༢༠༡༨ ཟླ་ ༤ ཚེས་ ༣ རེས་གཟའ་མིག་དམར།
༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༣ ཚེས་ ༣༡ ཉིན་བྱང་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ནས་ནིའུ་ཡོག་གྲོང་སྟོད་དུ་ཆགས་པའི་རོ་ཆ་སི་ཊར་ The University of Rochester གཙུག་ལག་སློབ་གྲྭ་ཆེན་མོའི་དགེ་སློབ་ཁག་ཅིག་ལ་ “འཚེ་མེད་ཞི་བ་དང་། བོད་དོན་འཐབ་རྩོད་ ” ཅེས་པའི་བརྗོད་གཞིའི་ཐོག་གསུང་བཤད་དང་བགྲོ་གླེང་གནང་ཡོད།
བོད་དོན་སྐོར་གྱི་བགྲོ་གླེང་ཚོགས་འདུ་དེར་སློབ་གྲྭའི་དགེ་རྒན་དང་། སློབ་ཕྲུག་གྲངས་ ༧༠ ཙམ་མཉམ་ཞུགས་གནང་ཡོད་པ་དང་། མཉམ་ཞུགས་གནང་མཁན་མང་ཆེ་བ་རྒྱ་རིགས་སློབ་ཕྲུག་ཡིན་ཞིང་། བགྲོ་གླེང་ཚོགས་འདུ་གོ་སྒྲིག་བྱེད་མཁན་ནི་བོད་དོན་ལ་རྒྱབ་སྐྱོར་གནང་མཁན་ཀོ་རི་ཡ་མི་རིགས་ཡིན་པའི་སློབ་གྲྭ་དེའི་སློབ་མ་ Se Hoon Kim ཡིན་པ་དང་། ཁོང་ལ་ཕྱག་རོགས་གནང་མཁན་ནི་སློབ་གྲ་དེའི་དགེ་རྒན་ཆེན་མོ་གཉིས་དང་། རོ་ཆ་སི་ཌར་ Rochester གྲོང་ཁྱེར་དུ་ཆགས་པའི་གྷན་དི་འཚེ་མེད་ཞི་བའི་སྟི་གནས་ཁང་ Gandhi Institute for Nonviolence ཡིན་འདུག
རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ནས་སློབ་ཕྲུག་རྣམས་ལ་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་མི་རྣམས་ཕྱི་ལོ་ ༡༩༥༩ ལོར་བཙན་བྱོལ་དུ་༸ཞབས་སོར་འཁོད་ནས་དུས་ད་ལྟ་འཚེ་མེད་ཞི་བའི་ཐབས་ལམ་འབའ་ཞིག་ལ་བརྟེན་ནས་བོད་དོན་འཐབ་རྩོད་རྒྱུན་སྐྱོང་གནང་བཞིན་པའི་རྒྱུ་མཚན་གང་ཡིན་སྐོར་དང་། ༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་གསུམ་གྱི་སྐོར། དེ་བཞིན་བོད་འདི་ལོ་རྒྱུས་ཐོག་རང་དབང་རང་བཙན་གཙང་མའི་རྒྱལ་ཁབ་ཅིག་ཡིན་ཡང་། བོད་མིའི་སྒྲིག་འཛུགས་ཀྱིས་བོད་རྒྱ་གཉིས་སྨན་གྱི་དབུ་མའི་ལམ་གྱི་སྲིད་བྱུས་འཛིན་བཞིན་ཡོད་པ་དང་། སྲིད་བྱུས་དེའི་བྱུང་རིམ་དང་ནང་དོན་བཅས་ཀྱི་སྐོར་ལ་ཆུ་ཚོད་གཅིག་ཙམ་རིང་གསུང་བཤད་གནང་།
དེ་ནས་བགྲོ་གླེང་ཆུ་ཚོད་གཅིག་རིང་གནང་སྐབས་རྒྱ་རིགས་སློབ་ཕྲུག་རྣམས་ཀྱིས། ༡༩༥༩ ལོར་བོད་མི་སྐྱ་སེར་ཕོ་མོ་དབྱེ་བ་མེད་པས་རྒྱ་ནག་གཞུང་གི་དབང་སྒྱུར་ལ་ངོ་རྒོལ་རྔམ་སྟོན་བྱས་པའི་སྐོར་དང་། དབུ་མའི་ལམ་གྱི་སྲིད་བྱུས་དང་དེར་རྒྱ་ནག་གཞུང་གི་ལྟ་ཕྱོགས། ༸རྒྱལ་བའི་ཡང་སྲིད། བོད་མིའི་རང་ལུས་མེར་སྲེག བོད་མིའི་ཕྱོགས་ནས་ཐབས་ཤས་ཡོད་རྒུ་སྩལ་དཀྲུག་ཐོག་རྒྱ་ནག་གཞུང་དང་འབྲེལ་བ་གནང་བཞིན་ཡོད་པ་སོགས་ཀྱི་སྐོར་དྲི་བ་མང་པོ་ཞིག་བཏོན་པ་རྣམས་ལ་རྒྱ་རིགས་འབྲེལ་མཐུད་པས་ལན་འདེབས་གསལ་བཤད་མཐིལ་ཕྱིན་པ་གནང་བ་མ་ཟད། ཚོགས་འདུ་གྲོལ་རྗེས་སློབ་ཕྲུག་ཁག་ཅིག་གིས་རྒྱ་རིགས་འབྲེལ་མཐུད་པ་དང་ལྷན་མུ་མཐུད་བོད་དོན་ཐོག་བསམ་ཚུལ་བརྗེ་ལེན་བྱས་ཏེ་ཆུ་ཚུད་ ༩ ཐོག་བགྲོ་གླེང་ཚོགས་འདུ་མཇུག་སྒྲིལ་འདུག བོད་པའི་བུད་མེད་སློབ་མ་གཉིས་ཀྱང་བགྲོ་གླེང་ཚོགས་འདུར་ཕེབས་ཡོད་འདུག
རྒྱ་གར་སློབ་ཕྲུག
ཚོགས་འདུ་གྲོལ་ཚར་རྗེས་རྒྱ་རིགས་སློབ་ཕྲུག་ཁག་ཅིག་གིས་རྒྱ་རིགས་འབྲེལ་མཐུད་པར་གློག་འཕྲིན་བརྒྱུད་ཐེངས་འདིའི་བགྲོ་གླེང་ནང་གནས་ཚུལ་མང་པོ་ཤེས་རྟོགས་བྱུང་བ་སོགས་མདོར་ན་བགྲོ་གླེང་ལས་རིམ་དེས་ཕན་ཐོགས་ཧ་ཅང་བྱུང་སྐོར་དང་མཐོ་སློབ་ཏུ་ཆེད་ཕེབས་ཀྱིས་བགྲོ་གླེང་གནང་བར་ཐུགས་རྗེ་ཡང་ཆེ་ཞུས་འདུག
ཕྱི་ཚེས་ ༣༡ སྔ་དྲོ་སྦ་ཕེ་ལོ་མཐོ་སློབ་ University at Buffalo ཀྱི་རྒྱ་གར་སློབ་མ་བཅུ་གཉིས་དང་རྒྱ་རིགས་འབྲེལ་མཐུད་པ་ཐུག་འཕྲད་སྐབས་རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ནས་གསུང་དོན། རྒྱ་གར་འཕགས་པའི་ཡུལ་གྱི་མི་རྣམས་དང་ང་ཚོ་གངས་ཅན་པའི་དབར་གྱི་འབྲེལ་བ་ནི་བྱང་ཆུབ་ལྗོན་ཤིང་དང་ལྗོན་ཤིང་གི་ལོ་མ་ལྟ་བུ་ཡིན་པས་དེ་རིང་མཛེས་སྡུག་ལྡན་པའི་གྲོང་ཁྱེར་ཆུང་ཆུང་ Rochester ནང་ཁྱེད་རྣམས་མཇལ་བར་ཧ་ཅང་གི་དགའ་པོ་བྱུང་།
དེ་རིང་བོད་མིའི་སྒྲིག་འཛུགས་ཀྱི་བཀའ་ཤག་ནས་བཞུགས་སྒར་དྷརྨ་ཤ་ལར་༸གོང་ས་༸སྐྱབས་མགོན་ཆེན་པོ་མཆོག་དང་རྒྱ་གར་དབུས་གཞུང་གི་དཔོན་རིགས་ལྷན་ཞུགས་ཡོད་པའི་<<རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་>> མཛད་སྒོ་ཚོགས་པའི་ཉིན་མོ་ཡིན་པ་ལྟར། ངས་ཀྱང་ཁྱེད་རྣམ་པར་དེ་རིང་གི་གོ་སྐབས་འདི་བརྒྱུད་རྒྱ་གར་གཞུང་མང་གཉིས་ཀྱི་བཀའ་དྲིན་བསམ་ཤེས་ཐོག་བཅོས་མིན་གྱི་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས། རྒྱ་གར་སློབ་ཕྲུག་ཚོས་ཀྱང་གཞས་སྣ་འཁྲབ་སྟོན་གནང་ཡོད་པ་བཅས།།
