༢༠༡༨ ཟླ་ ༤ ཚེས་ ༣ རེས་གཟའ་མིག་དམར།
༄༅། །ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོ་ལགས་དེང་སྐབས་ཨོ་གླིང་དུ་བདུན་ཕྲག་གཉིས་རིང་ཞུ་གཏུག་གི་ལས་འགུལ་སྤེལ་མུས་ཡིན་འདུག
དེ་ཡང་ཉི་མ་ལྷ་མོ་ལགས་ཀྱིས་ཨོ་སི་ཊོ་ལི་ཡའི་ University of Technology, Sydney སི་ཌི་ནི་འཕྲུལ་རིག་སློབ་གྲྭ་ཆེན་མོའི་ནང་དུ་ཞིང་གཤེགས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་མཆོག་ཐོག་མར་རྒྱ་ནག་གཞུང་གིས་འཛིན་བཟུང་བྱེད་སྟངས་དང་། བར་དུ་བཙོན་དུ་བཀག་བསྐྱིལ་བྱས་མཐར་དོགས་གཞི་ཧ་ཅང་ཆེ་བའི་གནས་སྟངས་འོག་རིན་པོ་ཆེ་མཆོག་སྐུ་གྲོངས་པའི་གནས་སྟངས་སོགས་ཞིབ་ཕྲ་ངོ་སྤྲོད་ཞུས་འདུག་པ་མ་ཟད། བོད་ནས་རྒྱ་གར་དུ་བཙན་བྱོལ་ཕེབས་སྐབས་རང་ཉིད་ལ་འཕྲད་པའི་དཀའ་སྡུག་ལ་གདོང་ལེན་ཇི་ལྟར་གནང་བའི་སྐོར་དང་།
ཁོང་མ་སྨད་གཉིས་ཀྱིས་རྒྱ་ནག་གཞུང་ལ་ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྐུ་ཕུང་ཚུར་བརྩི་སྤྲོད་དགོས་པའི་རེ་འདུན་བཏོན་པར་བརྟེན། རྒྱ་ནག་གཞུང་གིས་ཁོང་མ་སྨད་གཉིས་ལ་རྒྱལ་ཁབ་ཀྱི་གསང་བ་ཕྱིར་གྱར་གྱི་ཉེས་མིང་འོག་ཉིན་གྲངས་བཅོ་བརྒྱད་རིང་ཁྲིན་ཏུར་བཙོན་ཁང་དུ་འཛིན་བཟུང་བཀག་ཉར་གྱིས་སུན་གཙེར་དང་དྲི་རྩད་ཡང་ཡང་བྱས་ཡོད་པ་མ་ཟད། རྒྱ་གཞུང་གི་འགོ་ཁྲིད་ཚོས་ཁོང་མ་སྨད་གཉིས་བཙོན་ཁང་ནས་གློད་བཀྲོལ་གཏང་བར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྐོར་གནས་ཚུལ་བོད་དང་རྒྱ་ནག་ནང་བརྒྱུད་བསྒྲགས་བྱ་མི་ཆོག་པ་དང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་དུག་སྤྲད་ནས་སྐུ་བཀྲོངས་པ་རེད་ཅེས་རྒྱ་གཞུང་གི་འགོ་ཁྲིད་ཚོར་སྐྱོན་བརྗོད་བྱ་མི་ཆོག་པ། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་སྐུ་གྲོངས་པའི་སྐོར་རྒྱལ་ཁབ་ཀྱི་ཕྱི་ལོགས་དང་མི་མང་འདུ་འཛོམས་སར་གླེང་སློང་བྱ་མི་ཆོག ཅེས་ཆ་རྐྱེན་གསུམ་གྱི་སྟེང་མཚན་རྟགས་འགོད་དགོས་པ་བརྗོད་ཀྱང་ཁོང་མ་སྨད་གཉིས་ཀྱིས་མཚན་རྟགས་འགོད་རྒྱུའི་མོས་མཐུན་གནང་མེད་ཀྱང་གྲོང་སྡེའི་སྡེ་དཔོན་གྱིས་ཉི་མ་ལྷ་མོ་ལགས་དང་ཁོང་གི་ཨ་མ་གཉིས་ཀྱི་ཚབ་བྱས་ཏེ་ཡིག་ཆ་དེའི་སྟེང་མིང་རྟགས་བཀོད་ཡོད་སྐོར་སོགས་འབྲེལ་བརྗོད་གནང་ཡོད།
གཞན་ཡང་ཉི་མ་ལྷ་མོ་ལགས་ཀྱིས་མེལ་བྷོན་ Melbourne ས་གནས་སུ་རྒྱ་རིགས་རྣམས་ལ་གསུང་དོན། རྒྱ་གཞུང་གི་འགོ་ཁྲིད་མཁྲེགས་འཛིན་པ་ཁ་ཤས་ལ་བརྟེན་ནས་ད་ལྟ་བོད་ནང་གི་གནས་སྟངས་ཛ་དྲག་འོག་གནས་མུས་ཡིན་པ་དང་། དཔེར་ན། ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་བྱུང་བའི་གནས་ཚུལ་མང་པོ་ནང་ནས་གཅིག་རེད། ཅེས་གསུངས་ཡོད།
ཕྱི་ཟླ་ ༣ ཚེས་ ༣༡ ཉིན་མེལ་བྷོན་ Melbourne ནང་ཨོ་སི་ཊོ་ལི་ཡ་བོད་རིགས་མཐུན་ཚོགས་ཀྱི་ཚོགས་འདུ་ཉིན་གཉིས་རིང་ཚོགས་ཡོད་པ་དང་། ཚོགས་འདུའི་ཐོག་ཉི་མ་ལྷ་མོ་ལགས་ནས་ས་གནས་བོད་རིགས་དང་བོད་དོན་རྒྱབ་སྐྱོར་གནང་མཁན་ཡོངས་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་གཙོས་བོད་ནང་གི་འགྲོ་བ་མིའི་ཐོབ་ཐང་ཐོག་ཕྱག་ལས་གནང་དང་གནང་མུས་ཡིན་པ་བཅས་ལ་ཐུགས་རྗེ་ཆེ་ཞུས་ཡོད།
ཐེངས་འདིའི་ཚོགས་འདུ་གཙོ་སྐྱོང་གནང་མཁན་ཨོ་སི་ཊོ་ལི་ཡ་སྐུ་ཚབ་དོན་གཅོད་མཚོ་འགོ་ལྷག་པ་ལགས་དང་། རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སི་ཊོལ་ཨེ་ཤི་ཡའི་ཁུལ་གྱི་སྤྱི་འཐུས་གདོང་འདུས་སྐྱིད་འཛོམས་ལགས། བཀའ་ཟུར་དཔལ་འབྱོར་ཚེ་རིང་ལགས་བཅས་རེད།
ཉི་མ་ལྷ་མོ་ལགས་ཀྱིས་ཕྱི་ཚེ་ ༢༨ ཉིན་ཨོ་སི་ཊོ་ལི་ཡ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་ནང་ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་གཙོས་བོད་ནང་གི་འགྲོ་བ་མིའི་ཐོབ་ཐང་གི་སྐོར་ཞུ་གཏུག་གནང་ཡོད་པ་བཅས། །
