ཁ་ལི་ཧྥོ་ནི་ཡ་ California མངའ་གཞུང་ནས་ཀྱང་བོད་ཀྱི་སྐད་ཡིག་གྲངས་ཉུང་མི་རིགས་ཀྱི་སྐད་ཡིག་ལ་ངོས་འཛིན་གནང་རོགས།

གསར་ལས་ཁང་གི་གསར་འགོད་པས།

༢༠༡༨-༠༤-༡༨

༢༠༡༨ ཟླ་ ༤ ཚེས་ ༡༨ རེས་གཟའ་ལྷག་པ།

༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་གིས་ཨ་རིའི་སི་ལི་ཁོན་ Silicon Valley དེང་རབས་འཕྲུལ་རིགས་གྲོང་སྡེའི་འགོ་ཁྲིད་དང་། མངའ་སྡེའི་གྲོས་ཚོགས་གོང་འོག་འཐུས་མི། དེ་བཞིན་གྲོང་ཁྱེར་བྷར་ཀེ་ལེ་ Berkeley སྤྱི་ཁྱབ་པ་མཆོག་བཅས་དང་མཇལ་འཕྲད་གནང་ཡོད།

ཕྱི་ལོ་ ༢༠༡༨ ཟླ་ ༤ ཚེས་ ༡༦ ཉིན་བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་གིས་ཨ་རིའི་ནུབ་ཕྱོགས་གྲོང་ཁྱེར་སན་ཕི་རན་སི་སི་ཁོ་ San Francisco ནང་ཡོད་པའི་དེང་རབས་འཕྲུལ་རིགས་གྲོང་སྡེའི་ Silicon Valley འགོ་ཁྲིད་དང་། Ripcord ཞེས་པའི་མཉེན་ཆས་འཕྲུལ་རིགས་ལས་ཁང་གསར་འཛུགས་གནང་མཁན་གྱི་ཕྱག་རོགས་(Co-founder of Ripcord) ཡིན་པའི་སྐུ་ཞབས་ཨེ་ལེག་ཧྤེལ་ཌོན་ Alex Fieldong མཇལ་ནས་བོད་མིའི་ཤེས་ཡོན་སྤྱི་དང་། ལྷག་པར་བྱང་ཨ་རིའི་ཁུལ་གྱི་བོད་རིགས་གཞོན་སྐྱེས་སེམས་ཁུར་ཅན་རྣམས་ཀྱི་བོད་ཀྱི་སྐད་ཡིག་ཡར་རྒྱས་གཏོང་རྒྱུའི་མ་འོངས་ལས་འཆར་ལ་རྒྱབ་སྐྱོར་གནང་སྐྱོང་ཡོང་བའི་སྐོར་སོགས་ཞུས་འདུག

སྐུ་ཞབས་ཨེ་ལེག་ཧྤེལ་ཌོན་ Alex Fieldong ངོས་ནས་བོད་ཐུན་མིན་རིག་གཞུང་དང་ངོ་བོ་སྲུང་སྐྱོབ་བྱེད་རྒྱུར་ཐུགས་སྣང་ཆེན་པོ་གནང་བ་དང་འབྲེལ་གང་ཐུབ་ཕྱག་རོགས་གནང་རྒྱུའི་རྣམ་འགྱུར་གསལ་འདོན་གནང་འདུག

གཞན་ཡང་བྱང་ཁ་ལི་ཧྥོ་ནི་ཡ་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་སྐུ་ཚབ་དོན་གཅོད་ལས་ཁང་གི་རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་དང་། སྐུ་ཚབ་དོན་གཅོད་ལས་ཁང་གི་བོད་རིགས་འབྲེལ་མཐུད་པ་བསྟན་འཛིན་ཚེ་དཔག་ལགས་གཉིས་ཀྱིས་ཁ་ལི་ཧྥོ་ནི་ California ཡ་མངའ་སྡེའི་བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་འཛིན་རང་གྲོལ་ལགས་དང་ལྷན། མངའ་སྡེའི་གྲོས་ཚོགས་གོང་མའི་འཐུས་མི་ Senator སྐུ་ཞབས་སི་ཀོ་ཊི་ཝིའི་ནར་ Scott Weiner མཆོག་དང་། གྲོས་ཚོགས་འོག་མའི་ཚོགས་གཙོ་སྐུ་ཞབས་ཨན་ཐོ་ནི་རན་ཌོན་ Anthony Rendon མཆོག དེ་བཞིན་ཁོང་གི་ཕྱག་རོགས་གྲོས་ཚོགས་འོག་མའི་ཚོགས་གཙོའི་ལས་ཁུངས་ཀྱི་རྒྱལ་སྤྱིའི་འབྲེལ་ལམ་ཚན་པའི་འགན་འཛིན་ཨན་ཁ་ལི Anka Lee ལགས། འགན་འཛིན་གཞོན་པ་རྗོ་སེ་ཨལ་ཝར་དོ་ Jose Alvarado བཅས་མཇལ་འཕྲད་གནང་འདུག

མཇལ་འཕྲད་སྐབས་ཨ་རིའི་གཞུང་དང་གྲོས་ཚོགས་ནས་བོད་དང་བོད་མིར་གདུང་སེམས་མཉམ་སྐྱེས་མཚོན་སླད་དེ་སྔ་ཨ་རིའི་ཕྱི་སྲིད་ལས་ཁུངས་ནང་བོད་ལུགས་ལོ་གསར་སྲུང་བརྩི་དང་། གྲོས་ཚོགས་ནང་དུའང་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་ཉིན་མོ་སྲུང་བརྩི་ཞུས་པར་བརྟེན། གཞིས་ལུས་བོད་མིའི་བསམ་བློའི་ནང་སྤོབས་པ་དང་རེ་བ་གསར་པ་ཞིག་སྦྱིན་ཐུབ་པ་མ་ཟད། རྒྱལ་ཁབ་གཞན་གྱི་གྲོས་ཚོགས་ལའང་མིག་དཔེར་འོས་པ་ཞིག་ཆགས་ཡོད་སྟབས་ཐུགས་རྗེ་ཆེ་ཞུས་པ་དང་སྦྲགས། ཁ་ལི་ཧྥོ་ནི་ California མངའ་སྡེའི་གྲོས་ཚོགས་ནས་ཀྱང་བོད་ཀྱི་ཆོས་དང་ལེགས་བྱང་། ངོ་བོ་སོགས་སྲུང་སྐྱོབ་ཆེད་རྒྱབ་སྐྱོར་གྱི་ལས་འགུལ་སྤེལ་གནང་ཡོང་བའི་འབོད་སྐུལ་ཡང་ཞུས་འདུག

དེ་བཞིན་བོད་མིའི་སྐུ་ཚབ་རྣམ་པས་སྐབས་དེར་ཉེ་ཆར་ཨ་རིའི་མངའ་སྡེ་ཝེ་སི་ཀོན་སིན་ Wisconsin ནས་བོད་ཀྱི་སྐད་ཡིག་དེར་གྲངས་ཉུང་མི་རིགས་ཀྱི་སྐད་ཡིག་ལ་ངོས་འཛིན་གནང་བ་ལྟར། ཨ་རིའི་ནང་གི་བོད་མིའི་མི་འབོར་མང་ཤོས་ཨང་གསུམ་པ་ཡིན་པ་ཁ་ལི་ཧྥོ་ནི་ཡ་ California མངའ་གཞུང་ནས་ཀྱང་དེ་མཚུངས་ངོས་འཛིན་གནང་སྐྱོང་ཡོང་བའི་འབོད་སྐུལ་ཡང་ཞུས་པར། ཁོང་རྣམས་ནས་ཀྱང་བོད་མིའི་སྐུ་ཚབ་ཚོའི་རེ་འདུན་བཏོན་པ་དེར་གཟབ་ནན་ཐོག་གསན་འཇོག་གནང་བ་མ་ཟད། གང་ཐུབ་འབད་བརྩོན་གནང་རྒྱུའི་ཁས་ལེན་ཡང་གནང་འདུག

འོན་ཀྱང་ལས་དོན་དེ་དག་མཇུག་སྐྱོང་ཇི་ལྟར་གནང་མིན་རིམ་བཞིན་བོད་རིགས་སྤྱི་མཐུན་ཚོགས་པ་དང་ཐད་ཀར་འབྲེལ་བ་གནང་རྒྱུ་ཡིན་སྐོར་གསུངས་པ་དང་འབྲེལ། ལོ་ཤས་གོང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གྲོས་ཚོགས་ཀྱི་ཚོགས་ཁང་ཆེན་མོའི་ནང་ཆིབས་སྒྱུར་བཀའ་དྲིན་བསྐྱངས་པ་དྲན་གསོ་གནང་ནས་འབྱུང་འགྱུར་མི་རིང་བར་༸གོང་ས་༸སྐྱབས་མགོན་ཆེན་པོ་མཆོག་སླར་ཡང་གྲོས་ཚོགས་ཀྱི་ཚོགས་ཁང་ཆེན་མོའི་ནང་གདན་འདྲེན་ཞུ་རྒྱུའི་སྐལ་བཟང་གི་ཉིན་མོ་ངང་སྒུག་ཞུ་བཞིན་ཡོད་པའི་རྣམ་འགྱུར་གསལ་འདོན་གནང་འདུག

ཕྱོགས་མཚུངས་ཕྱི་ཚེས་ ༡༧ ཉིན་སྐུ་ཚབ་དོན་གཅོད་མཆོག་དང་། སྤྱི་མཐུན་ཚོགས་པའི་ཚོགས་གཙོ་བསྟན་འཛོན་རང་གྲོལ་ལགས་ཀྱིས་སྦིར་ཀེ་ལི་ Berkeley གྲོང་ཁྱེར་གྱི་སྤྱི་ཁྱབ་ Mayor ཇི་སེི་ཨ་རིའི་གུ་ཨན་ Jesse Arreguín མཆོག་མཇལ་ཞིང་། མཇལ་འཕྲད་སྐབས་སྐུ་ཚབ་དོན་གཅོད་མཆོག་ནས། གྲོང་ཁྱེར་དེས་དུས་རྒྱུན་བོད་རིགས་སྤྱི་མཐུན་ཚོགས་པའི་ལས་དོན་རྣམས་ལ་རྒྱབ་སྐྱོར་གནང་དང་གནང་མུས་ཡིན་པར་བརྟེན་བོད་མི་ཡོངས་ཀྱི་ཚབ་ཞུས་ནས་ཐུགས་རྗེ་ཆེ་ཞུས་པ་དང་འབྲེལ། མ་འོངས་པར་གྲོང་ཁྱེར་ལས་ཁུངས་ནས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དང་། བོད་ལུགས་ལོ་གསར་སྲུང་བརྩི་ཞུ་རྒྱུས་གཙོས་ལས་དོན་འདྲ་མིན་སྣ་ཚོགས་ཐོག་ནས་བོད་དང་བོད་མིར་རྒྱབ་སྐྱོར་གནང་ཐབས་གནང་རོགས་ཞེས་ཞུས་པ་དང་སྦྲགས། ལྷག་པར་བོད་ཀྱི་སྐད་ཡིག་སྲུང་སྐྱོབ་སླད་གྲོང་སྡེའི་ལས་ཁུངས་ནས་གཞུང་འབྲེལ་ཡིན་མིན་གྱི་ཐབས་ལམ་སྣ་ཚོགས་ཐོག་ནས་རྒྱབ་སྐྱོར་གནང་ཐུབ་ཚེ་དཀའ་སྡུག་མྱོང་བཞིན་པའི་གཞིས་ལུས་བོད་མིའི་སྙིང་སྟོབས་འཕེལ་རྒྱུར་དགེ་མཚན་ཆེན་པོ་ཡོད་པར་བརྟེན་དེ་ལྟར་དགོངས་བཞེས་ཡོང་བའི་འབོད་སྐུལ་ཡང་ཞུས་པ་མ་ཟད། སྐུ་ཚབ་དོན་ཁང་གི་ཉིན་རེའི་ལས་དོན་བྱེད་ཕྱོགས་སྐོར་ངོ་སྤྲོད་སྙིང་བསྡུས་དང་སྦྲགས། གལ་ཏེ་གྲོང་ཁྱེར་གྱི་སྤྱི་ཁྱབ་པ་མཆོག་མ་འོངས་པར་བཙན་བྱོལ་བོད་མིའི་གནས་སྟངས་མཁྱེན་རྟོགས་སླད་བཞུགས་སྒར་དྷརྨ་ཤཱ་ལར་ཐུགས་ཁོམ་ནམ་བྱུང་ཡང་བཙན་བྱོལ་བོད་མིའི་སྒྲིག་འཛུགས་ནས་དུས་རྟག་ཏུ་ཕེབས་བསུའི་གྲ་སྒྲིག་ཡོད་སྐོར་གསུངས།

ཐེངས་འདིའི་མཇལ་འཕྲད་སྐབས་བྱང་ཁ་ལི་ཧྥོ་ནི་ཡ་བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་འཛིན་རང་གྲོལ་ལགས་དང་། སྐུ་ཚབ་དོན་དོན་ཁང་གི་རྒྱ་རིགས་འབྲེལ་མཐུད་པ་ཀུན་དགའ་བཀྲིས་ལགས་དང་། བོད་རིགས་འབྲེལ་མཐུད་པ་བསྟན་འཛིན་ཚེ་དཔག་ལགས་མཉམ་བཅར་ཞུས་ཡོད་པ་དང་། མཇལ་འཕྲད་གོ་སྒྲིག་གནང་མཁན་ནི་བྱང་ཁ་ལི་ཧྥོ་ནི་ཡ་བོད་རིགས་སྤྱི་མཐུན་ཚོགས་པ་ཡིན་པ་མ་ཟད། སྐུ་ཚབ་དོན་གཅོད་ཐེངས་འདིར་ས་གནས་སུ་བཅར་སྐབས་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོས་གཙོས་རྒྱུན་ལས་རྣམ་པས་གང་ཅིའི་ཕྱག་རོགས་དང་གཞོགས་འདེགས་ཚགས་ཚུད་གནང་བར་དོན་ཁང་ནས་ཡི་རང་བསྔགས་བརྗོད་གནང་འདུག་པ་བཅས། །

གསར་གནས།