ཕྱི་ལོ་ ༢༠༡༨ ཟླ་ ༤ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༨ ཟླ་ ༤ ཚེས་ ༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨ་རི་ཨེ་ཊི་ལན་ཊ་གྲོང་ཁྱེར་ནང་རྟེན་གཞི་བྱས་པའི་ཨེ་མོ་རི་གཙུག་ལག་སློབ་གཉེར་ཁང་གི་ཆོས་ལུགས་དང་ཁྲིམས་ཀྱི་སློབ་སྦྱོང་བསྟི་གནས་ཁང་དུ་གཙུག་ལག་ཁང་གི་སློབ་དཔོན་ཆེན་མོ་དང་། སློབ་ཕྲུག ཤེས་ཡོན་པ་སོགས་ལ་བཙན་བྱོལ་བོད་མིའི་མང་གཙོ་འཕེལ་རིམ་སྐོར་གསུང་བཤད་གནང་ཡོད།
དེ་ཡང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་གསུང་དོན། འཛམ་གླིང་གི་མང་གཙོ་ལམ་ལུགས་ཁྲོད་བཙན་བྱོལ་བོད་མིའི་མང་གཙོ་ལམ་ལུགས་ནི་ཐུན་མོང་མ་ཡིན་པ་ཞིག་ཡིན་པ་དང་། འདས་པའི་ལོ་ངོ་དྲུག་ཅུ་རིང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་འོག་བོད་རྒྱ་ཆེ་མི་མང་གིས་ཡང་དག་པའི་མང་གཙོ་ལམ་ལུགས་ཐོག་གོམ་པ་མདུན་སྤོ་གནང་བར་བརྟེན་ནས་བྱུང་བ་ཞིག་ཡིན།
ད་ལྟའི་ཆར་ང་ཚོ་རྒྱལ་ཞེན་རིང་ལུགས་དང་དྲག་པོའི་ཁ་ཕྱོགས་སུ་སྐྱོད་བཞིན་པའི་དུས་རབས་ཤིག་གི་ནང་ཡོད་པ་དང་། འདི་འདྲིའི་དུས་རབས་ཤིག་གི་སྐབས་སུ་བཙན་བྱོལ་བོད་མིའི་མང་གཙོ་དེ་བཞིན་ཆོས་ལུགས་རིས་མེད་ཀྱི་མང་གཙོར་ཁ་བསྒྱུར་ཐུབ་པ་ནི་ཧ་ཅང་རླབས་ཆེན་ཞིག་རེད། ཅེས་དང་།
གཞན་ཡང་དཔལ་ལྡན་སྲིད་སྐྱོང་མཆོག་གིས་བཙན་བྱོལ་བོད་མིའི་མང་གཙོའི་ལམ་ལུགས་འདི་གཞན་དང་མ་འདྲ་བ་ཡོད་པ་ཁྱད་ཆོས་བཞི་གཙོ་འདོན་གནང་སྟེ་གསུང་དོན། འཛམ་གླིང་གི་མང་གཙོ་འཕེལ་རིམ་ནི་མི་མང་རང་གིས་འཐབ་རྩོད་བྱས་པ་ལ་བརྟེན་ནས་བྱུང་བ་ཞིག་ཡིན། འོན་ཀྱང་དེ་ལས་ལྡོག་སྟེ་བཙན་བྱོལ་བོད་མིའི་མང་གཙོ་འཕེལ་རིམ་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་རྒྱ་ཆེ་མི་མང་ལ་མར་གསོལ་རས་སྩལ་བ་ཞིག་རེད། ཕྱི་ལོ་ ༢༠༡༠ ལོར་བོད་རྒྱ་ཆེ་མི་མང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ཆབ་སྲིད་དང་འཛིན་སྐྱོང་གི་སྐུ་དབང་མུ་མཐུད་ཐུགས་འགན་བཞེས་གནང་ཡོང་བའི་གསོལ་འདེབས་ཞུས་ཡོད་ཅིང་།
ཕྱི་ལོ་ ༢༠༡༡ ལོར་བོད་མིའི་འཕྲལ་ཕུགས་བདེ་དོན་སོགས་རྒྱུ་མཚན་དུ་མར་གཟིགས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་དང་འཛིན་སྐྱོང་གི་ཐུགས་འགན་ཡོངས་སུ་རྫོགས་པ་མང་ཚོགས་ཀྱིས་འོས་འདེམས་བྱས་པའི་འགོ་ཁྲིད་ཕྲན་ལ་རྩིས་སྤྲོད་གནང་བ་རེད།
བཙན་བྱོལ་བོད་མིའི་མང་གཙོ་ནི་བོད་མིའི་སྒྲིག་འཛུགས་ཡིན་པ་དང་། བོད་མིའི་སྒྲིག་འཛུགས་ཀྱིས་གཙོ་བོ་འགོ་ཁྲིད་གཅིག་དང་། འབོད་སྒྲ་གཅིག ཆིག་སྒྲིལ་བཅས་ཀྱི་ཐོག་ཤུགས་རྒྱག་གི་ཡོད། བོད་མིའི་སྒྲིག་འཛུགས་ཀྱིས་ཆིག་སྒྲིལ་གལ་ཆེ་ཤོས་རྩི་བཞིན་ཡོད། མང་གཙོའི་སྒྲིག་འཛུགས་ཤིག་ཡིན་ཚེ། འགལ་ཟླ་ཡོད་ཡོད་པ་རེད། གང་ཡིན་ཞེ་ན། མང་གཙོའི་སྒྲིག་འཛུགས་ནང་འགོ་ཁྲིད་གཅིག་གི་ཚབ་ལ་ཕྱོགས་འགལ་ཚོགས་པ་ཡོད་དགོས་པ་དང་། འབོད་སྒྲ་གཅིག་གི་ཚབ་ཏུ་སྨྲ་བརྗོད་རང་དབང་དགོས་ཀྱི་ཡོད། འོན་ཀྱང་ང་ཚོས་བསམ་ཤེས་བྱེད་ཐུབ་པ་ནི་བོད་མིའི་སྒྲིག་འཛུགས་ཀྱི་དམིགས་ཡུལ་གཙོ་བོ་བཙན་བྱོལ་བོད་མི་རྣམས་རང་ཡུལ་བོད་ལ་ལོག་ཐུབ་པ་བྱ་རྒྱུ་དེ་ཡིན།
སྤྱིར་བཏང་བོད་མི་རྣམས་ཕ་སྤྲེའུ་བྱང་ཆུབ་སེམས་དཔའ་དང་མ་བྲག་སྲིན་མོ་ནས་མཆེད་པའི་མི་རྒྱུད་ཡིན་པ་བརྗོད་ཀྱི་ཡོད། ༧རྒྱལ་དབང་སྐུ་ཕྲེང་རིམ་བྱོན་རྣམས་ཆོས་སྲིད་གཉིས་ཀྱི་ཐད་ནས་བོད་པ་ཚོར་ཐུན་མོང་མ་ཡིན་པའི་འབྲེལ་བ་ཡོད། དེར་བརྟེན་ཕྱི་ལོ་ ༢༠༡༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཆབ་སྲིད་དང་འཛིན་སྐྱོང་གི་ཐུགས་འགན་ཡོངས་སུ་རྫོགས་པ་མང་ཚོགས་ཀྱིས་འོས་འདེམས་བྱས་པའི་འགོ་ཁྲིད་ང་ལ་རྩིས་སྤྲོད་གནང་བ་དེ་བོད་ཀྱི་མང་གཙོ་འཕེལ་རིམ་ཁྲོད་མདུན་བསྐྱོད་ཆེན་པོ་ཞིག་རེད།
མང་གཙོའི་སྒྲིག་འཛུགས་ཤིག་ཡིན་ན། ངེས་པར་དུ་རྒྱལ་ཁབ་ཅིག་དགོས་ཀྱི་ཡོད། འོང་ཀྱང་བཙན་བྱོལ་བོད་མིའི་མང་གཙོ་ནི་རྒྱལ་ཁབ་མེད་པའི་མང་གཙོའི་སྒྲིག་འཛུགས་ཤིག་རེད། བཙན་བྱོལ་བོད་མི་རྣམས་འཛམ་གླིང་ས་ཕྱོགས་གང་སར་ཁ་ཐོར་ནས་གནས་ཡོད། དེར་བརྟེན་བཀའ་ཤག་གིས་ཐག་གཅོད་ཅིག་བྱེད་དགོས་ཚེ། འཛམ་གླིང་གི་ས་ཕྱོགས་གང་སར་གནས་པའི་བོད་མིའི་མི་འབོར་མང་ཉུང་མ་བལྟས་པར་གསལ་བསྒྲགས་གཏོང་དགོས།
འཛམ་གླིང་ནང་བཙན་བྱོལ་བ་བྱེ་བ་ ༦ ཡོད། ཡིན་ཡང་བྱེ་བ་དྲུག་ཡོད་པའི་ཁྲོད་ནས་མང་གཙོ་ལོངས་སུ་སྤྱོད་བཞིན་པ་ནི་བཙན་བྱོལ་བོད་མི་གཅིག་པུ་རེད། འདས་པའི་མི་ལོ་ལྔ་ཅུ་ལྷག་རིང་བཙན་བྱོལ་བོད་མིའི་མང་གཙོའི་སྒྲིག་འཛུགས་སྲ་བརྟན་བཟོས་ཡོད། ང་ཚོ་བཙན་བྱོལ་བོད་མིའི་སྒྲིག་འཛུགས་ལ་མང་གཙོའི་ཀ་བ་གསུམ་ཡོད། དེ་དག་ནི་བཙན་བྱོལ་བོད་མིའི་ཁྲིམས་ལུགས་དབང་འཛིན་དང་། བོད་མི་མང་སྤྱི་འཐུས་ལྷན་ཚོགས། འཛིན་སྐྱོང་བཀའ་ཤག་བཅས་རེད། ཅེས་སོགས་ཀྱི་གསུང་བཤད་གནང་རྗེས་ཚོགས་བཅར་བ་རྣམ་པས་དྲི་བ་དྲིས་པ་ཁག་དང་ལེན་གྱིས་ལན་འདེབས་གནང་ཡོད་པ་བཅས། །
