༢༠༡༨ ཟླ་ ༤ ཚེས་ ༢༩ རེས་གཟའ་ཉི་མ།
༄༅། །ཕྱི་ལོ་ ༢༠༡༨ ཟླ་ ༤ ཚེས་ ༢༣ ཉིན་གྱི་ཕྱེད་ཡོལ་ཆུ་ཚོད་ ༤།༣༠ ཐོག་བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་གིས་ཁེ་ན་ཌའི་གྲོས་ཚོགས་འོག་མའི་ཕྱི་འབྲེལ་ལས་དོན་དང་རྒྱལ་སྤྱིའི་ཡར་རྒྱས་བསྟི་གནས་ཁང་གི་རྒྱུན་ལས་ཚོགས་ཆུང་ནང་བརྙན་འཕྲིན་བརྒྱུད་བོད་དོན་ཉན་ཞིབ་གནང་སྐབས་བོད་ནང་གི་ཛ་དྲག་གནས་སྟངས་སྐོར་ཞིབ་ཕྲ་གསལ་བཤད་གནང་འདུག
སྐབས་དེར་ཁོང་གིས་བོད་ནང་ཕྱི་ལོ་ ༢༠༠༩ ནས་བཟུང་ད་བར་བོད་མི་ ༡༥༢ ཀྱིས་རང་ལུས་མེར་སྲེག་བཏང་བ་མ་ཟད། རྒྱ་ནག་གཞུང་གིས་གསེར་རྟ་བླ་རུང་སྒར་དང་ཡ་ཆེན་སྒར་གཏོར་བཤིག་བཏང་བ་མ་ཟད། བོད་ཀྱི་སྐད་ཡིག་སྲུང་སྐྱོབ་ལས་འགུལ་སྤེལ་མཁན་བོད་མི་བཀྲ་ཤིས་དབང་ཕྱུག་ཞུ་བ་འཛིན་བཟུང་བྱས་པའི་གནས་སྟངས་དཔེ་མཚོན་དུ་བཀོད་ནས་རྒྱ་ནག་གཞུང་གིས་དེང་སྐབས་བོད་ནང་ཉིན་རེ་བཞིན་ཆབ་སྲིད་དམ་བསྒྲགས་དང་། དཔལ་འབྱོར་ཟུར་འབུད། རིག་གཞུང་དང་ཁོར་ཡུག་རྩ་མེད་གཏོང་བཞིན་ཡོད་པའི་སྐོར་གསུངས།
ཕྱོགས་མཚུངས་སྐབས་དེར་སྐུ་ཚབ་དོན་གཅོད་ཀྱིས་ཁེ་ན་ཌའི་སྲིད་གཞུང་གིས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཤེས་ཡོན་གོང་འཕེལ་ལས་གཞིའི་ཐོག་ད་བར་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུ་དང་ཡི་རངས་བསྔགས་བརྗོད་ཞུས་པ་དང་སྦྲགས། བོད་མིའི་སྐད་ཡིག་དང་ལེགས་སྦྱང་། ཤེས་ཡོན་སོགས་འཛིན་སྐྱོང་སྤེལ་གསུམ་གྱི་ལས་གཞིའི་ཐོག་མུ་མཐུད་རྒྱབ་སྐྱོར་གནང་ཆེད་རེ་འདུན་ཤུགས་ཆེ་བཏོན་འདུག
དེ་བཞིན་སྐུ་ཚབ་དོན་གཅོད་ཀྱིས་དབུ་མའི་ལམ་གྱི་སྲིད་བྱུས་བརྒྱུད་བོད་ཀྱི་གནད་དོན་གསལ་ཐུབ་རྒྱུར་ཡིད་ཆེས་བྱེད་བཞིན་ཡོད་སྟབས། སྲིད་བྱུས་འདི་ལམ་ལྷོངས་ལྡན་པ་ཡོང་ཆེད་ཁེ་ན་ཌའི་གཞུང་གིས་རྒྱབ་སྐྱོར་ཡོང་བའི་འབོད་སྐུལ་ཞུས་འདུག་པ་བཅས།།
