ཕྱི་ལོ་ ༢༠༡༨ ཟླ་ ༤ ཚེས་ ༣༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༨ ཟླ་ ༤ ཚེས་ ༢༢ ནས་ ༢༥ བར་ཉིན་གྲངས་བཞིའི་རིང་དེ་སྔ་སྲིད་གཞུང་དང་སྲིད་དབང་སྒེར་གཅོད་བཅས་ཀྱི་འོག་དཀའ་སྡུག་མྱངས་བའི་རྒྱལ་ཁབ་ཆེ་ཆུང་ཁག་གི་ལོ་རྒྱུས་ལ་ཕྱིར་དྲན་དང་། གནས་སྟངས་དེ་དག་སྐོར་རྒྱུས་ལོན་ཙམ་དུ་མ་ཟད། དེ་དང་འབྲེལ་བའི་ལོ་རྒྱུས་ལྡན་པའི་ཤུལ་ལུས་ས་ཚིགས་ཁག་ལ་གཟིགས་ཞིབ་བཅས་ཀྱི་ལས་རིམ་ཞིག་ཀམ་བོ་ཌི་ཡའི་ན་གཞོན་ཞི་བདེ་བསྟི་གནས་ཁང་དང་། International Coalition of Sites of Conscience ཞེས་པའི་ཚོགས་པ་གཉིས་ཐུན་མོང་གི་གོ་སྒྲིག་འོག་ཀམ་བོ་ཌི་ཡའི་རྒྱལ་ས་ནོམ་པེན་ Phnom Penh ནང་ཕྱི་ལོ་ ༢༠༡༨ ལོའི་ཨེ་ཤི་ཡ་ཁུལ་གྱི་ལོ་འཁོར་ཚོགས་འདུ་བསྐོང་ཚོགས་གནང་ཡོད་པ་རེད།
དེ་ཡང་ཚོགས་འདུའི་ཐོག་ཕྱི་དྲིལ་བོད་ཀྱི་འགྲེམས་སྟོན་ཚན་པའི་ལས་བྱེད་ཡེ་ཤེས་དབང་མོ་ལགས་མཉམ་ཞུགས་གནང་ཡོད་པ་དང་། ཐེངས་འདིར་བོད་ཀྱི་འགྲེམས་སྟོན་ཁང་ནས་ལས་གཞི་དེའི་ཚོགས་མི་ཁོངས་སུ་འཛུལ་ཞུགས་ཀྱིས་ཚོགས་འདུར་མཉམ་ཞུགས་གནང་བ་ཐེངས་དང་པོ་ཆགས་ཀྱི་ཡོད་འདུག
ཚོགས་འདུའི་ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་བོད་ཀྱི་འགྲེམས་སྟོན་ཚན་པའི་སྐུ་ཚབ་དང་། དེ་བཞིན་ཀམ་བོ་ཌི་ཡ་དང་། ཨཕ་གྷ་ནིས་ཏན། བལ་ཡུལ། ཕི་ལི་པིན། ཤྲི་ལངྐ་སོགས་ཨེ་ཤི་ཡའི་ཡུལ་གྲུ་ཁག་གི་ནང་རྟེན་གཞི་བྱས་པའི་ཚོགས་པ་དང་སྒྲིག་འཛུགས་ཁག་གི་སྐུ་ཚབ་སོགས་མཉམ་ཞུགས་གནང་སྟེ། རང་རང་སོ་སོའི་ལས་གཞིའི་ངོ་བོ་དང་དམིགས་ཡུལ། འཆར་སྣང་སོགས་ཀྱི་སྐོར་ངོ་སྤྲོད་དང་། ཚོགས་བཅར་བ་ཕན་ཚུན་དབར་ལས་གཞིའི་སྐོར་གོ་རྟོགས་སྤེལ་རེས་གནང་ཡོད་པ་ལྟར། ཡེ་ཤེས་དབང་མོ་ལགས་ཀྱིས་ད་ཡོད་བོད་ཀྱི་འགྲེམས་སྟོན་ཁང་དང་འགྲེམས་སྟོན་ཁང་གསར་པའི་ལས་གཞི་ཁག་གི་སྐོར་ངོ་སྤྲོད་གནང་བར་དེ་སྔ་བོད་དང་བོད་ཀྱི་གནད་དོན་སྐོར་གོ་རྟོགས་གང་ཡང་མེད་པའི་ཡུལ་ལུང་འདྲ་མིན་གྱི་མི་རིགས་ཁྲོད་བོད་དོན་སྐོར་གོ་རྟོགས་སྤེལ་ཐུབ་པ་བྱུང་འདུག
ཉིན་གྲངས་བཞིའི་ཚོགས་འདུའི་ཉིན་གསུམ་པའི་ལས་རིམ་སྐབས་ཀམ་བོ་ཌི་ཡ་ནང་དེ་སྔ་མི་རིགས་སྡེབ་གསོད་བྱས་པའི་ས་ཚིགས་ལ་གཟིགས་སྐོར་སོགས་ཁྲིད་གནང་འདུག
སྤྱིར་ཚོགས་འདུའི་དགོས་དམིགས་ནི། དཀའ་ངལ་ཅན་གྱི་སྤྱི་ཚོགས་རྣམས་ལ་གོ་སྐབས་གསར་སྐྲུན་ཐོག་མང་གཙོའི་རིང་ལུགས་དང་། འགྲོ་བ་མིའི་ཐོབ་ཐང་སྐོར་ལེགས་བཤད་སྤེལ་རེས་དང་། སྤྱི་ཚོགས་སོ་སོའི་གནས་སྟངས་ལ་གཞིག་པའི་དཀའ་ངལ་སེལ་ཐབས་ཐོག་མཉམ་རུབ་གྱི་ལས་གཞི་གསར་སྤེལ་གནང་རྒྱུ། དེ་བཞིན་ཨེ་ཤི་ཡའི་ས་ཁུལ་ཕན་ཚུན་འབྲེལ་ལམ་གསར་སྐྲུན་བརྒྱུད་ཁྱབ་ཁོངས་ཀྱི་ཚོགས་མི་མང་དུ་གཏོང་ཐབས་བཅས་ཡིན་འདུག
རྒྱལ་སྤྱིའི་ཚོགས་པ་འདིའི་ནང་ད་ལྟའི་ཆར་ཚོགས་མི་རྒྱལ་ཁབ་གྲངས་ ༦༠ ཙམ་ཡོད་པ་དང་། ཚོགས་པས་ལོ་ལྟར་ཨེ་ཤི་ཡ་དང་། ལྷོ་ཨ་རིའི་ཁུལ། དེ་བཞིན་དཀྱིལ་ཤར་ཡུལ་གྲུ་ཡང་ན་བྱང་ཨ་ཕི་རི་ཀ་སོགས་སུ་ཁྱབ་ཁོངས་རྒྱལ་ཁབ་ཀྱི་སྐུ་ཚབ་རྣམས་མཉམ་འཛོམས་ཀྱིས་ཁུལ་སོ་སོར་ཚོགས་འདུ་བསྐོང་ཚོགས་གནང་གི་ཡོད་འདུག །
