༢༠༡༨ ཟླ་ ༤ ཚེས་ ༢༤ རེས་གཟའ་མིག་དམར།
༄༅། །ཉི་ཧོང་སྐུ་ཚབ་དོན་གཅོད་ཁང་གི་གོ་སྒྲིག་འོག་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་སེར་བྱེས་མཁས་སྙན་གྲྭ་ཚང་གི་དགེ་འདུན་པས་འཛམ་གླིང་ཞི་བདེ་དང་འཆམ་མཐུན་ཡོང་སླད་ཉིན་གྲངས་ ༡༢ རིང་ཉི་ཧོང་ནང་བོད་ཀྱི་དུས་སྟོན་སྲུང་བརྩི་ཞུས་འདུག
དེ་ཡང་ཕྱི་ལོ་ ༢༠༡༨ ཟླ་ ༤ ཚེས་ ༢༠ ཉིན་གྷོ་གྷོ་ཀུ་ཅི་ Gokokuji དགོན་པར་དུས་སྟོན་དབུ་འབྱེད་ཀྱི་མཛད་སྒོར་ཉི་ཧོང་བ་བརྒྱ་ཕྲག་བརྒལ་བ་ལྷན་འཛོམས་ཐོག་བྱ་དོ་རིན་པོ་ཆེ་མཆོག་གིས་ཉི་ཧོང་དང་བོད་གཉིས་ནི་ལོ་ངོ་བརྒྱ་ཕྲག་རིང་ནས་ཆོས་ཕྱོགས་ཀྱི་འབྲེལ་བ་ཡོད་པ་དང་། འདས་པའི་ལོ་མང་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་ནང་ཆིབས་སྒྱུར་བསྐྱངས་པ། ཉི་ཧོང་ནས་བོད་མིར་ཡུན་རིང་རྒྱབ་སྐྱོར་གནང་བར་ཐུགས་རྗེ་ཆེ་གསུང་པ་མ་ཟད། གྷོ་གྷོ་ཀུ་ཅི་དགོན་པས་བོད་ཀྱི་དུས་སྟོན་སྲུང་བརྩི་ཞུ་སླད་མཐུན་འགྱུར་གནང་བར་བཀའ་དྲིན་ཆེ་གསུང་པ་དང་ལྷན་མ་འོངས་པར་བོད་དོན་ཐོག་མུ་མཐུད་རྒྱབ་སྐྱོར་ཡོང་བའི་རེ་འདུན་ཡང་གནང་འདུག
སྐབས་དེར་ཉི་ཧོང་བོད་ཀྱི་སྐུ་ཚབ་དོན་གཅོད་ལུང་རྟོགས་ལགས་ཀྱིས་གྷོ་གྷོ་ཀུ་ཅི་དགོན་པས་མཐུན་འགྱུར་འོག་བོད་ཀྱི་དུས་སྟོན་སྲུང་བརྩི་ཞུས་ཐུབ་པར་ཐུགས་རྗེ་ཆེ་ཞུས་པ་ཆབས་ཅིག་ཉི་ཧོང་མི་མང་ནས་བོད་ཀྱི་ལེགས་སྦྱང་དང་། སྐད་ཡིག ནང་ཆོས་བཅས་ལ་ཐུགས་སྣང་གནང་བར་བསྔགས་བརྗོད་ཀྱང་གནང་འདུག
ཉིན་གྲངས་གསུམ་རིང་གྷོ་གྷོ་ཀུ་ཅི་དགོན་པར་བོད་ཀྱི་དུས་སྟོན་སྲུང་བརྩི་ཞུ་སྐབས་བོད་བརྒྱུད་ནང་བསྟན་གྱི་རྡུལ་ཚོན་དཀྱིལ་འཁོར་བཞེངས་སྟངས་དང་། གར་འཆམ་འཁྲབ་སྟོན། མོ། སྒོམ་སྒྲུབ་ཉམས་ལེན་སོགས་ཀྱི་སྐོར་ངོ་སྤྲོད་གནང་འདུག་པ་མ་ཟད། བྱ་དོ་རིན་པོ་ཆེ་མཆོག་གིས་རྟ་མགྲིན་གི་རྗེས་གནང་ཡང་གནང་ཡོད་འདུག
དེ་ཡང་རྗེས་གནང་སྐབས་དོན་གཉེར་བ་བརྒྱ་ཕྲག་བརྒལ་བའི་ཁྲོད་རིན་པོ་ཆེ་མཆོག་གིས་ནང་ཆོས་ཀྱི་སྙིང་པོ་ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པ་ཡིན་སྐོར་སོགས་ངོ་སྤྲོད་གནང་ནས་ཆོས་འབྲེལ་ལེགས་པར་མཇུག་སྒྲིལ། དེ་ཡང་ཉིན་གསུམ་གྱི་དུས་སྟོན་མཛད་སྒོའི་ཐོག་ཉི་ཧོང་དང་བླངས་པ་ཁག་གཅིག་དང་བོད་མི་བཅས་ཀྱིས་ལས་དོན་གང་ཅིར་གཞོགས་འདེགས་རྒྱ་ཆེ་གནང་།
བོད་ཀྱི་དུས་སྟོན་སྲུང་བརྩི་ཞུས་རྗེས་བྱ་དོ་རིན་པོ་ཆེས་དབུ་ཁྲིད་པའི་སེར་བྱེས་མཁས་སྙན་གྲྭ་ཚང་གི་དགེ་འདུན་པ་རྣམས་སྐུ་ཚབ་དོན་ཁང་དུ་ཕེབས་ཏེ་སྨོན་ལམ་གསུང་འདོན་གནང་བ་དང་སྦྲགས། སེར་བྱེས་མཁས་སྙན་གྲྭ་ཚང་གིས་བོད་ནས་གསར་དུ་ཕེབས་པའི་བོད་པའི་དགེ་འདུན་པ་རྣམས་དང་ཧི་མ་ལ་ཡ་རི་རྒྱུད་ཀྱི་སློབ་གཉེར་བ་རྣམས་ལ་མཐུན་འགྱུར་རོགས་རམ་ཇི་ལྟར་གནང་བཞིན་པའི་སྐོར་ངོ་སྤྲོད་གནང་འདུག
གཞན་ཡང་ཕྱི་ཚེས་ ༢༨ ནས་ཕྱི་ཟླ་ ༥ ཚེས་ ༦ བར་ Aida Mitsuo Museum ཞེས་པའི་འགྲེམས་སྟོན་ཁང་དུའང་བོད་ཀྱིདུས་སྟོན་སྲུང་བརྩི་ཞུ་རྒྱུ་ཡིན་འདུག་པ་བཅས།།
