༢༠༡༨ ཟླ་ ༥ ཚེས་ ༣ རེས་གཟའ་ཕུར་བུ།
༄༅། །ཕྱི་ལོ་ ༡༩༩༡ ལོར་དབུས་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་ཐོག་མར་གསར་འཛུགས་གནང་བ་ནས་ད་བར་བགྲེས་ཡོལ་ཕེབས་མཁན་སྔ་རྗེས་གང་ཙམ་བྱུང་ཡོད་པར་ད་ལྟའི་ཆར་སྲི་ཞུའི་ལས་བྱེད་ཁྱོན་ ༥༦༠ ཙམ་བོད་མིའི་སྒྲིག་འཛུགས་ཁྱབ་ཁོངས་ལས་ཁུངས་འདྲ་མིན་ནང་ཕྱག་ལས་གནང་མུས་ཡིན། ཕྱི་ལོ་ ༡༩༩༦ ཟླ་ ༧ ཚེས་ ༡༠ ནས་བཟུང་དབུས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ལས་རྒྱུན་ཞབས་ལོ་ ༢༠ ཧྲིལ་པོ་ལོན་རྗེས་ལུགས་མཐུན་བགྲེས་ཡོལ་ཕེབས་མཁན་རྣམས་ལ་འདི་ནས་རྗེས་དྲན་ལེགས་སོའི་ཚུལ་དུ་ཕྱག་འཁྱེར་དང་། བོད་རྗེ་སྲོང་བཙན་སྒམ་པོའི་སྐུ་བརྙན་བྱིན་ཅན་རེ་བཅས་འབུལ་སྲོལ་ཡོད་པ་ལྟར། ད་བར་བགྲེས་ཡོལ་ཕེབས་མཁན་ཁྱོན་མི་གྲངས་ ༢༧༠ ཙམ་ལ་བོད་རྗེ་སྲོང་བཙན་སྒམ་པོའི་སྐུ་བརྙན་ཕུལ་ཟིན་པ་དང་།
ད་ལམ་ཕྱི་ལོ་ ༢༠༡༨ ཟླ་ ༥ ཚེས་ ༢ ཉིན་བགྲེས་ཡོལ་བ་ཁྱོན་ ༣༣ ལ་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་སྐུ་མདུན་ནས་བོད་རྗེ་སྲོང་བཙན་སྒམ་པོའི་སྐུ་བརྙན་གསོལ་སྩལ་བཀའ་དྲིན་ཆེ་ཐོབ་བྱུང་བ་དང་བསྟུན་རྡ་སར་གནས་བཞུགས་བགྲེས་ཡོལ་བ་སྲོང་བཙན་སྒམ་པོའི་སྐུ་བརྙན་བཞེས་ཟིན་པ་ཁྱོན་མི་གྲངས་ ༢༧ ལའང་མཇལ་ཁ་དང་འབྲེལ། བཀའ་སློབ་བཀའ་དྲིན་སྩལ་རྗེས་འདི་ནས་རྡ་ས་བོད་ཀྱི་གསོལ་མགྲོན་ཁང་དུ་དཔལ་ལྡན་སྲིད་སྐྱོང་མཆོག་དང་མཛད་གཙོ་རྣམ་པ་ལྷན་རྒྱས་སྐུ་མགྲོན་དུ་མགྲོན་འབོད་ཀྱིས་བགྲེས་ཡོལ་བ་རྣམ་པ་ཚང་འཛོམས་ཐོག་ཉིན་གུང་གསོལ་ཚིགས་སྟབས་བདེ་ཞིག་འདེགས་འབུལ་ཞུ་ཐུབ་པ་བཅས།
ལས་བྱེད་འདེམས་བསྐོ་ལྷན་ཁང་གི་ལས་བྱེད་ཡོངས་ལ་མཇལ་ཁ་སྩོལ་སྐབས།
