ཕྱི་ལོ་ ༢༠༡༨ ཟླ་ ༥ ཚེས་ ༢༨ རེས་གཟའ་ཟླ་བ།

༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན།བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཕྱི་ལོ་ ༢༠༡༨ ཟླ་ ༥ ཚེས་ ༢༠ ནས་ ༢༥ བར་ཤྲཱི་ལང་ཀར་གཞུང་དོན་ཕྱོགས་ཕེབས་གནང་བའི་ལས་འཆར་ཁག་ཐོག་མའི་འཆར་གཞི་ལྟར་ལེགས་གྲུབ་ཀྱིས་རྡ་སར་ཕྱིར་ཕེབས་གནང་ཡོད།

དེ་ཡང་བཀའ་བློན་མཆོག་ཤྲཱི་ལང་ཀ་དང་བོད་ཀྱི་ནང་པའི་མཐུན་ཚོགས་ཀྱིས་གདན་ཞུས་ལྟར་ཤྲཱི་ལང་ཀའི་ནང་པའི་ཆོས་བརྒྱུད་ཆེ་ཁག་གི་དབུ་འཛིན་བླ་ཆེན་རྣམ་པར་འཚམས་ཞུའི་མཇལ་འཕྲད་དང་། ཀན་ཊི་དང་ཨ་ནུ་ར་རྡ་སྤུ་རའི་གྲོང་ཁྱེར་གཉིས་སུ་ཆགས་པའི་ཤིན་ཏུ་རྩ་ཆེའི་ནང་པའི་གནས་ཆེན་ཁག་ལ་གནས་གཟིགས། ཤྲཱི་ལང་ཀའི་ནང་པའི་དགེ་སློང་གི་གཙུག་ལག་སློབ་ཁང་གི་ཉེ་བའི་རིགས་བདག་མཆོག་དང་མཇལ་འཕྲད་ཀྱིས་ཤྲཱི་ལང་ཀ་དང་བོད་ཀྱི་ནང་པའི་ཆོས་བརྒྱུད་གཉིས་དབར་ཕན་ཚུན་མཐུན་འབྲེལ་དང་གོ་རྟོགས་སྤེལ་རེས་ཀྱི་ལས་དོན་སྤེལ་ཕྱོགས་སྐོར་སོགས་ཀྱི་གྲོས་བསྡུར། རྒྱལ་ས་ཀོ་ལོམ་བོར་ནང་པའི་ཆོས་བརྒྱུད་ཡོངས་ཀྱི་བསྟི་གནས་དང་རྟེན་མཁར་རེ་ཡོད་པའི་གཞུང་འབྲེལ་འཛུགས་སྐྲུན་འཆར་གཞི་ཤ་ཀྱའི་རྒྱལ་ཁབ་ཅེས་པ་དེར་གཟིགས་སྐོར་དང་། འཆར་གཞི་ཆེན་པོ་དེ་ལག་བསྟར་འགན་འཁུར་གནང་མཁན་དགེ་རྩ་ཚོགས་པའི་ཚོགས་གཙོ་སོགས་དང་མཇལ་འཕྲད་བཀའ་བསྡུར།

དེ་བཞིན་ལོ་ཤས་གོང་ནས་གསར་འཛུགས་བྱས་པའི་ཤྲི་ལང་ཀ་དང་བོད་ཀྱི་ནང་པའི་མཐུན་ཚོགས་ཀྱི་འཛིན་སྐྱོང་ཚོགས་མི་དང་ལས་བྱེད་རྣམས་དང་ལྷན་དུ་བཞུགས་མོལ་ཚོགས་འདུ་བཅས་གནང་སྟེ་མཛད་དོན་ཡོང་རྫོགས་ཐུགས་བློ་ཁེངས་ངེས་དང་། ཤྲཱི་ལང་ཀའི་སེར་སྐྱ་མང་ཚོགས་ཁྲོད་ནས་བོད་དང་བོད་མིའི་རྩ་དོན་ཐོག་སེམས་འཁུར་དང་འབད་བརྩོན་ཆེན་པོ་བྱེད་མཁན་ཇེ་མང་དུ་འགྲོ་བཞིན་པར་གཟིགས་ཏེ་སེམས་འགུལ་ཡང་ཆེན་པོ་ཐེབས་འདུག་པ་བཅས་ཀྱི་གནས་ཚུལ་དུ། །