༢༠༡༨ ཟླ་ ༤ ཚེས་ ༢༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༨ ཟླ་ ༤ ཚེས་ ༢༣ རེས་གཟའ་ཟླ་བའི་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་རྒྱལ་ས་ལྡི་ལིའི་ཌབཱར་ཀ་ Dwarka ས་གནས་སུ་ཡོད་པའི་ལཱལ་བྷ་ཧཱ་དུར་ཤཱསྟྲི་འཛིན་སྐྱོང་བསྟི་གནས་ཁང་ Lal Bahadur Shastri Institute of Management གི་ལོ་འཁོར་བསླབ་པ་མཐར་སོན་གྱི་མཛད་སྒོའི་སྐུ་མགྲོན་གཙོ་བོར་ཆིབས་སྒྱུར་བསྐྱངས་ཏེ་བཀའ་སློབ་སྩལ་ཡོད།
སྐབས་དེར་༸གོང་ས་མཆོག་སྐུ་སྒེར་ཐོག་ནས་དེ་སྔའི་རྒྱ་གར་གྱི་སྲིད་བློན་ཟུར་པ་སྐུ་ཞབས་ལཱལ་བྷ་ཧཱ་དུར་ཤཱསྟྲི་དམ་པ་མཆོག་དང་ཐུགས་འདྲིས་ཧ་ཅང་ཡོད་པ་དང་། གལ་ཏེ་དམ་པ་ཁོང་སྐུ་ཚེ་ཡུན་རིང་ཙམ་བཞུགས་ཡོད་ཚེ་བཟང་ཕྱོགས་ཀྱི་འགྱུར་བ་རླབས་ཆེན་ཞིག་འགྲོ་སྲིད་པ་དང་། ༸གོང་ས་མཆོག་གིས་རྒྱ་གར་སྲོལ་རྒྱུན་སེམས་ཁམས་རིག་པ་གཙོ་བོར་གྱུར་བའི་ལེགས་བཤད་ལ་ཡི་རང་བསྔགས་བརྗོད་རྒྱ་ཆེ་མཛད་དོན། རྒྱ་གར་ཡུལ་འདི་ནི་འཛམ་གླིང་མི་འབོར་མང་ཤོས་ཀྱི་མང་གཙོའི་རྒྱལ་ཁབ་ཞིག་ཡིན་པའི་ཁར་ཆོས་ལུགས་འདྲ་མིན་དེ་དག་འཆམ་མཐུན་ངང་གནས་བཞིན་ཡོད། འདི་ནི་འཛམ་གླིང་གཞན་ལ་མིག་དཔེར་འོས་པ་ཞིག་ཆགས་ཡོད།
རྒྱ་གར་གནའ་རབས་སྲོལ་རྒྱུན་ནང་གཙོ་བོ་ནང་གི་གཤིས་རྒྱུད་དང་འབྲེལ་བའི་ཡོན་ཏན་གོང་མཐོར་གཏོང་ཐབས་ཆེད་འབད་བརྩོན་ཤུགས་ཆེ་གནང་ཡོད། ལོ་ངོ་ ༣༠༠༠ ཙམ་གྱི་རིང་རྒྱ་གར་གྱི་ལྟ་གྲུབ་སྨྲ་བའི་མཁས་པ་དེ་དག་གིས་བློའི་རྣམ་གཞག་དང་བྱེད་ལས། ཉོན་མོངས་པའི་བློར་གཉེན་པོ་སྟོན་ཕྱོགས་སོགས་བརྡར་ཤ་གཅོད་ནས་བསམ་བློའི་ཚན་རིག་གི་གནས་ཚད་ཧ་ཅང་ཚད་མཐོན་པོར་སོན་ཐུབ་ཡོད།
སྟོན་པ་ཤཱཀྱ་ཐུབ་པས་བདག་མེད་པའི་ལྟ་བ་གཏན་ལ་ཕབ་ཡོད། སྐབས་དེར་རྒྱ་གར་ནང་བདག་འདོད་མཁན་དང་མི་འདོད་མཁན་དབར་རྩོད་པ་ཤུགས་ཆེ་ཡོད། དེང་སྐབས་ང་ཚོར་རེ་དོགས་ཀྱི་རྣམ་རྟོག་སོགས་ལ་བརྟེན་ནས་སེམས་འཁྲུག་པ་དང་། དེ་ལ་བརྟེན་ནས་ཆགས་སྡང་གི་བློ་སྐྱེས་ཏེ་རྙོག་གྲ་ཚང་མ་དེ་ནས་ཡོང་བཞིན་ཡོད། དེར་བརྟེན་རྙོག་གྲ་བཟོ་མཁན་གཙོ་བོ་ཉོན་མོངས་པའི་བློ་དེ་དག་རེད། ཆུང་ཁྱིམ་ཚང་གཅིག་ནས་ཆེ་ས་རྒྱལ་ཁབ་དང་འཛམ་གླིང་སྤྱིའི་དཀའ་ངལ་དེ་དག་རྩ་བ་ཐུག་ས་མིའི་ཉོན་མོངས་པའི་བློ་དེ་དག་ལ་བརྟེན་ནས་ཡོང་བཞིན་ཡོད། དེར་བརྟེན་དཀའ་ངལ་དེ་དག་སེལ་རྒྱུར་རྒྱ་གར་སྲོལ་རྒྱུན་བློའི་རྣམ་གཞག་དང་བྱེད་ལས་སྐོར་གྱི་ལེགས་བཤད་དེ་དག་ཧ་ཅང་འབྲེལ་བ་ཆེན་པོ་ཆགས་ཡོད།
དེ་རིང་སློབ་ཕྲུག་ཁྱེད་རང་ཚོས་བསླབ་པ་མཐར་སོན་ནས་འབུམ་རམས་པའི་ལག་འཁྱེར་ཐོབ་ཀྱང་མི་ཡིན་ཕྱིན་སེམས་ཚོར་ལྡན་ཡོད། དེར་བརྟེན་དེང་དུས་ཤེས་ཡོན་རྐྱང་པས་མ་ཆོག་པར་རྒྱ་གར་རང་གི་གནའ་རབས་ཀྱི་ལེགས་བཤད་དེ་དག་ལའང་ངེས་པར་དུ་དོ་སྣང་སྤྲོད་དགོས། དེང་དུས་ཤེས་ཡོན་རྐྱང་པས་སེམས་ཞི་བདེ་བག་ཕེབས་ལྡན་པ་ཞིག་ཡོང་ཐབས་མེད། དེང་དུས་ཤེས་ཡོན་དང་ལྷག་པར་འཕྲུལ་རིག་གི་ཤེས་བྱ་དེ་དག་ཐོག་བློའི་རྣམ་གཞག་དང་བྱེད་ལས་སོོགས་ལ་དོ་སྣང་སྤྲོད་དགོས། དེ་འདྲ་བྱུང་ན་འཛམ་གླིང་བདེ་ཞིང་སྐྱིད་པ་ཞིག་ཡོང་ཐུབ། འགན་འདི་རྒྱ་གར་བ་གཞོན་སྐྱེས་ཁྱེད་ཚོར་ཡོད།
ཚན་རིག་པས་བརྟག་དཔྱད་ལམ་ནས་མིའི་ལྷན་སྐྱེས་རང་བཞིན་བྱམས་བརྩེ་ལྡན་པ་ཡིན་པ་ར་འཕྲོད་ཐུབ་ཡོད། བྱམས་བརྩེ་གཙོ་བོ་མ་ལས་ཡོང་བཞིན་ཡོད། ཉོན་མོངས་པའི་བློ་དཔེར་ན། ཁོང་ཁྲོ་སོགས་སྐྱེ་སྐབས་དེར་གཉེན་པོ་བསྟེན་ནས་ཁོང་ཁྲོ་ཞི་ཐབས་བྱེད་དགོས། ཞེས་སོགས་ཀྱི་བཀའ་སློབ་སྩལ་རྗེས་རྒྱ་གར་གྱི་སྲིད་བློན་ཟུར་པ་སྐུ་ཞབས་ལཱལ་བྷ་ཧཱ་དུར་ཤཱསྟྲི་དམ་པ་མཆོག་གི་སྲས་སྐུ་ཞབས་ཨ་ནིལ་ཤཱསྟྲི་ལགས་ཀྱིས་ཐུགས་རྗེ་ཞུའི་གསུང་བཤད་གནང་།
སང་ཉིན་༸གོང་ས་མཆོག་གིས་རྒྱ་གར་འཕྲུལ་རིག་བསྟི་གནས་ཁང་དུ་ IIT Delhi Auditorium རྒྱ་གར་གནའ་རབས་སྲོལ་རྒྱུན་གྱི་ལེགས་སྦྱང་སླར་གསོའི་དགོས་མཁོའི་སྐོར་བཀའ་སློབ་སྩལ་གནང་མཛད་རྒྱུ་ཡིན་འདུག །
