ཕྱི་ལོ་ ༢༠༡༨ ཟླ་ ༥ ཚེས་ ༣ རེས་གཟའ་ཕུར་བུ། 

༄༅། །ཕྱི་ལོ་ ༢༠༡༨ ཟླ་ ༤ ཚེས་ ༢༩ ནས་ ༣༠ བར་ཉིན་གྲངས་གཉིས་རིང་བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་ཚན་པས་ཨ་རིའི་མེ་ཌི་སན་ཁུལ་ནང་རྟེན་གཞི་བྱས་པའི་རི་དྭགས་ནགས་ཀྱི་སྐྱེད་མོ་ཚལ་ཞེས་ནང་པའི་བསྟི་གནས་ཁང་ Deer Park Buddhist Center དང་། མེ་ཌི་སན་ཁུལ་གྱི་བཟོ་ལས་རིག་པའི་མཐོ་སློབ་ Madison Area Technical College ནང་པར་རིས་འགྲེམས་སྟོན་དང་དཔལ་འབྱོར་འདུ་འགོད་ཀྱི་ལས་རིམ་ཞིག་ཚོགས་ཡོད།

དེ་ཡང་ཝི་སི་ཁོན་སིན་གཙུག་ལག་སློབ་གཉེར་ཁང་གི་ལྷོ་ཨེ་ཤི་ཡའི་རིག་པ་དང་སྐད་ཡིག་སྡེ་ཁག་གི་ཟུང་འབྲེལ་འགན་འཛིན་ལྕམ་ཆུང་ལ་ལི་ཏཱ་ Lalita du Perron ལགས་ཀྱིས་པར་རིས་འགྲེམས་སྟོན་དབུ་འབྱེད་གནང་ཡོད་པ་དང་། དེ་བཞིན་རི་དྭགས་ནགས་ཀྱི་སྐྱེད་མོ་ཚལ་ཞེས་ནང་པའི་བསྟི་གནས་ཁང་གི་དགེ་འདུན་པ་བགྲེས་པ་ཁག་གཅིག་གིས་པར་རིས་འགྲེམས་སྟོན་དེ་བཞིན་ལམ་ལྷོངས་ཡོང་བར་སྨོན་ལམ་གསུང་འདོན་གནང་ཡོད། 

ཝི་སི་ཁོན་སིན་བོད་རིགས་སྤྱི་མཐུན་ཚོགས་པའི་ཚོགས་གཙོ་བློ་བཟང་བསྟན་འཛིན་ལགས་ཀྱིས་ཕྱི་དྲིལ་འགྲེམས་སྟོན་ཚན་པས་ཁུལ་དེར་བོད་དོན་པར་རིས་འགྲེམས་སྟོན་དང་ལྕམ་ཆུང་ལ་ལི་ཏཱ་ལགས་ཀྱིས་པར་རིས་འགྲེམས་སྟོན་དབུ་འབྱེད་སླད་ཆེད་ཕེབས་གནང་བར་ཐུགས་རྗེ་ཆེ་ཞུ་གནང་ཡོད། 

ཕྱོགས་མཚུགས་ཕྱི་དྲིལ་བོད་ཀྱི་འགྲེམས་སྟོན་ཚན་པའི་འགན་འཛིན་བཀྲ་ཤིས་ཕུན་ཚོགས་ལགས་ཀྱིས་བཞུགས་སྒར་རྡ་ས་གངས་ཅན་སྐྱིད་གཤོང་དུ་འགྲེམས་སྟོན་ཁང་གསར་པ་རྒྱ་སྐྱེད་ཀྱི་ལས་གཞིར་དམིགས་ནས་དཔལ་འབྱོར་འདུ་འགོད་སླད་བོད་དོན་པར་རིས་སྐོར་སྐྱོད་འགྲེམས་སྟོན་གནང་བཞིན་ཡོད་སྐོར་ངོ་སྤྲོད་གནང་།

ཐེངས་འདིའི་པར་རིས་འགྲེམས་སྟོན་དང་བོད་དོན་སྐོར་གྱི་གློག་བརྙན་གཟིགས་ཆེད་བོད་མི་དང་ཕྱི་རྒྱལ་མི་རིགས་གྲངས་ ༥༠༠ ལྷག་ཕེབས་ཡོད་པ་མ་ཟད།  གཟིགས་མོ་བ་ཡོངས་ནས་པར་རིས་འགྲེམས་སྟོན་ལ་བསྔགས་བརྗོད་གནང་ཡོད། 

ཝི་སི་ཁོན་སིན་དུ་པར་རིས་འགྲེམས་སྟོན་སླད་མེ་ཌི་སན་ནང་རྟེན་གཞི་བྱས་པའི་རི་དྭགས་ནགས་ཀྱི་སྐྱེད་མོ་ཚལ་ཞེས་ནང་པའི་བསྟི་གནས་ཁང་གི་འགན་འཛིན་ལྷུན་གྲུབ་ཤེས་རབ་ལགས་ཀྱིས་མཐུན་འགྱུར་གནང་ཡོད་པ་བཅས། །