༢༠༡༨ ཟླ་ ༤ ཚེས་ ༥ རེས་གཟའ་ཕུར་བུ།

༄༅། །བཞུགས་སྒར་དྷརྨ་ཤཱ་ལར་རྟེན་གཞི་བྱས་པའི་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོང་དུ་ཨ་རིའི་གྲོས་ཚོགས་འོག་མའི་འཐུས་མི་ལྕམ་སྐུ་ཨེ་ལི་ཡེ་ན་ Ileana Ros-Lehtinen མཆོག་དང་ཀ་ལའོ་ཌིའོ་ཊེན་ནེ་ Claudia Tenney མཆོག་རྣམ་གཉིས་ལ་བོད་མིའི་སྒྲིག་འཛུགས་དང་བོད་མི་ཡོངས་ནས་དགའ་བསུའི་སྣེ་ལེན་གཟབ་རྒྱས་ཞུས་ཡོད།

 དེ་ཡང་ཕྱི་ལོ་ ༢༠༡༨ ཟླ་ ༤ ཚེས་ ༤ ནས་ ༦ བར་ཉིན་གསུམ་རིང་གཞུང་འབྲེལ་འཚམས་གཟིགས་སུ་ཕེབས་པའི་ཨ་རིའི་གྲོས་ཚོགས་འཐུས་མི་སོགས་ཕྱི་ཚེས་ ༤ ཉིན་གྱི་ཕྱེད་ཡོལ་ཆུ་ཚོད་ ༤ ཐོག་རྡ་ས་གངས་སྐྱིད་ཐང་སྟེང་ཁང་རྩེག་གསར་པའི་རྩེ་ཐོག་ཚོགས་ཁང་ནང་བོད་མིའི་སྒྲིག་འཛུགས་ཀྱི་མང་གཙོའིི་ཀ་བ་གསུམ་གྱི་མཛད་གཙོ་རྣམ་པས་དབུས་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་འཐུས་མི་དང་། སྲི་ཞུའི་ལས་བྱེད་བཅས་ཚང་འཛོམས་ཐོག་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཐོག་མར་ཨ་རིའི་གཞུང་མང་གཉིས་དང་། ལྷག་པར་ཨ་རིའི་གྲོས་ཚོགས་གོང་འོག་གི་སྤྱི་མཐུན་དང་མང་གཙོ་ཚོགས་པ་བཅས་ཆབ་སྲིད་ཚོགས་པ་གཉིས་ཀས་ད་བར་མ་གྲོས་བསམ་པ་གཅིག་མཐུན་ཐོག་ནས་བོད་དང་བོད་མིར་གདུང་སེམས་མཉམ་སྐྱེའི་རྒྱབ་སྐྱོར་ཤུགས་ཆེ་གནང་དང་གནང་མུས་ལ་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་སྙིང་ཁོང་རུས་པའི་གཏིང་ནས་ཐུགས་རྗེ་ཆེ་ཞུས་པ་དང་སྦྲགས། ཐེངས་འདིར་ཨ་རིའི་གྲོས་ཚོགས་འཐུས་མི་གཉིས་ཆེད་མངགས་དྷརྨ་ཤཱ་ལར་འཚམས་གཟིགས་སུ་ཕེབས་པ་དེས་རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་འོག་དཀའ་སྡུག་ཧ་ཅང་མྱོང་བཞིན་པའི་གཞིས་འཁོད་བོད་མི་རྣམས་ཀྱི་བདེན་པའི་འཐབ་རྩོད་ལ་གདུང་སེམས་མཉམ་སྐྱེ་མཚོན་ཐུབ་སྐོར་དང་། 

དེ་བཞིན་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ལས་དོན་བྱེད་ཕྱོགས་དང་། བཙན་བྱོལ་བོད་མིའི་མང་གཙོའི་འཕེལ་རིམ་དང་ལས་དོན་རྒྱུན་སྐྱོང་།  ལྷག་པར་རྩིས་ཞིབ་ལས་ཁུངས་ཀྱིས་བོད་མིའི་སྒྲིག་འཛུགས་ཀྱི་རྩིས་ཞིབ་དང་འབྲེལ་བའི་ལས་དོན་ཆེ་ཕྲ་ཇི་འདྲ་ཡིན་རུང་དྲང་པོ་དྲང་གཞག་དང་ཕྱི་གསལ་ནང་གསལ་གནང་བ་སོགས་ལ་བརྟེན་གཞུང་གི་ལས་དོན་གང་ཅིར་ལྐོག་ཟ་རུལ་སུངས་རྩ་བ་ནས་མེད་པའི་གནས་སྟངས་གདེང་སྤོབས་ཆེན་པོས་གསལ་བཤད་གནང་། 

ཕྱོགས་མཚུངས་ཕྱི་ལོ་ ༢༠༡༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱུང་བའི་འགོ་ཁྲིད་ལ་རྩིས་སྤྲོད་མཛད་པའི་བརྒྱུད་རིམ་དང་། གཉིས་སྨན་དབུ་མའི་ལམ་གྱི་སྲིད་བྱུས་དང་བོད་ནང་གི་ཛ་དྲག་གནས་སྐོར། ཉེ་ཆར་བོད་མིའི་སྒྲིག་འཛུགས་ནས་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འགུལ་སྤེལ་བ་སོགས་གསུངས། 

སྐབས་དེར་གྲོས་ཚོགས་འཐུས་མི་ལྕམ་སྐུ་ཨེ་ལི་ཡེ་ན་ Ileana Ros-Lehniten མཆོག་གིས་ཨ་རིའི་གྲོས་ཚོགས་ནས་བོད་ཀྱི་གནད་དོན་རྒྱུས་མངའ་ཧ་ཅང་ཡོད་མུས་ཐོག་བོད་མིའི་སྒྲིག་འཛུགས་དང་དེ་བཞིན་འབྲེལ་ཡོད་གཞུང་འབྲེལ་མིན་པའི་བོད་མིའི་ཚོགས་སྡེ་ཁག་དང་ལྷན་མཉམ་རུབ་ཐོག་ལས་ཀ་བྱེད་བཞིན་པ་མ་ཟད། ཨ་རིའི་གྲོས་ཚོགས་ནང་བོད་དང་བོད་མིར་དམིགས་པའི་བཟང་ཕྱོགས་ཀྱི་སྲིད་བྱུས་གཏན་འབེབས་ཡོང་ཐབས་བྱེད་བཞིན་ཡོད་སྐོར་དང་། 

སྤྱིར་ལྕམ་སྐུ་རང་ཉིད་ལྷོ་ཨ་རི་གླིང་ཆེན་གྱི་ཁུ་བྷ་ Cuba ཞེས་པའི་ཡུལ་ནང་འཁྲུངས་པར་བརྟེན་རང་ཉིད་ཆུང་བྱིས་པའི་དུས་ནང་མི་དང་ལྷན་དམར་ཤོག་རིང་ལུགས་འོག་དཀའ་སྡུག་ཇི་འདྲ་མྱངས་པའི་ཉམས་མྱོང་གཞི་ལ་བཞག་སྟེ་བོད་མི་ཚོའང་རྒྱ་ནག་དམར་ཤོག་དབང་སྒྱུར་འོག་དཀའ་སྡུག་ཇི་འདྲ་འཕྲད་དང་འཕྲད་བཞིན་པར་གདུང་སེམས་མཉམ་སྐྱེ་བྱེད་ཐུབ་བཞིན་ཡོད་སྐོར་གསུང་དོན།  ཉམས་མྱོང་དེ་དག་ལ་བརྟེན་ནས་ངའི་མི་ཚེའི་ནང་གི་ལས་དོན་གལ་འགངས་ཆེ་ཤོས་གཅིག་ནི་གདུག་རྩུབ་ཅན་གྱི་སྲིད་གཞུང་དེ་དག་ལ་མཐའ་གཅིག་ཏུ་གདོང་ལེན་བྱ་རྒྱུ་དེ་ཡིན།  ཞེས་གསུངས།

དེ་བཞིན་ཁོང་གིས་བོད་ནང་རྒྱ་ནག་གཞུང་གིས་བོད་མིའི་ཐོག་འགྲུལ་བཞུད་ཀྱི་རང་དབང་ཐོག་དམ་བསྒྲགས་ཚོད་འཛིན་བྱེད་བཞིན་པ་མ་ཟད། བོད་ནང་གི་བོད་མི་ཚོར་རོགས་རམ་བྱེད་འདོད་ཡོད་མཁན་ཨ་རིའི་མི་སེར་ཚོ་ལའང་རྒྱ་ནག་གཞུང་གིས་བོད་ནང་སྐྱོད་རྒྱུར་དམ་བསྒྲགས་བྱེད་བཞིན་ཡོད་པ་དེར་སྐྱོན་བརྗོད་ཤུགས་ཆེ་གནང་བ་དང་སྦྲགས།

རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་སྐད་ཡིག་དང་བཅས་པར་དམ་བསྒྲགས་ཤུགས་ཆེ་བྱས་པ་མ་ཟད། བོད་མིའི་དགོན་སྡེ་གྲྭ་ཚང་སོགས་ནང་བོད་བརྒྱུད་ནང་བསྟན་གྱི་སློབ་གཉེར་བྱེད་སྟངས་སོགས་ཀྱི་ཐད་ལའང་དམ་བསྒྲགས་བྱེད་བཞིན་པའི་ཁར་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་སྤྱི་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གི་༸སྐུའི་ཡང་སྲིད་ངོས་འཛིན་ཞུ་ཕྱོགས་ཐད་ཇུས་གཏོགས་བྱེད་བཞིན་པའི་བྱ་སྤྱོད་དེ་དག་ནི་ཧ་ཅང་རྒྱུ་མཚན་མི་ལྡན་ཞིང་། བོད་མིའི་སེམས་ཁམས་སུ་རྨ་ཁ་བཟོ་གཞི་ལས་མ་འདས་ཚུལ་དང་།  དེ་བཞིན་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་ལ་ཨ་རིའི་གྲོས་ཚོགས་ཀྱིས་གསེར་གྱི་རྟགས་མ་འབུལ་ལམ་ཞུས་པ་དྲན་གསོ་དང་འབྲེལ་གཟེངས་རྟགས་དེས་ཨ་རིའི་གཞུང་མང་གིས་བོད་དང་བོད་མིའི་འཐབ་རྩོད་ལ་རྒྱབ་སྐྱོར་ཇི་ཙམ་ཡོད་པ་གསལ་འདོན་གནང་ཡོད་སྐོར་གསུངས།

དེ་བཞིན་ལྕམ་སྐུ་མཆོག་གིས་རྒྱ་ནག་གཞུང་གིས་༸གོང་ས་མཆོག་དང་ལྷན་བོད་ཀྱི་གནད་དོན་གསལ་ཆེད་འབྲེལ་མོལ་རྒྱུན་སྐྱོང་ཞུ་དགོས་པ་དང་། བོད་མི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་དགོས་པའི་རེ་འདུན་དོན་འཁྱོལ་ཡོང་སླད་ཨ་རིའི་གྲོས་ཚོགས་ནང་ཁྲིམས་འཆར་གདོན་རྒྱུ་ཡིན་པ་མ་ཟད།  ཨ་རིའི་བོད་དོན་དམིགས་བསལ་འབྲེལ་མཐུད་པ་གང་མགྱོགས་བསྐོ་གཞག་ཡོང་ཐབས་སླད་འབད་བརྩོན་གནང་རྒྱུའི་ཁས་ལེན་ཡང་གནང་བ་དང་། དེ་སྔ་ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་Jim McGovern མཆོག་གིས་ཨར་རྒྱ་ཡུལ་གཉིས་དབར་གོ་སྐབས་འདྲ་མཉམ་བརྗེ་ལེན་དགོས་པའི་ཆ་རྐྱེན་བསྐྲུན་དགོས་པའི་ཁྲིམས་འཆར་དེ་གཏན་འབེབས་ཡོང་ཆེད་ལྕམ་སྐུ་མཆོག་གིས་མུ་མཐུད་འབད་བརྩོན་གནང་རྒྱུ་ཡིན་སྐོར་གསུངས།  

དེ་རྗེས་གྲོས་ཚོགས་འཐུས་མི་ལྕམ་སྐུ་ཀ་ལའོ་ཌིའོ་ཊེན་ནེ་Claudia Tenney མཆོག་གིས་དཔའ་ངར་ལྡན་པའི་བོད་མིའི་འཚེ་མེད་ཞི་བའི་འཐབ་རྩོད་ཀྱི་བྱས་རྗེས་ལ་བསྔགས་བརྗོད་དང་ལྷན། མི་རབས་གཞོན་པ་ཚོས་ཀྱང་སྙིང་སྟོབས་ཞུམ་པ་མེད་པའི་ཐོག་ནས་འཐབ་རྩོད་རྒྱུན་སྐྱོང་འོག་གཞི་རྩའི་འགྲོ་བ་མིའི་ཆེ་མཐོང་དང་འདྲ་མཉམ། རང་དབང་སོགས་ཐོབ་ཐབས་ལ་བརྩོན་དགོས་པ་མ་ཟད། ལྕམ་སྐུ་མཆོག་ནས་རང་ནུས་གང་ཡོད་ཐོག་ཨ་རིའི་གྲོས་ཚོགས་ནང་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུ་ཡིན་སྐོར་ཁས་ལེན་ཡང་གནང་འདུག  མཛད་སྒོ་གྲུབ་མཚམས་བོད་མི་མང་སྤྱི་འཐུས་ལྷན་ཁང་དུ་འཚམས་གཟིགས་སུ་ཕེབས་གནང་ཡོད། །