ཕྱི་ལོ་ ༢༠༡༨ ཟླ་ ༤ ཚེས་ ༡༠ རེས་གཟའ་མིག་དམར།
༄༅། །སྤོན་ཊ་ཆོལ་གསུམ་བོད་མིའི་ས་གནས་འགོ་འཛིན་ལས་ཁུངས་ནས་འབོད་སྐུལ་ཞུས་དོན་ལྟར། ཕྱི་ལོ་ ༢༠༡༨ ཟླ་ ༤ ཚེས་ ༧ ཉིན་ཕྱི་དྲིལ་བོད་ཀྱི་འགྲེམས་སྟོན་ཁང་ནས་སྤོན་ཊ་ཆོལ་གསུམ་བོད་མིའི་གཞིས་ཆགས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་དང་། བཙན་བྱོལ་ནང་འགྲུལ་བཞུད་ཞེས་བརྗོད་གཞི་གཉིས་ཀྱི་ཐོག་པར་རིས་འགྲེམས་སྟོན་གནང་ཡོད། སྐབས་དེར་ས་གནས་ཀྱི་བོད་མི་ལོ་ན་རྒན་གྲས་དང་སློབ་ཕྲུག་སོགས་མི་མང་རྣམས་ནས་དོ་དབྱིངས་ཆེན་པོའི་ཐོག་ནས་པར་རིས་རྣམས་ལ་གཟིགས་ཞིབ་གནང་ཡོད།
ཕྱོགས་མཚུངས་ཕྱི་ཚེས་ ༩ ཉིན་སྤོན་ཊ་གྲོང་ཁྱེར་དུ་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་མ་ཚུགས་སྔོན་པར་རིས་འགྲེམས་སྟོན་གནང་ཡོད། པར་རིས་འགྲེམས་སྟོན་དེར་ས་གནས་བོད་མི་ཚོས་དགའ་མོས་གནང་ཡོད་པ་མ་ཟད། ས་གནས་བོད་མི་ལོ་ན་རྒན་པ་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སྔ་མོ་བཙན་བྱོལ་བོད་མིའི་འཚོ་བ་སྐྱེལ་སྟངས་སོགས་ཀྱི་པར་རིས་ཁག་ལ་གཟིགས་རྗེས། སེམས་ལ་དགའ་སྐྱོ་ཟུང་འབྲེལ་གྱི་ཚོར་བ་བྱུང་ཡོད། ས་གནས་བོད་མི་ཚོས་འགྲེམས་སྟོན་པར་རིས་རྣམས་ལ་དོ་སྣང་ཆེན་པོའི་སྒོ་ནས་གཟིགས་ཞིབ་གནང་བ་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་རྗེས་དྲན་གྱི་སྐོར་ལ་སྒེར་གྱི་བསམ་ཚུལ་ལྷུག་པོར་བརྗོད་ཡོད།
ཉིན་རྒྱབ་ས་གནས་སམ་བྷོ་ཊ་གཏན་སློབ་དགེ་ལས་སློབ་ཕྲུག་ཡོངས་ནས་པར་རིས་འགྲེམས་སྟོན་ལ་དགའ་ཚོར་ཆེན་པོའི་ངང་ནས་གཟིགས་ཞིབ་གནང་སྟེ་པར་རིས་དང་འབྲེལ་བའི་སྐོར་དྲི་བ་གང་མང་དྲིས་ཡོད། སྤོན་ཊ་ཆོལ་གསུམ་བོད་མིའི་གཞིས་ཆགས་སུ་ལོ་ན་རྒན་པ་དང་། སློབ་ཕྲུག་སོགས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། བཙན་བྱོལ་བོད་མིའི་ལོ་རྒྱུས་སོགས་ཀྱི་སྐོར་གོ་རྟོགས་སྤེལ་ཆེད་ཕྱི་དྲིལ་འགྲེམས་སྟོན་ཚན་པ་ནས་པར་རིས་འགྲེམས་སྟོན་གནང་ཡོད་པ་བཅས། །
