༢༠༡༨ ཟླ་ ༤ ཚེས་ ༢༣ རེས་གཟའ་ཟླ་བ།
༄༅། །བྱང་ཀོ་རི་ཡའི་སྲིད་གཞུང་གིས་འཕྲལ་མར་རྡུལ་ཕྲན་མཚོན་ཆ་ཚོད་ལྟ་མཚམས་འཇོག་བྱ་རྒྱུའི་གཞུང་འབྲེལ་གསལ་བསྒྲགས་སྤེལ་བར་བོད་མིའི་བླ་ན་མེད་པའི་དབུ་ཁྲིད། འཛམ་གླིང་ཞི་བདེའི་དེད་དཔོན་ཆེན་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་དགྱེས་ཚོར་ཆེན་པོས་འཚམས་འདྲི་མཛད་དོན།
བྱང་ཀོ་རི་ཡ་སྲིད་གཞུང་གིས་རྡུལ་ཕྲན་མཚོན་ཆ་ཚོད་ལྟ་བྱ་རྒྱུ་འཕྲལ་མར་མཚམས་འཇོག་བྱ་རྒྱུའི་གསལ་བསྒྲགས་སྤེལ་བར་ངོས་ཀྱིས་དགའ་བསུ་ཞུ་རྒྱུ་དང་། ལྷག་པར་ལྷོ་བྱང་ཀོ་རི་ཡ་གཉིས་དབར་གྲོས་མོལ་བརྒྱུད་མོས་མཐུན་ཡོང་ཐབས་བྱེད་བཞིན་པའི་དུས་སྐབས་འདིར་ཐག་གཅོད་དེ་འདྲ་ཞིག་གནང་བ་དེས་ངོས་ལ་བློ་སྟོབས་དམིགས་བསལ་ཞིག་སྤེལ་བྱུང་།
ཡུལ་གཉིས་ཀྱི་དབུ་ཁྲིད་རྣམ་གཉིས་མི་རིང་བར་མཇལ་འཕྲད་གནང་རྒྱུ་མ་ཟད། དེ་རྗེས་ཨ་རིའི་སྲིད་འཛིན་མཆོག་དང་ལྷན་ཚོགས་གནང་རྒྱུ་ཡིན་སྟབས། གྲོས་མོལ་དེ་དག་མཛའ་བརྩེ་དང་གུ་ཡངས། ཕྱི་གསལ་ནང་གསལ་ཐོག་ནས་སྔར་གྱི་མི་མཐུན་པ་རྣམས་སེལ་ཏེ། ཡིད་ཆེས་ཀྱི་ཁོར་ཡུག་བསྐྲུན་པ་བརྒྱུད་ཀོ་རི་ཡ་གླིང་ཕྲན་ཁྱོན་ཡོངས་རྡུལ་ཕྲན་མཚོན་ཆ་བྲལ་བའི་ཞི་བདེའི་མངའ་ཁུལ་ཞིག་ཡོང་ཐུབ་རྒྱུར་ངོས་ལ་རེ་བ་ཆེན་པོ་ཡོད།
ཞི་བདེའི་ཁོར་ཡུག་སྐྲུན་རྒྱུའི་ལས་དོན་དེ་དག་གལ་ཏེ་ལམ་ལྷོངས་ལྡན་པ་བྱུང་ཚེ་ས་གནས་གཞན་ལའང་མིག་དཔེར་འོས་པ་ཆགས་ཐུབ་རྒྱུ་མ་ཟད། རིམ་བཞིན་འཛམ་གླིང་ཁྱོན་ཡོངས་སུ་རྡུལ་ཕྲན་མཚོན་ཆ་རྩ་མེད་བཟོ་རྒྱུའི་ཐད་བཟང་ཕྱོགས་ཀྱི་ཤུགས་རྐྱེན་ཧ་ཅང་འཐེབ་ཐུབ་རྒྱུ་རེད།
ངོས་རང་ཉིད་ལ་མཚོན་ན། འཛམ་གླིང་ཁྱོན་ཡོངས་རྡུལ་ཕྲན་མཚོན་ཆ་དང་བྲལ་ཞིང་དམག་འཐབ་སྤོང་བའི་ཁོར་ཡུག་ཞིག་སྐྲུན་རྒྱུར་ཁ་ཞེ་གཉིས་མེད་ཐོག་འབད་བརྩོན་བྱེད་མཁན་ཞིག་ཡིན་སྟབས། ཐེངས་འདིར་བཟང་ཕྱོགས་ཀྱི་རྣམ་འགྱུར་དེ་དག་གི་ཤུགས་རྐྱེན་འོག་དོན་དམ་གྱི་ཞི་བདེ་བརྟན་ལྷིང་ལྡན་པའི་འཛམ་གླིང་ཞིག་སྐྲུན་རྒྱུར་རེ་བ་ཞུ་རྒྱུ་ཡིན། ཞེས་འཁོད་འདུག་པ་བཅས།།
