༢༠༡༨ ཟླ་ ༣ ཚེས་ ༢༣ རེས་གཟའ་པ་སངས།
༄༅། །ཨ་རིའི་གྲོས་ཚོགས་ཀྱི་ཕྱི་ལོ་ ༢༠༡༨ ཟླ་ ༩ རྩིས་འགོའི་ནང་བོད་རང་སྐྱོང་ལྗོངས་ཀྱིས་གཙོས་བོད་མི་གནས་སྡོད་ཀྱི་ས་ཁུལ་ཁག་གི་ནང་བོད་ཀྱི་ཆོས་དང་རིག་གཞུང་། ཤེས་ཡོན། ཁོར་ཡུག་སྲུང་སྐྱོབ་བཅས་ཀྱི་ཆེད་རོགས་དངུལ་ཨ་སྒོར་ས་ཡ་ ༨ དང་། དེ་བཞིན་རྒྱ་བལ་གཉིས་ནང་ཡོད་པའི་བོད་མིའི་རིག་གཞུང་སྲུང་སྐྱོབ་དང་སྤྱི་ཚོགས་སྲ་བརྟན་བརྒྱུད་མི་རབས་རྗེས་མའི་འགོ་ཁྲིད་ཀྱི་ནུས་པ་གསོ་སྐྱོང་བཅས་ཀྱི་ཆེད་རོགས་དངུལ་ཨ་སྒོར་ས་ཡ་ ༦ གནང་རྒྱུ་མ་ཟད། རྩིས་འགོ་དེའི་འོག་རོགས་དངུལ་ཨ་སྒོར་ས་ཡ་ ༣ ཆེད་མངགས་བོད་མིའི་བསྟི་གནས་ཁང་དང་འཛིན་སྐྱོང་ཚགས་ཚུད་ཆེད་གནང་གཏན་འཁེལ་འདུག དེར་བརྟེན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨ་རིའི་གཞུང་ལ་ཐུགས་རྗེ་ཞུ་དོན། བོད་མིའི་སྤྱི་ཚོགས་ལ་ཨ་རིའི་གཞུང་གིས་ཐེངས་འདིར་གྲོས་ཚོགས་ནང་དཔལ་འབྱོར་རོགས་རམ་རྒྱ་ཆེ་གནང་བར་བཀའ་དྲིན་ཆེ་ཞུ་རྒྱུ་ཡིན། ཞེས་གསུངས།
དེ་སྔ་སྲིད་འཛིན་ཊམ་གྱིས་བོད་མི་རྣམས་ལ་རོགས་དངུལ་རྩ་བ་ནས་གནང་རྒྱུ་མིན་པའི་རྣམ་འགྱུར་བསྟན་པར་བརྟེན། གཞིས་བྱེས་བོད་མི་རྣམས་ལ་སེམས་འཚབ་ཧ་ཅང་བྱུང་ཡོད་ཀྱང་ད་ཆ་དེ་སྔའི་རོགས་དངུལ་ཡོད་མུས་ཁར་ཨ་སྒོར་ས་ཡ་ ༣ འཕར་མ་གནང་ཡོད་པ་བཅས།།
