༢༠༡༨ ཟླ་ ༤ ཚེས་ ༢༤ རེས་གཟའ་མིག་དམར།
༄༅། །ཕྱི་ལོ་ ༢༠༡༨ ཟླ་ ༤ ཚེས་ ༢༤ ཉིན་ཐེ་ཝན་སྐུ་ཚབ་དོན་ཁང་གིས་ལོ་འཁོར་མོར་ཐེ་ཝན་གཞུང་མང་ལ་ཐུགས་རྗེ་ཆེ་ཞུའི་ལས་འགུལ་གྱི་ཆ་ཤས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཞོན་སྐྱེས་ཚོར་བྱམས་བརྩེ་དང་ཀུན་ཁྱབ་འགན་ཁུར་ཐོག་སྩལ་བའི་བཀའ་སློབ་Compassion and Global Responsibilityཁག་གཅིག་རྒྱ་ཡིག་ནང་ཕྱོགས་སྒྲིག་ཞུས་པ་དབུ་འབྱེད་དང་སྦྲགས། ཡུལ་དེར་སྐུ་ཚབ་དོན་ཁང་བཙུགས་ནས་ལོ་ ༢༠ འཁོར་བ་དང་། བོད་མི་རྣམས་བཙན་བྱོལ་དུ་འབྱོར་ནས་ལོ་ངོ་ ༦༠ འཁོར་བའི་དུས་དྲན་གཉིས་འཛོམས་སྲུང་བརྩི་ཞུས་པ་བརྒྱུད་ཐེ་ཝན་གཞུང་མང་ལ་ཐུགས་རྗེ་ཆེ་ཞུའི་ལས་འགུལ་སྤེལ་འདུག སྐབས་དེར་བཀའ་སློབ་དེབ་གྲངས་ ༥༥༠༠༠ ཐེ་ཝན་རྒྱལ་ཡོངས་སུ་འགྲེམས་སྤེལ་ཞུ་རྒྱུ་མ་ཟད། རྒྱ་སྐད་དར་སྲོལ་ཡོད་པའི་འཛམ་གླིང་རྒྱལ་ཁབ་དང་ཚོགས་པ་སྒྲིག་འཛུགས་ཡོངས་རྫོགས་ལ་ཕྱག་དེབ་དེ་འགྲེམས་སྤེལ་ཞུ་རྒྱུ་ཡིན་འདུག
ཕྱོགས་མཚུངས་སྐུ་ཚབ་དོན་ཁང་གིས་དེ་ཉིན་བོད་ཀྱི་རྒྱལ་དར་གསལ་བའི་བཀོལ་བདེའི་སིམ་བྱང་ easy card ཞིག་དབུ་འབྱེད་གནང་འདུག སིམ་བྱང་དེའི་སྟེང་བོད་ཀྱི་རྒྱལ་དར་ཙམ་མ་ཟད། ཐེ་ཝན་ནང་བོད་ཀྱི་སྐུ་ཚབ་དོན་ཁང་བཙུགས་ནས་ལོ་ ༢༠ དང་། བོད་མི་རྣམས་བཙན་བྱོལ་དུ་འབྱོར་ནས་ལོ་ངོ་ ༦༠ འཁོར་བའི་དུས་དྲན་སྲུང་བརྩི་ཞུ་བཞིན་པ་གསལ།
བཀོལ་བདེའི་སིམ་བྱང་དེར་ཁྱད་ཆོས་གང་ཡོད་བརྗོད་ན། འགྲིམ་འགྲུལ་སྐབས་དང་ཟ་ཁང་། ཚོང་ཁང་བཅས་ནང་ལས་སླ་པོའི་ཐོག་ནས་བཀོལ་ཆོག་འདུག མི་རིང་བར་སིམ་བྱང་དེ་ཐེ་ཝན་ནང་གི་བོད་རིགས་དང་བོད་དོན་རྒྱབ་སྐྱོར་བ། བོད་ཀྱི་གྲོགས་པོ་ཚོ་ལའང་འགྲེམས་སྤེལ་གནང་རྒྱུ་ཡིན་འདུག
ལོ་འདིའི་ལོ་མགོར་ཐེ་ཝན་སྐུ་ཚབ་དོན་ཁང་གིས་ཐེ་ཝན་གཞུང་མང་ལ་ཐུགས་རྗེ་ཆེ་ཞུའི་ལོ་ཐོ་འགྲེམས་སྤེལ་གནང་བ་མ་ཟད། ཡུལ་དེའི་གྲོང་ཁྱེར་ཆེ་ཁག་གི་གཞུང་ལམ་གཙོ་གྲས་རྣམས་ཀྱིས་མཚོན་གཞུང་ལམ་ཆེ་ཆུང་སྣ་ཚོགས་ཐོག་ཐེ་ཝན་གཞུང་མང་གཉིས་ལ་ཐུགས་རྗེ་ཆེ། ཞེས་འཁོད་པའི་སྦྱར་ཡིག་མང་པོ་སྦྱར་ཡོད་འདུག་པ་བཅས།
