༢༠༡༨ ཟླ་ ༤ ཚེས་ ༢༡ རེས་གཟའ་སྤེན་པ།

༄༅། །ཕྱི་ལོ་ ༢༠༡༨ ཟླ་ ༤ ཚེས་ ༡༦ ནས་ ༢༠ བར་ཉིན་གྲངས་ལྔའི་རིང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པའི་གོ་སྒྲིག་འོག་རྒྱ་གར་རྒྱལ་ས་ལྡི་ལིར་ཡོད་པའི་རྒྱ་གར་གཞུང་གི་འཛིན་སྐྱོང་སྦྱོང་བརྡར་བསྟི་གནས་ཁང་དུ་ Indian Institute of Public Administration བོད་མི་སྒྲིག་འཛུགས་ཀྱི་ལས་ཁུངས་འདྲ་མིན་ནས་བུད་མེད་སྲི་ཞུའི་ལས་བྱེད་ཁྱོན་ ༢༢ ལ་འགོ་འཁྲིད་ཀྱི་ནུས་པ་སྐྱེད་སྲིང་དང་འབྲེལ་བའི་ཟབ་སྦྱོང་ཞིག་གོ་སྒྲིག་གནང་འདུག

དེ་ཡང་ཟབ་སྦྱོང་གི་དགོས་དམིགས་གཅོ་བོ་ནི་བོད་མིའི་སྒྲིག་འཛུགས་ཀྱི་ལས་དོན་ཐོག་བུད་མེད་ཚོས་འགན་འཁྱེར་བ་ཙམ་མ་ཟད།  སྣེ་འཁྲིད་ཐུབ་པའི་ནུས་པ་གོང་མཐོར་གཏོང་ཆེད་ཡིན་འདུག 
དབུ་འབྱེད་མཛད་སྒོར་འཛིན་སྐྱོང་སྦྱོང་བརྡར་བསྟི་གནས་ཁང་གི་ངེས་སྟོན་པ་སྐུ་ཞབས་ Dr T Chatterjee ལགས་ཕེབས་པ་མ་ཟད།  སྐུ་ཞབས་ Surabhi Pandey ལགས་དང་ལྕམ་སྐུ་Anjali Dhengle ལགས་གཉིས་ཀྱིས་ཟབ་སྦྱོང་གཙོ་སྐྱོང་གནང་འདུག  ཕྱོགས་མཚུངས་བུད་མེད་ནུས་སྟོབས་གོང་སྤེལ་ཚན་པའི་འགན་འཛིན་ཚེ་རིང་ལྷ་མོ་ལགས་ཀྱིས་ངོ་སྤྲོད་དང་འབྲེལ་བའི་གསུང་བཤད་གནང་འདུག

དེ་ཡང་ཉིན་ལྔའི་ཟབ་སྦྱོང་སྐབས་ཡིག་ངག་གཉིས་ཐོག་ནས་གཞུང་འབྲེལ་ལས་དོན་སྤེལ་ཕྱོགས་དང་།   འཛིན་སྐྱོང་གི་ལས་དོན་གནང་སྐབས་སྒོ་གསུམ་གྱི་སྤྱོད་པ་ཚུལ་དང་མཐུན་པ་ཞིག་ཡོང་ཐབས།  དེ་བཞིན་དྲ་རྒྱའི་ཉེན་སྲུང་།  ཕོ་མོ་དབྱེ་འབྱེད་ཀྱི་དཀའ་ངལ་ལ་གདོང་ལེན་བྱེད་ཕྱོགས་སོགས་ཡོད་འདུག  

ཟབ་ཁྲིད་པ་རྣམས་ནི་རྒྱ་གར་གཞུང་ཞབས་པ་ཟུར་པ་ཤེས་མྱོང་ཅན་ཁག་གཅིག་སོགས་ཡོད་འདུག

དེ་ཡང་ཟབ་སྦྱོང་ཉིན་མཐའ་མར་མཇུག་སྡོམ་མཛད་སྒོའི་སྐབས་ཚོགས་བཅར་བ་རྣམས་ལ་ལག་འཁྱེར་གནང་གྲུབ་མཚམས་མཇུག་སྡོམ་མཛད་སྒོའི་གསུང་བཤད་གནང་བསྟུན་ཐེངས་འདིའི་ཟབ་སྦྱོང་ཡོངས་སུ་ལེགས་གྲུབ་བྱུང་འདུག  ཐེངས་འདིར་ཟབ་སྦྱོང་མཐུན་འགྱུར་གནང་མཁན་ཨ་རིའི་རོགས་དངུལ་ཐེབས་རྩ་ཁང་ USAID ཡིན་འདུག་པ་བཅས།།