༢༠༡༨ ཟླ་ ༥ ཚེས་ ༩ རེས་གཟའ་ལྷག་པ།
༄༅། །འདི་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༥ ཚེས་ ༨ ཉིན་གྱི་སྔ་དྲོ་ཆུ་ཚོད་ ༡༠།༣༠ ཙམ་ལ་ཡུ་རོབ་གྲོས་ཚོགས་འཐུས་མི་སྐུ་ཞབས་ཐོ་མ་སི་མན་ (Thomas Mann)མཆོག་དང་། སྐུ་ཞབས་ས་བྷ་སོ་གོར་ CsabaSogor མཆོག སྐུ་ཞབས་ར་མོན་ཏྲི་མོ་ས་ Ramon Tremosaམཆོག་བཅས་ལས་གྲུབ་པའི་ཡུ་རོབ་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ཞིག་བོད་མི་མང་སྤྱི་འཐུས་ལྷན་ཁང་དུ་ཕེབས་ཡོད།
ཐོག་མར་དཔལ་ལྡན་ཚོགས་གཞོན་ཨཱཅཱརྱ་ཡེ་ཤེས་ཕུན་ཚོགས་མཆོག་གིས་འཚམས་འདྲིའི་མཇལ་འཕྲད་གནང་བ་དང་། སྐབས་དེར་དཔལ་ལྡན་ཚོགས་གཞོན་མཆོག་གིས་ཁོང་རྣམས་འདིར་ཕེབས་པར་བོད་མི་མང་སྤྱི་འཐུས་ལྷན་ཚོགས་དང་། བོད་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུའི་འཚམས་འདྲི་གནང་བ་དང་སྦྲགས། བཙན་བྱོལ་བོད་མིའི་མང་གཙོའི་འཕེལ་རིམ་སྐོར་དང་། གྲོས་ཚོགས་ཚོགས་དུས་གཉིས་ཀྱི་ལས་རིམ་སྐྱོང་སྟངས་སྐོར། དེ་བཞིན་སྤྱི་འཐུས་རྣམ་པ་འཛམ་གླིང་ཡུལ་གྲུ་གང་སར་ཕེབས་ཏེ་གྲོས་ཚོགས་འཐུས་མི་སོགས་མཇལ་འཕྲད་གནང་སྟེ་བོད་དོན་སྐོར་ངོ་སྤྲོད་གནང་བཞིན་པའི་སྐོར།
རྒྱ་གར་ནང་ཡོད་པའི་བོད་མིའི་གཞིས་ཆགས་ཁག་ནང་སྤྱི་འཐུས་རྣམ་པ་ས་བགོས་བྱས་ནས་འཚམས་གཟིགས་སུ་ཕེབས་ནས་ས་གནས་བོད་མི་རྣམས་ལ་༸གོང་ས་མཆོག་གི་མཛད་འཕྲིན་དང་། བོད་ནང་གི་ཆབ་སྲིད་ཀྱི་གནས་སྟངས་ལ་འགྱུར་ལྡོག་སོགས་ངོ་སྤྲོད་གནང་རྒྱུ། གྲོས་ཚོགས་ཀྱི་ལས་རིམ་ཁག་མང་ཚོགས་ལ་གོ་རྟོགས་སྤེལ་བ་མ་ཟད། ས་གནས་བོད་མིའི་འཚོ་བའི་གནས་སྟངས་སོགས་ལའང་སྐབས་བསྟུན་གཟིགས་ཞིབ་གནང་གི་ཡོད་སྐོར། དེ་བཞིན་གཞི་རིམ་མང་གཙོའི་འགྲོ་ལུགས་ལྟར་བོད་མི་གནས་སྡོད་ཀྱི་ས་གནས་ཁག་ནང་ད་ལྟའི་ཆར་ས་གནས་འཐུས་ཚོགས་གྲངས་ ༣༧ ཡོད་པ་མ་ཟད། ལས་དོན་གང་ཅིར་ཚགས་ཚུད་ངང་རྒྱུན་སྐྱོང་གནང་མུས་ཡིན་སྐོར་གསུངས།
དེ་རྗེས་སྐུ་ཚབ་ཚོགས་མི་རྣམས་གྲོས་ཚོགས་ཀྱི་ཚོགས་ཁང་ནང་གཟིགས་བསྐོར་གནང་རྗེས་སྤྱི་འཐུས་ལྷན་ཚོགས་ཀྱི་རྒྱུན་ལས་ཚོགས་ཁང་ནས་སྤྱི་འཐུས་རྒྱུན་ལས་རྣམ་པ་དང་མཇལ་འཕྲད་གནང་། སྐབས་དེར་ཚོགས་ཆུང་གི་ཚོགས་གཙོ་སྐུ་ཞབས་ཐོ་མ་སི་མན་ Thomas Mann མཆོག་གིས་གསུང་དོན།
དེ་རིང་སྤྱི་འཐུས་རྒྱུན་ལས་རྣམ་པ་དང་མཇལ་འཕྲད་གནང་ཐུབ་པར་དགའ་པོ་བྱུང་། ང་ཚོའི་བོད་དོན་རྒྱབ་སྐྱོར་ཚོགས་པ་དེ་ཤུགས་ཆེ་ཤོས་གྲས་ཡིན་མིན་མི་ཤེས། འོན་ཀྱང་ང་ཚོས་ཟླ་རེ་འཆར་ཅན་མཁས་དབང་དང་། རྒྱ་འོག་སྡུག་སྦྱོང་མནར་གཅོད་མྱངས་མྱོང་མཁན་བོད་མི་དང་དེ་བཞིན་བོད་མི་ཆབ་སྲིད་བཙོན་ཟུར་རྣམས་དང་ཐུག་འཕྲད་བྱས་པ་བརྒྱུད་ང་ཚོས་འགྲོ་བ་མིའི་ཐོབ་ཐང་སྲུང་སྐྱོབ་དགོས་གལ་ཆེ་བའི་སྐོར་དྲིལ་བསྒྲགས་བྱ་རྒྱུ་དེ་ཧ་ཅང་གལ་ཆེར་བརྩི་བཞིན་ཡོད།
དེར་བརྟེན་ང་ཚོས་འགྲོ་བ་མིའི་ཐོབ་ཐང་གི་གནད་དོན་དེ་ཡུ་རོབ་གྲོས་ཚོགས་ནང་གི་གྲོས་གཞི་ཞིག་ཆགས་ཐུབ་པ་བྱེད་རྒྱུར་ང་ཚོས་འབད་བརྩོན་བྱེད་བཞིན་ཡོད། དེ་བཞིན་བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་ཐོབ་ཐབས་བྱེད་བཞིན་པའི་བོད་མིའི་མངོན་འདོད་སྐོར་ང་ཚོས་གྲོས་ཚོགས་ནང་གང་ཐུབ་ངོ་སྤྲོད་བྱེད་བཞིན་པ་ཙམ་མ་ཟད། དབུ་མའི་ལམ་གྱི་སྲིད་བྱུས་དང་། བོད་མི་ཚོས་འཚེ་མེད་ཞི་བའི་ལམ་ནས་རྒྱ་ནག་གཞུང་དང་གྲོས་མོལ་ཡོང་ཐབས་བྱེད་བཞིན་པ་དེར་རྒྱབ་སྐྱོར་ཡོད་པ་གསལ་འདོན་བྱེད་བཞིན་ཡོད། གཞན་ཡང་ང་ཚོས་ཨེ་ཤི་ཡའི་གཙང་ཆུ་ཆེ་ཁག་རྣམས་ཀྱི་ཆུ་མགོ་བོད་ཡིན་སྟབས་བོད་ཀྱི་ཁོར་ཡུག་ཧ་ཅང་གལ་གནད་ཆེན་པོ་ཆགས་ཡོད་སྐོར་གསུངས། ཕྱོགས་མཚུངས་སྐབས་དེར་སྐུ་ཞབས་ས་བྷ་སོ་གོར་CsabaSogorམཆོག་དང་། སྐུ་ཞབས་ར་མོན་ཏྲི་མོ་ས་Ramon Tremosaམཆོག་ནས་ཀྱང་གསུང་བཤད་གནང་རྗེས་སྤྱི་འཐུས་རྣམས་དང་ལྷན་བགྲོ་གླེང་གནང་ཡོད་པ་བཅས།
