༢༠༡༨ ཟླ་ ༤ ཚེས་ ༢༧ རེས་གཟའ་པ་སངས།

༄༅། །ཕྱི་ལོ་ ༢༠༡༨ ཟླ་ ༤ ཚེས་ ༢༧ རེས་གཟའ་པ་སངས་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བཀའ་ཤག་གི་ཚོགས་ཁང་ནང་བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་རྒྱའི་གནས་ཚུལ་རྣམས་ལག་ཐོག་ཁ་པར་ཐོག་ལྟ་ཀློག་ཐུབ་ཆེད་བཀོལ་སྤྱོད་མཉེན་ཆས་ Tibet.net App གསར་པ་དབུ་འབྱེད་དང་། ཕྱི་དྲིལ་བོད་ཀྱི་བརྙན་འཕྲིན་ཚན་པས་བཙན་བྱོལ་ནང་གི་བོད་མི་གློག་བརྙན་བཟོ་ལས་པ་ཚོའི་སྒྱུ་རྩལ་གོང་འཕེལ་ཆེད།  དངོས་བྱུང་ངམ་དམིགས་བསལ་བརྗོད་གཞི་གང་རུང་ཐོག་གློག་བརྙན་བཟོ་སྐྲུན་ཆེད་མཐུན་འགྱུར་མ་དངུལ་ཧིན་སྒོར་འབུམ་གཉིས་གནང་རྒྱུའི་གསར་འགོད་གསལ་བསྒྲགས་ཤིག་སྤེལ་ཡོད།

དེ་ཡང་གོང་ཚེས་ཉིན་གྱི་ཉིན་གུང་ཆུ་ཚོད་ ༡༢ ཐོག་དང་ཐོག་ཕྱི་དྲིལ་ལས་ཁུངས་ཀྱི་ལས་བྱེད་ནུས་ཤུགས་གོང་སྤེལ་ཚན་པའི་འབྲེལ་མཐུད་པ་བསྟན་འཛིན་སྒྲོན་གསལ་ལགས་ཀྱིས་ངོ་སྤྲོད་གནང་བསྟུན།  དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས།  དྲིལ་བསྒྲགས་དྲུང་ཆེ་གནས་རིམ་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས། འབྲེལ་ཡོད་ལས་བྱེད། ཕྱི་ནང་གི་གསར་འགོད་པ་བཅས་ལྷན་འཛོམས་ཀྱི་ཐོག་མར་དཔལ་ལྡན་སྲིད་སྐྱོང་མཆོག་གིས་ལག་ཐོག་ཁ་པར་ཐོག་གནས་ཚུལ་ལྟ་ཀློག་བྱ་རྒྱུའི་བཀོལ་སྤྱོད་མཉེན་ཆས་གསར་པ་དབུ་འབྱེད་གནང་གྲུབ་མཚམས་དྲིལ་བསྒྲགས་དྲུང་ཆེ་གནས་རིམ་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས་ཀྱིས་མཉེན་ཆས་གསར་པ་བཟོ་དགོས་པའི་རྒྱུ་མཚན་དང་། དམིགས་ཡུལ་སོགས་ཀྱི་སྐོར་ངོ་སྤྲོད་གནང་དོན།

ད་ལྟའི་དུས་སྐབས་འདིར་མཉེན་ཆས་འདི་ལྟ་བུ་བཟོ་སྐྲུན་བྱེད་དགོས་པའི་རྒྱུ་མཆཚན་སྐོར་ཕྲན་བུ་ཞུས་པ་ཡིན་ན། སྤྱིར་འཛམ་གླིང་ཁྱོན་དུ་གནས་ཚུལ་འགོད་སྟངས་དང་འགྲེམས་སྤེལ་བྱེད་སྟངས་ཐོག་ལོ་བརྒྱད་དགུའི་ནང་འགྱུར་བ་ཆེན་པོ་ཕྱིན་ཡོད། དཔེར་ན་ ༢༠༡༠ ལོར་ཚད་མཐོའི་ལག་ཐོག་ཁ་པར་ smart phone བཀོལ་སྤྱོད་བྱེད་མཁན་འཛམ་གླིང་མི་འབོར་ཐེར་འབུམ་གཉིས་ལས་མི་འདུག འོན་ཀྱང་ ༢༠༡༩ ལོར་གྲངས་ཚད་འཕར་ནས་ཐེར་འབུམ་གཉིས་དང་ཕྱེད་ཀ་ཆགས་རྒྱུ་རེད་འདུག དེའི་གོ་དོན་ནི་འཛམ་གླིང་མི་འབོར་ནང་ནས་བརྒྱ་ཆ་ ༣༦ གིས་ལག་ཐོག་ཁ་པར་སྟེང་དྲ་རྒྱའི་ website ནང་གི་གནས་ཚུལ་རྣམས་ཐད་ཀར་གཟིགས་ཐུབ་རྒྱུ་རེད། ཕྱོགས་མཚུངས་ ༢༠༡༩ ལོར་འཛམ་གླིང་མི་འབོར་ཁྱོན་ཡོངས་ནས་ལག་ཐོག་ཁ་པར་ཡོད་མཁན་མི་འབོར་ལྔའམ་བརྒྱ་ཆ་ ༧༢ ཆགས་རྒྱུ་རེད། སྔ་མོ་ཡིན་ན་གནས་ཚུལ་གཅིག་ལ་མཚོན་ན་གནས་ཚུལ་དེ་གང་དུ་བྱུང་བ་དང་། where དུས་ནམ་བྱུང་བ། when ཚུལ་ཇི་ལྟར་བྱུང་བ། how ཅིའི་ཕྱིར་བྱུང་བ། why རྐྱེན་གང་ཡིན་ what བཅས་གནད་དོན་ལྔ་དེ་གཞིར་བཞག་ཐོག་ནས་འགྲོ་བཞིན་ཡོད་ཀྱང་། འོན་ཀྱང་ད་ཆ་དེར་འགྱུར་བ་ཕྱིན་ནས་སྙོབ་ཚད་དང་ཤུགས་ཚད། ཁྱབ་ཚད་སོགས་ལ་རག་ལུས་ཡོད། ཅེས་སོགས་གསུངས།

དེ་རྗེས་ཕྱི་དྲིལ་ཀམ་པུ་ཊར་སྡེ་ཚན་གྱི་ཆེད་ལས་པ་བསྟན་འཛིན་མཆོག་ལྡན་ལགས་ཀྱིས་བཀོལ་སྤྱོད་མཉེན་ཆས་གསར་པའི་སྐོར་ངོ་སྤྲོད་གནང་།

སྐབས་དེར་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་མཉེན་ཆས་གསར་པ་ལྔ་དང་ལྔ་བཅུའི་འཆར་སྣང་དང་། མཉེན་ཆས་གསར་པ་དབུ་འབྱེད་ཐོག་གསུང་བཤད་གནང་དོན། བོད་པ་ཚོ་འཛམ་གླིང་གི་རྒྱལ་ཁབ་ཁག་ ༣༠ ལྷག་ནང་ཡོད། དེ་བཞིན་གཞིས་ཆགས་ཁག་གི་བོད་མི་དང་སློབ་ཕྲུག་ཚོ་ཡང་རྒྱ་གར་གྱི་མཐོ་སློབ་ཁག་གིས་མཚོན་གང་སར་ཐོར་ནས་བསྡད་ཡོད་པ་རེད། འབྱུང་འགྱུར་ལོ་ལྔ་ནས་བཅུ་བར་མི་མང་གིས་བརྙན་འཕྲིན་བལྟ་རྒྱུའི་ཚབ་ལ་ལག་ཐོག་ཁ་པར་མཉེན་ཆས་བརྒྱུད་གསར་འགྱུར་ལྟ་ཀློག་བྱ་རྒྱུ་ཡིན་པ་ཚོད་དཔག་བྱེད་བཞིན་ཡོད།

ང་ཚོ་བོད་པ་ཚོས་ཀྱང་ལག་ཐོག་ཁ་པར་མཉེན་ཆས་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ཆོས་དངོས་སུ་མཇལ་རྒྱུ་ཡོད་པ་ཞིག་དང་། དེ་བཞིན་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ལས་དོན་གནང་ཕྱོགས་སྐོར་སོགས་ལ་ཤེས་རྟོགས་ཐུབ་རྒྱུའི་མཐུན་རྐྱེན་སྐྲུན་དགོས་པར་བརྟེན་ཕྱི་དྲིལ་ལས་ཁུངས་ནས་མཉེན་ཆས་གསར་པ་ Tibet.net App ཞིག་གསར་བཟོ་ལེགས་གྲུབ་བྱུང་ཡོད།

དེར་ཕྱག་ལས་གནང་མཁན་ཚང་མར་བསྔགས་བརྗོད་ཞུ་རྒྱུ་ཡིན།  བོད་མིའི་སྒྲིག་འཛུགས་ཀྱི་ཨིན་ཡིག་དྲ་རྒྱ་གཟིགས་མཁན་ས་ཡ་དྲུག་བརྒལ་ཚར་ཡོད། དེ་བཞིན་བོད་ཀྱི་བརྙན་འཕྲིན་གྱི་ངོ་དེབ་ལ་གཟིགས་མཁན་ཡང་ས་ཡ་དྲུག་བརྒལ་ཚར་ཡོད། ལག་ཐོག་ཁ་པར་ནང་མཉེན་ཆས་ཡོད་ན། བོད་མིའི་སྒྲིག་འཛུགས་ཀྱི་བོད་ཨིན་རྒྱ་གསུམ་གྱི་དྲ་རྒྱ་དང་བོད་ཀྱི་དྲ་རྒྱ་བརྙན་འཕྲིན་ལ་གཟིགས་མཁན་ས་ཡ་དྲུག་ནས་བཅུ་བརྒལ་འགྲོ་ས་རེད།  དེ་བཞིན་བོད་ནང་གི་བོད་མི་ཚོས་ཀྱང་མཉེན་ཆས་གསར་པ་དེ་བརྒྱུད་བོད་མིའི་སྒྲིག་འཛུགས་ཀྱི་སྐོར་ཤེས་རྟོགས་བྱུང་བ་ཡིན་ན། ཏན་ཏན་ཕན་ཐོགས་ཡོང་རྒྱུ་རེད། ཅེས་སོགས་ཀྱི་གསུང་བཤད་གནང་། 

དེ་ནས་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་ཀྱི་བརྙན་འཕྲིན་ཚན་པས་བཙན་བྱོལ་ནང་གི་བོད་མི་གློག་བརྙན་བཟོ་ལས་པ་ཚོའི་སྒྱུ་རྩལ་གོང་འཕེལ་ཆེད་དུ་དངོས་བྱུང་ངམ་དམིགས་བསལ་བརྗོད་གཞི་གང་རུང་ཐོག་གློག་བརྙན་བཟོ་ཆེད་ཧིན་སྒོར་འབུམ་གཉིས་མ་དངུལ་གནང་རྒྱུའི་སྐོར་གསལ་བསྒྲགས་སྤེལ་བསྟུན་དབུ་འབྱེད་མཛད་སྒོ་གྲོལ་འདུག

དེ་ཡང་ལག་ཐོག་ཁ་པར་ཐོག་གསན་ཚུལ་ལྟ་ཀློག་ཆེད་མཉེན་ཆས་གསར་པ་འདི་བཟོ་སྐྲུན་པ་རྒྱ་གར་ལྷོ་ཕྱོགས་བྷེང་ལོར་དུ་རྟེན་གཞི་བྱས་པའི་སྒེར་གྱི་ཁྱད་ལས་ཚོགས་པ་ Dachompa Tech LLT ཞེས་པ་ཡིན་འདུག །