༢༠༡༨ ཟླ་ ༤ ཚེས་ ༡༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༨ ཟླ་ ༤ ཚེས་ ༡༩ ཉིན་རྡ་ས་བོད་ཀྱི་གསོལ་མགྲོན་ཁང་དུ་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་ནས་བོད་ཀྱི་བང་ཆེན་གསར་ཤོག་ཕྱི་ལོ་ ༢༠༠༣ ཟླ་ ༤ ཚེས་ ༡༨ ཉིན་གསར་དུ་འདོན་འགྲེམས་གནང་སྟེ། ད་བར་ལོ་ངོ་ཧྲིལ་པོ་ ༡༥ འཁོར་བ་དང་སྟབས་བསྟུན། བོད་ཀྱི་བང་ཆེན་གྱི་བོད་ཨིན་གཉིས་ལྡན་གྱི་དྲ་རྒྱ་དང་། བཀོལ་སྤྱོད་མཉེན་ཆས་ Apps གསར་པ་དབུ་འབྱེད་ཀྱི་མཛད་སྒོ་སྟབས་བདེ་ཞིག་ཚོགས་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གི་འགན་འཛིན་བོད་མི་མང་སྤྱི་འཐུས་གསེར་རྟ་ཚུལ་ཁྲིམས་ལགས། ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གི་འཛིན་སྐྱོང་དོ་དམ་པ་སྤྱི་འཐུས་ངག་དབང་ཐར་པ་ལགས། འབྲེལ་ཡོད་ལས་བྱེད། བོད་རིགས་གསར་འགོད་པ་བཅས་ཁྱོན་མི་གྲངས་ ༢༠ བརྒལ་བ་འདུ་འཛོམས་ཐོག་མཛད་སྒོ་དབུ་འཛུགས་ཀྱི་ཐོག་མར་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གི་འགན་འཛིན་བོད་མི་མང་སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་ཕེབས་བསུའི་གསུང་བཤད་དང་ལྷན་བོད་ཀྱི་བང་ཆེན་གསར་ཤོག་དང་དྲ་རྒྱའི་འཕེལ་རིམ་དང་མ་འོངས་ལས་འཆར་སོགས་ཀྱི་སྐོར་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་ཀྱི་བང་ཆེན་གྱི་བོད་ཨིན་གཉིས་ལྡན་གྱི་དྲ་རྒྱ་དང་།
བཀོལ་སྤྱོད་མཉེན་ཆས་ Apps གསར་པ་དབུ་འབྱེད་གནང་སྟེ་གསུང་བཤད་གནང་དོན། དེ་རིང་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་ནས་བོད་ཀྱི་བང་ཆེན་གསར་ཤོག་འདོན་འགྲེམས་གནང་ནས་ལོ་ངོ་ཧྲིལ་པོ་ ༡༥ འཁོར་དང་མཉམ་དུ་དེང་སྐབས་ཀྱི་བཀོལ་སྤྱོད་མཉེན་ཆས་ Apps དང་དྲ་རྒྱ་སྒོ་འབྱེད་བྱེད་རྒྱུའི་ཐོག་ཕེབས་པའི་བཀུར་འོས་བོད་མི་མང་སྤྱི་འཐུས་དང་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གི་འགན་འཛིན་སྤྱི་འཐུས་གསེར་རྟ་ཚུལ་ཁྲིམས་ལགས་དང་བཀུར་འོས་ཕྱག་འབྲེལ་སྤྱི་འཐུས། དེ་བཞིན་བཙན་བྱོལ་སྤྱི་ཚོགས་ནང་གི་གསར་འགོད་པ་རྣམ་པ་བཅས་ལ་སྔ་དྲོ་བདེ་ལེགས་ཞུ་རྒྱུ་དང་ཆབས་ཅིག་ངས་སྐད་ཆ་ཆིག་ཁ་ཤས་ཞུ་ན་ཞེས་གསུང་པ་རེད། རྩ་བའི་གསར་འགྱུར་རིག་པ་དང་། ལྷག་པར་འཕྲུལ་ཆས་དང་བཀོལ་སྤྱོད་མཉེན་ཆས་རིགས་ལ་སློབ་སྦྱོང་རྩ་བ་ཉིད་ནས་བྱས་མ་མྱོང་མཁན་གྱི་གང་ཟག་ཅིག་ཆགས་ཡོད་སྟབས། དེ་དག་ཐོག་ལ་ཐུགས་ཕན་གསོ་བའི་བཀའ་མོལ་ཞུ་རྒྱུ་ངའི་ངག་ནས་ཐོན་གྱི་མ་རེད། འོན་ཀྱང་ང་ཚོའི་གནས་སྟངས་དང་མཐུན་པའི་ཐོག་ནས་ཚིག་ཀ་ཤས་ཤིག་ཞུ་ན་སྙམ་བྱུང་།
ང་ཚོ་གཞི་རྩའི་བསམ་བློ་གཏོང་ས་གང་ཆགས་ཡོད་ཅེ་ན། བོད་ཀྱི་སྐད་ཡིག་ཐོག་ནས་བརྒྱུད་ལམ་འཚོལ་དགོས་རྒྱུ་ཆགས་ཡོད། བོད་ཀྱི་སྐད་ཡིག་ཐོག་ནས་བོད་རང་ལ་རིག་གནས་ཆེ་བ་ལྔ་དང་ཆུང་བ་ལྔ་ཞེས་གང་ལྟར་ནང་དོན་རིག་པ་མཚོན་པའི་སྨན་གཞུང་སོགས་དེང་སང་གི་སྤྱི་ཚོགས་ནང་བཀོལ་སྤྱོད་བྱེད་ཐུབ་པ་མང་པོ་ཞིག་བོད་ཀྱི་སྐད་ཡིག་རང་གི་ཐོག་ནས་བེད་སྤྱོད་གཏོང་ཐུབ་ཀྱི་ཡོད། ལྷག་པར་དུས་རབས་ ༢༡ ནང་འཕྲུལ་ཆས་ཀྱི་རིག་པ་དེ་ཚོ་ཧ་ཅང་ཤུགས་ཆེན་པོ་ཆགས་ཀྱི་ཡོད། དེ་དང་མཉམ་དུ་བོད་ཀྱི་སྐད་ཡིག་འདང་གི་རེད་དམ་མ་རེད་ཟེར་རྒྱུའི་དྲི་བ་རང་བཞིན་གྱི་སླེབ་ཀྱི་ཡོད།
ལྷག་པར་དེང་སང་གི་སློབ་སྦྱོང་བྱེད་རྒྱུའི་སྡེ་ཚན་ནང་ཆབ་སྲིད་རིག་པ་དང་། ཚན་རིག དཔལ་འབྱོར་དང་ས་ཁམས་རིག་པ་སོགས་རིག་གནས་མང་པོའི་ནང་བོད་ཀྱི་སྐད་ཡིག་བཀོལ་སྤྱོད་བྱེད་ཐུབ་དགོས་རྒྱུར་ང་ཚོས་འབད་བརྩོན་བྱེད་དགོས་རྒྱུ་གལ་ཆེན་པོ་ཆགས་སྟབས། དེ་དང་འབྲེལ་བའི་བའི་ཐོག་ནས་གསར་འགྱུར་སྡེ་ཚན་ཁག་དང་། ལྷག་པར་ཚགས་ཤོག་འདོན་འགྲེམས་བྱེད་མཁན་སྡེ་ཚན་དེ་ཚོ་ཧ་ཅང་གལ་ཆེན་པོ་ཆགས་ཀྱི་ཡོད། དེ་འདྲའི་ཐོག་ནས་དེ་རིང་བོད་ཀྱི་བང་ཆེན་འདོན་འགྲེམས་བྱས་ནས་ལོ་ ༡༥ འཁོར་བར་དམིགས་བསལ་འཚམས་འདྲི་དང་བསྔགས་བརྗོད་ཡོད།
གསར་འགྱུར་སྡེ་ཚན་ནང་གསར་འགྱུར་རིག་པའི་གཞུང་ལུགས་ཐོག་ནས་མི་རིགས་དང་། ས་མཚམས། ཆབ་སྲིད་སོགས་ཀྱི་དབྱེ་བ་དང་སྡེ་ཚན་འབྱེད་པ་ཡིན་ན། རིག་པའི་གཞུང་ལུགས་དང་མི་མཐུན་པའི་གནས་སྟངས་ཤིག་དང་བགྲོ་གླེང་ཡོང་རྒྱུའི་གཞི་ཆགས་ཡོད། ང་རང་ཚོའི་གནས་སྟངས་ལ་དཔགས་པའི་ཐོག་ནས་གསར་འགྱུར་ཟེར་རྒྱུ་དེ་ང་ཚོ་བཙན་བྱོལ་སྤྱི་ཚོགས་ནང་གསར་འགྱུར་འགོད་མཁན་གྱི་གང་ཟག་དེ་ཚོའི་ནང་ནས་རིགས་གཅིག་གིས་བཙན་བྱོལ་སྤྱི་ཚོགས་རང་གི་ཐོག་ནས་གནས་ཚུལ་མཁོ་སྒྲུབ་དང་། འདོན་རྒྱུ་ཙམ་རེད་མ་གཏོགས་དེ་ལས་གཞན་པའི་ཉེན་ཁ་ཆེ་བ་དམག་གི་འཐབ་རྩོད་ནང་གསར་འགྱུར་འགོད་སླད་འགྲོ་རྒྱུ་དེ་འདྲ་ནང་བཞིན་ཉེན་ཚབས་ཆེ་བའི་ས་ཁུལ་དུ་ཕེབས་ནས་གསར་འགྱུར་འགོད་རྒྱུ་ད་ལྟ་ཕལ་ཆེར་བསམ་བློ་འཁོར་མེད་པར་བརྟེན་ང་ཚོར་དེ་འདྲའི་ཉེན་ཁ་མེད། ཡིན་ནའང་ང་ཚོའི་སྤྱི་ཚོགས་ཀྱི་གནས་སྟངས་དང་མཐུན་པའི་ཐོག་ནས་གསར་འགྱུར་རིག་པ་ཟེར་རྒྱུ་དེ་གང་ལྟར་གསར་འགྱུར་འདོན་འགྲེམས་བརྒྱུད་ནས་སྤྱི་ཚོགས་ནང་གོ་བརྡ་འཕྲོད་ཐུབ་པ་དང་། ཕྱོགས་གཉིས་ནས་སྤྱི་ཚོགས་ཀྱིས་དོ་སྣང་དང་གདེང་ཚོད་སླེབ་ཐུབ་པ། ཕྱོགས་གཞན་ཞིག་ནས་གང་ལྟར་གསར་འགྱུར་ཟེར་རྒྱུ་དེ་ཕྱོགས་སུ་མ་ལྷུང་བ་ལྟ་བུ་འཇིགས་ཞུམ་ཆགས་སྡང་སྤངས་ནས་གསར་འགྱུར་དངོས་ཡོད་གནས་ཚུལ་གང་ཡིན་པ་དེ་འགོད་ཐུབ་དགོས་པ་དང་། དེའི་ཐོག་ནས་སྤྱི་ཚོགས་ཀྱི་དགོས་མཁོ་འགེངས་ཐུབ་དགོས་རྒྱུ་གལ་ཆེན་པོ་མཐོང་གི་འདུག
དེ་འདྲའི་ཐོག་ནས་རྒྱུ་ཆ་ཡོང་ཁུངས་བསམ་བློ་གཏོང་བ་ཡིན་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཛད་པ་འཕྲིན་ལས་ཆགས་ཀྱི་ཡོད། དེ་བཞིན་བོད་མིའི་སྒྲིག་འཛུགས་དང་གཞུང་འབྲེལ་མིན་པའི་ཚོགས་པ་ཁག ལྷག་པར་བོད་ནང་གི་གནས་སྟངས་ནི་གནས་འགྱུར་ལས་རིམ་འདིའི་ཐོག་ནས་དངོས་ཡོད་གནས་ཚུལ་ཕྱི་ཕྱོགས་ལ་འདོན་ཐུབ་པ་དང་དེའི་ཐོག་དོ་སྣང་སླེབ་ཐུབ་པའི་རྒྱུ་ཆ་དེ་རྣམ་པ་ཚོའི་ངོས་ནས་བརྒྱུད་ལམ་འདྲ་མིན་ཐོག་ནས་གནང་ཐུབ་ན་བོད་ཀྱི་ཁོར་ཡུག་དང་ཆོས་དད་རང་དབང་། འགྲོ་བ་མིའི་ཐོབ་ཐང་། སྐད་ཡིག་རང་དབང་ཐོག་དོ་སྣང་གསར་པ་ཞིག་སླེབ་ཐུབ་ཀྱི་རེད་བསམ་གྱི་འདུག
སྤྱིར་གསར་འགྱུར་འགོད་མཁན་དང་དོ་སྣང་གནང་མཁན་ཡིན་ནའང་འདྲ། ཕྱོགས་གཅིག་ནས་མིའི་རྣམ་དཔྱོད་དེ་བེད་དཔྱོད་གཏོང་ས་འདྲ་མིན་བཏང་སྟབས། འགྲིག་གི་མ་རེད་ཅེས་མཐའ་གཅིག་ཏུ་བརྗོད་ཐུབ་ཐབས་མེད་ཀྱང་སྤྱི་ཚོགས་ནང་ཟང་ཟིང་ཧ་ཅང་ཤུགས་ཆེན་པོ་ཡོང་རྒྱུའི་གཞི་དེ་འདྲ་ཡོད་ན། གསར་འགྱུར་འགོད་མཁན་དེ་ཚོས་དོ་སྣང་ཤུགས་ཆེ་བ་སླེབ་པ་དང་། དེའི་བརྒྱུད་ནས་གསར་འགྱུར་ཀློག་མཁན་དང་ལྟ་མཁན་ཡིན་ནའང་དོ་སྣང་ཆེ་བ་སླེབ་པ་ལྟ་བུ། དངོས་ཡོད་གནས་ཚུལ་སྤྱི་ཚོགས་ལ་ཁ་ཡོད་ལག་ཡོད་ཕན་ཐོགས་རྒྱུའི་གསར་འགྱུར་རིགས་ཐོན་པ་ཡིན་ན། དེར་གསར་འགྱུར་འགོད་མཁན་རྣམ་པ་ཡིན་ནའང་སྣང་ཆུང་ལྟ་བུ་དང་སྤྱི་ཚོགས་ནང་དོ་སྣང་ལྟ་བུ་མ་བྱས་སྟབས། ཁར་ཐུག་གནས་ཚུལ་གང་ཆགས་ཀྱི་ཡོད་མེད་ཞུ་ཐུབ་ཐབས་མེད་ཀྱང་ཕུགས་ལ་ཉེན་ཁ་ཤུགས་ཆེན་པོ་ཞིག་ཡོང་གི་ཡོད་པ་ཧ་ཅང་གསལ་པོ་རེད་འདུག་བསམ་གྱི་འདུག དེར་བརྟེན་མིའི་བསམ་བློ་ནང་གོ་རྟོགས་སྤེལ་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད། ཅེས་སོགས་ཀྱི་གསུང་བཤད་གནང་།
