་ ༢༠༡༨ ཟླ་ ༥ ཚེས་ ༢༣
སྙན་ཞུ་འབུལ་ཚེས་མཐའ་མའི་དུས་བཀག་འཕར་འགྱངས་ཞུས་པ་ ༢༠༡༨ ཟླ་ ༦ ཚེས་ ༦ བར།
འདེམས་སྒྲུག་ཚོགས་ཆུང་ནས་སྙན་ཞུ་འབྱོར་བ་རྣམས་ལ་རྟོག་ཞིབ་གནང་མཐར་མཐའ་མའི་མིང་ཐོ་འདེམས་སྒྲུག་གཏན་འབེབས་གནང་རྒྱུ། གཏན་འབེབས་ཟིན་པའི་མཚན་ཐོ་ཕྱི་ལོ་ ༢༠༡༨ ཟླ་ ༦ ཚེས་ ༡༢ ཉིན་གསལ་བསྒྲགས་སྤེལ་རྒྱུ། འདེམས་སྒྲུག་ཚོགས་ཆུང་ནས་འདེམས་ཐོན་ཚོགས་མི་རྣམས་ལ་ཕྱི་ལོ་ ༢༠༡༨ ཟླ་ ༦ ཚེས་ ༢ ནས་གསལ་བསྒྲགས་གནང་རྒྱུ།
