༢༠༡༨ ཟླ་ ༥ ཚེས་ ༡ རེས་གཟའ་མིག་དམར།
༄༅། །དཔལ་ལྡན་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ནས་ཀ་རྡོར་སྒང་གསུམ་དང་ར་ཝང་ལ་ཁུལ་དུ་རྟེན་གཞི་བྱས་པའི་ཁྱབ་ཁོངས་དགོན་སྡེ་ཁག་ཏུ་གཞུང་འབྲེལ་འཚམས་འདྲི་གཟིགས་སྐོར་ལེགས་པར་གྲུབ་སྟེ་ཁ་སང་ཕྱི་ཟླ་ ༤ ཚེས་ ༣༠ ཉིན་བཞུགས་སྒར་དྷ་རྨ་ཤཱ་ལར་ཕྱེར་ཕེབས་གནང་འདུག
ཐེངས་འདིར་དཔལ་ལྡན་བཀའ་བློན་མཆོག་ནས་ཕྱི་ཟླ་ ༤ ཚེས་ ༡༩ ནས་ ༢༧ བར་རྒྱ་གར་བྱང་ཤར་ཁུལ་གྱི་ཁྱབ་ཁོངས་དགོན་སྡེ་གྲངས་ ༣༥ ཙམ་ལ་འཚམས་གཟིགས་གནང་སྟེ་བླ་ཆེན་རྣམ་པ་དང་། དགོན་ཁག་སོ་སོའི་མཁན་ལས་སྣེ་ལྷན་མཇལ་འཕྲད་གནང་བ་དང་། ས་གནས་ཁག་ཅིག་གི་སློབ་གྲྭ་དང་། རྒན་གསོ་ཁང་སོགས་སུའང་གཟིགས་སྐོར་གནང་བ་མ་ཟད་། མི་མང་རྣམས་ལ་གསུང་བཤད་དང་བཞུགས་མོལ་ཚོགས་འདུར་ལྷན་བཞུགས་གནང་འདུག
གཞན་ཡང་བཀའ་བློན་མཆོག་གིས་སྒང་ཏོག་ས་གནས་ལས་ཁུངས་ཀྱི་ཚོགས་ཁང་གསར་པ་ཞིག་ཀྱང་དབུ་འབྱེད་གནང་བ་དང་། ར་ཝང་ལ་ཁུལ་གྱི་གཡང་སྒང་གཡུང་དྲུང་དགོན་གྱི་སློབ་གྲྭའི་བུ་མོའི་ཉལ་ཁང་ཡང་དབུ་འབྱེད་གནང་འདུག །
