ཕྱི་ལོ་ ༢༠༡༨ ཟླ་ ༥ ཚེས་ ༢༣ རེས་གཟའ་ལྷག་པ།
༄༅། །ཕྱི་ལོ་ ༢༠༡༨ ཟླ་ ༥ ཚེས་ ༢༡ རེས་གཟའ་ཟླ་བ་ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་བདེ་སྐྱིད་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་འཕྲོད་བསྟེན་ཡན་ལག་སྨན་ཁང་དང་།  དོན་གྲུབ་གླིང་། མདོ་ཁམས་ཅནྡྲ་བ་ནི་བོད་མིའི་གཞིས་ཆགས་ Dokham Chanderbani བཅས་སུ་གཞུང་འབྲེལ་འཚམས་གཟིགས་གནང་ཡོད་པ་མ་ཟད།

ཕྱི་ཚེས་ ༢༢ ཉིན་ས་ཊོན་བོད་མིའི་གཞིས་ཆགས་དང་། ཀུམ་རའོ། འདོད་རྒུ་གཡུལ་རྒྱལ་གླིང་བོད་མིའི་གཞིས་ཆགས། དེ་བཞིན་ཁེ་ར་ཀེམ་བོད་མིའི་གཞིས་ཆགས་བཅས་སུ་འཚམས་གཟིགས་སྐབས་ས་གནས་འགོ་འཛིན་གྱིས་གཙོས་གཞུང་དང་གཞུང་འབྲེལ་མིན་པའི་ཚོགས་པ་ཁག་གིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

ཐེངས་འདིར་གཞུང་འབྲེལ་འཚམས་གཟིགས་གནང་དགོས་དོན་གཙོ་བོ་ནི། འཕྲོད་བསྟེན་ཡན་ལག་སྨན་ཁང་གི་གནས་བབ་དང་སྨན་དཔྱད་ཁང་གི་ཡོ་ཆས། ས་གནས་ཁག་ཏུ་འཕྲོད་བསྟེན་དང་འབྲེལ་བའི་ལས་གཞི་འགྲོ་མུས་དང་། མ་འོངས་ལས་གཞི་སྤེལ་སླད་རྟོག་ཞིབ་སླད་ཡིན་འདུག་པ་བཅས།