༢༠༡༨ ཟླ་  ༥ ཚེས་ ༡༤ རེས་གཟའ་ཟླ་བ།

༄༅། །ཕྱི་ལོ་ ༢༠༡༨ ཟླ་ ༥ ཚེས་ ༡༤ རེས་གཟའ་ཟླ་བའི་སྔ་དྲོ་ཆུ་ཚོད་ ༩།༣༠ ཙམ་ལ་རྒྱ་གར་གྲོས་ཚོགས་གོང་འོག་གི་ཆབ་སྲིད་ཚོགས་པ་འདྲ་མིན་ལས་གྲུབ་པའི་གྲོས་ཚོགས་འཐུས་མི་ཁག་བཞུགས་སྒར་དྷརྨ་ཤཱ་ལར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཟིམ་ཆུང་མཇལ་ཞུར་བཅར་འདུག  སྐབས་དེར་༸གོང་ས་མཆོག་གིས་ཐུགས་དགྱེས་ཚོར་ཆེན་པོས་གྲོས་ཚོགས་འཐུས་མི་རྣམས་དྷ་སར་ཕེབས་པར་འཚམས་འདྲི་ཡོད་སྐོར་དང་།  ཆབ་སྲིད་ཚོགས་པ་གང་ནས་ཡིན་མིན་ཐུགས་ཞིབ་མཛད་སྐབས་གྲོས་ཚོགས་འཐུས་མི་རྣམས་ཀྱིས་གུས་བརྩི་དང་སྦྲགས་དགའ་སྣང་གི་ཚོར་བ་ཆེན་པོས་བཀའ་ལན་ཞུས་འདུག  དེ་ཡང་གྲོས་ཚོགས་འོག་མའི་ Lok Sabha བྷི་ཇེ་པི་ BJP ཆབ་སྲིད་ཚོགས་པའི་འཐུས་མི་ལག་ཤི་མི་ན་ར་ཡན་ཡ་ཌབ་ Laxmi Narayan Yadav མཆོག་དང་།  གྲོས་ཚོགས་འོག་མའི་འཐུས་མི་སྐུ་ཞབས་པྲ་སནནཱ་པ་ཏ་ས་ནི་ Dr. prasanna Patasani མཆོག  མ་ཧཱ་རཱཤཊ་ Maharashtra མངའ་སྡེའི་ལ་ཏུར་ Latur གྲོང་ཁྱེར་ནས་གྲོས་ཚོགས་འོག་མའི་འཐུས་མི་སྐུ་ཞབས་སུ་ནིལ་གྷེཀ་ཝཌ་ Sunil Gaikwad མཆོག  དེ་བཞིན་ཤིབ་སེ་ན་ཆབ་སྲིད་ཚོགས་པའི་གྲོས་ཚོགས་འཐུས་མི་སོགས་ཡོད་འདུག 

སྐབས་དེར་༸གོང་ས་མཆོག་གིས་བཀའ་སློབ་སྩལ་དོན་དུ་ཕྱི་ལོ་ ༡༩༦༠ ལོར་རྒྱ་གར་གཞུང་གིས་མགོན་པོ་མཆོག་ལ་བཞུགས་སྒར་དྷརྨ་ཤཱ་ལར་བཞུགས་གནས་ཕོ་བྲང་འབུལ་ལམ་ཞུས་པ་ནས་བཟུང་ད་བར་གཏན་འཇགས་བཞུགས་གནས་ལྟ་བུ་ཆགས་ཡོད་སྟབས་ཕ་ཡུལ་གཉིས་པར་བརྩི་བཞིན་ཡོད་སྐོར་སོགས་བཀའ་སློབ་སྩལ།