ཕྱི་ལོ་ ༢༠༡༨ ཟླ་ ༥ ཚེས་ ༨ རེས་གཟའ་མིག་དམར།

                                     

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་འཇར་མན་ཡུལ་དུ་ཉིན་ལྔའི་རིང་གཞུང་འབྲེལ་ཕྱོགས་ཕེབས་གནང་གཏན་འཁེལ་འདུག  དེ་ཡང་ཕྱི་ལོ་ ༢༠༡༨ ཟླ་ ༥ ཚེས་ ༨ ཉིན་རྒྱབ་ནས་ཟླ་ ༥ ཚེས་ ༡༦ བར་རྒྱ་གར་རྒྱལ་ས་ལྡི་ལི་དང་། འཇར་མན་དུ་གཞུང་འབྲེལ་ཕྱོགས་ཕེབས་གནང་རྒྱུ་ཡིན་འདུག

ཕྱི་ཚེས་  ༡༡ ཉིན་ལྡི་ལིར་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་རྒྱུ་དང་། དེ་རྗེས་འཇར་མན་དུ་ཕེབས་ཐོན་གྱིས་ས་གནས་སུ་གཞུང་འབྲེལ་ལས་དོན་སྤེལ་རྒྱུ་དང་།  འཇར་མན་གྲོང་ཁྱེར་དུ་ཡོད་པའི་བོད་དོན་རྒྱབ་སྐྱོར་ཚོགས་པའི་ལོ་འཁོར་ཚོགས་ཆེན་ General  Assembly of Tibet Initiative Deutschland ཐོག་སྐུ་མགྲོན་དུ་གདན་ཞུས་ལྟར་གསུང་བཤད་གནང་རྒྱུ་མ་ཟད།

ཧེ་སེ་མངའ་སྡེའི་གནད་ཡོད་མི་སྣ་དང་བོད་དོན་རྒྱབ་སྐྱོར་བ་རྣམ་པར་མཇལ་འཕྲད་གནང་རྒྱུ་ཡིན་འདུག  དེ་ཡང་ཚོགས་པ་དེ་ནི་ཕྱི་ལོ་ ༡༩༨༩ ལོར་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་ལ་རྒྱབ་སྐྱོར་གནང་རྒྱུར་དམིགས་ནས་བཙུག་པ་ཞིག་ཡིན་འདུག

ཕྱོགས་མཚུངས་འཇར་མན་བོད་རིགས་ཚོགས་པ་དང་། འཇར་མན་བོད་ཁང་གཉིས་ནས་འཇར་མན་གཞུང་མང་ལ་ཐུགས་རྗེ་ཆེ་ཞུའི་མཛད་སྒོར་མཉམ་ཞུགས་དང་སྦྲགས་གསུང་བཤད་གནང་རྒྱུ་དང་།

འཇར་མན་གྱི་རྒྱལ་ས་སྦར་ལིན་དུ་ཕེབས་སྐབས་ས་གནས་སུ་གཞུང་འབྲེལ་ལས་དོན་སྤེལ་གནང་རྒྱུ་མ་ཟད། གྲོས་ཚོགས་འཐུས་མི་ཁག་ཅིག་དང་མཇལ་འཕྲད་གནང་རྗེས་ཕྱི་ཚེས་ ༡༥ ཉིན་སྦར་ལིན་ Berlin གྱི་གསར་འགོད་པ་ཁག་ཅིག་གི་བཅར་འདྲི་དང་ལེན་གནང་རྒྱུ་དང་། ཕྱི་ཚེས་ ༡༦ ཉིན་བཞུགས་སྒར་རྡ་སར་ཕེབས་འབྱོར་གནང་རྒྱུ་ཡིན་འདུག

སྲིད་སྐྱོང་མཆོག་ཡུལ་དེར་ཕེབས་ཐེངས་མཐའ་མ་དེ་སྔ་ལོ་དྲུག་སྔོན་སྟེ་ཕྱི་ལོ་ ༢༠༡༢ ལོར་ཡིན་འདུག  སྐབས་དེར་ Schwarz-Schilling Foundation ཞེས་པས་གོ་སྒྲིག་གནང་བའི་གླེང་སྟེགས་སྒོར་མོའི་ལྷན་ཚོགས་ནང་མཉམ་ཞུགས་གནང་འདུག་པ་བཅས།