༢༠༡༨ ཟླ་ ༥ ཚེས་ ༩ རེས་གཟའ་ལྷག་པ།
༄༅། །འདི་གར་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ ༢༠༡༨ ཟླ ༥ ཚེས ༨ ཞོགས་པ་ཆུ་ཚོད ༡༠ ཐོག་དཔལ་ས་སྐྱའི་གོང་མ་ཁྲི་ཆེན་རྡོ་རྗེ་འཆང་ངག་དབང་ཀུན་དགའ་ཐེག་ཆེན་དཔལ་འབར་འཕྲིན་ལས་བསམ་འཕེལ་དབང་གི་རྒྱལ་པོ་མཆོག་ཨ་རིའི་རྒྱལ་ས་ཝ་ཤིང་ཀྲོན་དུ་རྟེན་གཞི་བྱས་པའི་བྱང་ཨ་རིའི་སྐུ་ཚབ་དོན་གཅོད་ཁང་དུ་གདན་ཞུས་ལྟར་ཆིབས་བསྒྱུར་བཀའ་དྲིན་སྐྱོང་སྐབས་སྐུ་ཚབ་དོན་གཅོད་དང་། རྒྱལ་སྤྱིའི་བོད་དོན་ལས་འགུལ་ཁང་གི་སྐུ་ཚབ། བོད་སྐད་རླུང་འཕྲིན་ལས་ཁང་གཉིས་ཀྱི་འགན་འཛིན། ས་གནས་བོད་རིགས་སྤྱི་མཐུན་ཚོགས་པ་དང་། ས་གནས་གཞོན་ནུའི་སྐུ་ཚབ། དོན་ཁང་གི་ལས་བྱེད་བཅས་ནས་ཕེབས་བསུའི་མཇལ་དར་ཕུལ།
ཐོག་མར་སྐུ་ཚབ་དོན་གཅོད་མཆོག་ནས་རྒྱལ་ས་ཝ་ཤིང་ཀྲོན་ནང་རྟེན་གཞི་བྱས་པའི་བོད་ཀྱི་ཚོགས་སྡེ་ཁག་གི་སྐུ་ཚབ་རྣམས་ངོ་སྤྲོད་ཞུས་པ་དང་ཆབས་ཅིག བྱང་ཨ་རིའི་སྐུ་ཚབ་དོན་གཅོད་ཁང་གི་ལས་དོན་བྱེད་ཕྱོགས་ངོ་སྤྲོད་སྙིང་བསྡུས་ཞུས་རྗེས། རྒྱལ་སྤྱིའི་བོད་དོན་ལས་འགུལ་ཁང་དང་། རླུང་འཕྲིན་ལས་ཁང་གཉིས་ཀྱི་འགན་འཛིན། བོད་རིགས་སྤྱི་མཐུན་ཚོགས་པ། ས་གནས་གཞོན་ནུ་ལྷན་ཚོགས་བཅས་ནས་སོ་སོའི་ཁྱབ་ཁོངས་ཀྱི་ལས་དོན་བྱེད་ཕྱོགས་མཁྱེན་རྟོགས་ཆེད་ངོ་སྤྲོད་སྙིང་བསྡུས་ཞུས།
དེ་རྗེས་རིན་པོ་ཆེ་མཆོག་ནས་སྐུ་ཚབ་དོན་གཅོད་ཁང་ལ་རབ་གནས་བྱིན་གྱིས་བརླབས་རྗེས་བླང་དོར་བཀའ་སློབ་སྙིང་བསྡུས་ཕེབས་གསལ་དུ། གཙོ་བོ་སྤྱི་ནོར་༸གོང་༸སྐྱབས་མགོན་ཆེན་པོ་མཆོག་གི་ལམ་སྟོན་དབུ་ཁྲིད་འོག་སྐུ་ངོ་སྲིད་སྐྱོང་རེད། ཆབ་སྲིད་ཀྱི་ཐུགས་འགན་བཞེས་མཁན་ཚོས་བཀོད་སྒྲིག་གནང་བའི་ཐོག་ནས་ཕྱག་ལས་གནང་མཁན་ཚང་མས་ད་བར་ཧུར་ཐག་གནང་བར་གྲུབ་འབྲས་བྱུང་ཡོད། ཧ་ཅང་དགའ་བོ་བྱུང་། ཚང་མར་ཐུགས་རྗེ་ཆེ་ཞུ་རྒྱུ་ཡིན་ཞེས་དང་། ཡང་རིན་པོ་ཆེ་མཆོག་གིས། དེང་སྐབས་ཨ་རིའི་ནང་བོད་མིའི་མི་འབོར་ཇེ་མང་དུ་འགྲོ་བཞིན་ཡོད་པར་བརྟེན། བོད་མིའི་ངོ་བོ་གནས་ཐུབ་པ་དང་། བོད་མི་རིགས་ཙམ་མ་ཟད། འཛམ་གླིང་སྐྱེ་འགྲོ་ཀུན་ལ་ཕན་ཐོགས་བྱེད་ཐུབ་པའི་བོད་ཀྱི་ཐུན་མོང་མིན་པའི་ཆོས་དང་རིག་གཞུང་རྒྱ་ཆེ་ལ་གཏིང་ཟབ་པོ་ཡོད་པ་འདི་དང་། བོད་ཀྱི་སྐད་ཡིག་མི་ཉམས་རྒྱུན་འཛིན་དང་གོང་འཕེལ་གནང་རྒྱུར་གཞུང་མང་སྒོ་གང་ས་ནས་སྔར་ལྷག་ཤུགས་སྣོན་རྒྱག་རྒྱུ་ཧ་ཅང་གི་གལ་ཆེན་པོ་ཡིན། ཞེས་གསུངས།
