༢༠༡༨ ཟླ་ ༣ ཚེས་ ༢༨ རེས་གཟའ་མིག་དམར།

༄༅། །ཕྱི་ལོ་ ༢༠༡༨ ཟླ་ ༣ ཚེས་ ༢༨ ཉིན་བཀའ་ཤག་གི་ཚོགས་ཁང་ནང་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་གར་གཞུང་དམངས་གཉིས་ལ་ཐུགས་རྗེ་ཆེ་ཞུའི་ལས་འགུལ་གྱི་ཆ་ཤས་སུ་བོད་ཀྱི་ཟློས་གར་ཚོགས་པས་ཕྱོགས་སྒྲིག་ཞུས་པའི་ཐུགས་རྗེ་ཆེ་ཞུའི་གླུ་དབྱངས་དང་། དེ་བཞིན་རྒྱ་གར་གཞུང་དམངས་གཉིས་ལ་ཐུགས་རྗེ་ཆེ་ཞུའི་ལས་རིམ་གོ་སྒྲིག་ཚོགས་ཆུང་ནས་པར་སྐྲུན་གནང་བའི་དཔེ་དེབ་ ” འཕགས་བོད་གཉིས་དབར་གནའ་དེང་གི་འབྲེལ་ལམ་”  དང་།  “འཕགས་བོད་དབར་གྱི་འདས་དང་མ་འོངས་པའི་སྐྱིད་སྡུག་མཉམ་མྱོང་གི་མཛའ་འབྲེལ ” དེ་བཞིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་ཕྱོགས་སྒྲིག་གནང་བའི་ “ཕྱི་ལོ་ ༢༠༡༧ ལོའི་དུས་འཁོར་དབང་ཆེན་ཐེངས་ ༣༤ པའི་དྲན་རྟེན་དཔེ་དེབ་” བཅས་དབུ་འབྱེད་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༢ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་དང་། དཔལ་འབྱོར་བཀའ་བློན་ཀརྨ་ཡེ་ཤེས་མཆོག འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག  ཐུགས་རྗེ་ཆེ་ཞུའི་ལས་རིམ་གོ་སྒྲིག་ཚོགས་ཆུང་གི་ཚོགས་གཙོ་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་དང་། དྲིལ་བསྒྲགས་དྲུང་ཆེའི་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས།  ཆོས་རིག་དྲུང་ཆེ་ལུང་རྟོགས་ལགས། ནང་སྲིད་དྲུང་ཆེ་འཆི་མེད་རིག་འཛིན་ལགས།  བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་ལགས་དང་འབྲེལ་ཡོད་ལས་བྱེད་ཕོ་མོ་ཁག་གཅིག  ཕྱི་ནང་གི་གསར་འགོད་པ་བཅས་ཁྱོན་མི་གྲངས་ ༣༠ བརྒལ་བའི་དབུས་དཔལ་ལྡན་སྲིད་སྐྱོང་མཆོག་གིས་དབུས་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་བཅས་ནས་དཔེ་དེབ་ཁག་དབུ་འབྱེད་གནང་།

དེ་རྗེས་དཔལ་ལྡན་སྲིད་སྐྱོང་མཆོག་གིས་གསར་འགོད་པའི་དྲི་བར་ལན་འདེབས་གནང་དོན། བོད་དང་བོད་ཀྱི་རྩ་དོན་ཐོག་རྒྱ་གར་གཞུང་དམངས་གཉིས་ལས་ལྷག་པའི་བཀའ་དྲིན་ཆེ་བ་སུ་རྒྱལ་ཁབ་གཞན་སུ་ཡང་མེད།   ང་ཚོས་མཛད་སྒོ་ཁག་སོགས་གང་དུ་ཡིན་ནའང་རྒྱ་གར་གཞུང་དམངས་གཉིས་ཧ་ཅང་བཀའ་དྲིན་ཆེན་པོ་ཡིན། ཞེས་དུས་རྟག་ཏུ་ཞུ་མུས་ཡིན། འོན་ཀྱང་ངག་ཐོག་ནས་ཐུགས་རྗེ་ཆེ་ཞུ་བ་ལྟར་དུས་ནས་དུས་སུ་ཐུགས་རྗེ་ཆེ་ཞུའི་ལས་འགུལ་དངོས་སུ་སྤེལ་དགོས་རྒྱུ་ཧ་ཅང་གལ་ཆེན་པོ་ཡིན།  མི་གཅིག་གི་མི་ཚེའི་ནང་ལོ་དྲུག་ཅུ་བརྗོད་སྐབས་ཧ་ཅང་དུས་ཡུན་རིང་པོ་དང་གལ་ཆེན་པོ་ཞིག་ཆགས་ཡོད། 

རྒྱལ་ཁབ་ཞིག་གི་གཞུང་དམངས་ནས་བོད་ཀྱི་རྩ་དོན་སླད་དུས་ཡུན་རིང་པོ་དེ་ཙམ་རིང་རྒྱབ་སྐྱོར་དང་མཐུན་འགྱུར་རོགས་རམ་གནང་བ་དེར་ང་ཚོས་སྙིང་ཐག་པ་ནས་ཐུགས་རྗེ་ཆེ་ཞུ་དགོས་པ་ནི་འཇིག་རྟེན་ལུགས་དང་མཐུན་པ་ཞིག་ཡིན་པ་མ་ཟད།  ཧ་ཅང་གལ་ཆེན་པོ་ཞིག་ཀྱང་ཆགས་ཡོད།  དེར་བརྟེན་བོད་མིའི་སྒྲིག་འཛུགས་ནས་ཐེངས་འདིར་རྒྱ་གར་གཞུང་དམངས་གཉིས་ཀྱི་བཀའ་དྲིན་རྗེས་སུ་དྲན་པའི་ཐོག་ནས་ཐུགས་རྗེ་ཆེ་ཞུའི་ལས་འགུལ་སྤེལ་དགོས་པ་ཧ་ཅང་གལ་ཆེན་པོར་བརྩི་ནས་ཐེངས་འདིར་ཕྱི་ཟླ་ ༣ ཚེས་ ༣༡ ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་རའི་ནང་མཛད་སྒོ་སྲུང་བརྩི་ཞུ་རྒྱུ་རེད།

ཐེངས་འདིར་དེ་སྔ་དང་མི་འདྲ་བ་གང་ཡོད་ཅེ་ན། རྒྱ་གར་གཙོ་བོར་གྱུར་བའི་བོད་མི་གནས་སྡོད་བྱ་ཡུལ་ས་གནས་གང་དུ་ཡིན་ཡང་ས་གནས་ཡུལ་རྒྱལ་ཁབ་སོ་སོའི་གཞུང་དམངས་གཉིས་ལ་ལས་འགུལ་གཅིག་མཚུངས་སྤེལ་རྒྱུ་རེད། ཅེས་སོགས་གསུངས།

གཞས་ཚིག

ཐུགས་རྗེ་ཆེའོ་འཕགས་པའི་ཡུལ།

འཛམ་གླིང་ཤེས་རིག་འོད་ཟེར་གང་ནས་ལེགས་པར་འཚེར།
རིག་བྱེད་དང་ནི་སྔོན་རབས་བདེན་པའི་མེ་ཏོག་བཞད།
ལྷག་པར་མཛེས་པའི་རྒྱལ་ཁབ་འདི་ཉིད་གོ་ལའི་ཕུད།
འདི་འདྲའི་རྒྱལ་ཁབ་འཛམ་གླིང་འདི་ན་རྒྱ་གར་ཙམ།

དོན་དམ་སློབ་མར་གྱུར་བའི་གངས་ལྗོངས་བོད་མི་ཚོས།
བཀའ་དྲིན་ཟླ་མེད་སློབ་དཔོན་འཕགས་པའི་ཡུལ་ལ་གུས་ཕྱག་འབུལ།
བདག་ཅག་ཁྱེད་ཀྱི་བརྩེ་བས་བསྐྱངས་པའི་སྐྱེད་མོས་ཚལ།
རང་གི་ངོ་བོ་མི་བརླག་འཚོ་བ་ཁྱེད་ཀྱི་དྲིན།
འགྲོ་བའི་དཔལ་ཡོན་སྐྱོང་བའི་མགོན་སྐྱབས་ཁྱེད་ཉིད་ཀྱིས།
འཛམ་གླིང་ཡང་ཐོག་བདག་ཚོར་ཚེ་སྲོག་གཉིས་པ་བྱིན།

ཁ་བའི་འདབ་མ་བྱུར་བུར་སྤུངས་པའི་རི་རྒྱལ་བཞིན།
རིག་པའི་གནས་ཀྱིས་རབ་ཏུ་ཕྱུག་པའི་འཕགས་ཡུལ་དང་།
བོད་ཡུལ་དབར་གྱི་མི་ལོ་སྟོང་ཕྲག་དུ་མའི་མཛའ་འབྲེལ་མཚར།
འཕགས་བོད་ཆོས་དང་རིག་གཞུང་སྐད་ཡིག་ལེགས་བྱང་སོགས།
མཚར་སྡུག་གཟུགས་བརྙན་ཇི་དབྱེར་མེད་རྣམ་པར་བཀྲ།
འདི་ལྟའི་རིན་བྲལ་འབྲེལ་བ་སྲིད་ན་མེད།

གྲངས་ལས་འདས་པའི་བོད་ཀྱི་ལོ་ཙྭ་གོང་མ་ཚོས།
ཚངས་པའི་ཡི་གེའི་གཟུགས་དང་མངོན་བརྗོད་འཆི་མེད་མཛོད།
ལེགས་སྦྱར་བརྡ་སྤྲོད་ཀ་ཙན་དབྱངས་གསུམ་མཐར་ཕྱིན་ནས།
བཀའ་དང་བསྟན་བཅོས་ལ་སོགས་བོད་ཀྱི་སྐད་དུ་སྒྱུར།
རྣམ་ནོན་ཚུལ་ཁྲིམས་དང་ནི་ནཱལཾདཱ་ཡི་ལྟེ་གནས་སུ།
མཁན་སློབ་ཇོ་གསུམ་ཞབས་ལ་བཏུད་ནས་ཐོས་བསམ་མཛད།

སྒྲ་སྒྱུར་ལོ་ཙྭ་མང་པོས་ཕྱུག་པའི་གངས་ལྗོངས་པས།
འཕགས་པའི་ཡུལ་ལ་བརྒྱ་ཕྲག་ཕྱག་དང་གུས་པས་འདུད།
ལོ་ཙྭའི་དྲིན་ལས་འཕགས་བོད་རིག་གནས་དཔལ་ཡོན་མཐུད།
པཎ་གྲུབ་རྣམས་ཀྱི་ཞབས་ལ་སྒོ་གསུམ་གུས་ཕྱག་འཚལ།

གོ་ལའི་ཁྱོན་ལ་ངེས་ལེགས་ལམ་གྱི་རེ་ཁ་གཏོད།
འཕགས་པའི་ཡུལ་དང་བོད་ཀྱི་མཛའ་འབྲེལ་ངོ་མཚར་ཆེ།
ཁྱེད་ནི་གོ་ལ་ཁྱིམ་གཅིག་འཛིན་པའི་ཞི་བདེའི་མ།
ཞི་དྲག་ལས་ཀྱི་གནས་ལ་མཁས་ཤིང་འཇིགས་པ་བྲལ།

ཆོས་ལྡན་བྷོ་ཊའི་ལྗོངས་སུ་རྒྱ་དམར་དཔུང་འཛུལ་གྱིས།
ས་མཐར་གྱར་བའི་བོད་མིར་སྐྱབས་བྱིན་སློབ་དཔོན་མཆོག
དོན་དམ་འགྲོ་བའི་རིན་ཐང་སྐྱོབ་པོས་རྗེས་སུ་འཇུག
བོད་ཀྱི་དཔལ་ཡོན་ལེགས་བྱང་མི་ཚེའི་འགྲོ་ལུགས་བཅས།
ཁྱེད་ཀྱིས་བསྐྱབས་ཤིང་མི་རིགས་རང་གི་ངོ་བོ་བྱིན།
ཕྲུ་གུར་ཤེས་ཡོན་མཐུན་རྐྱེན་སྦྱོར་བའི་སློབ་གྲྭ་དང།
ཆོས་རིག་ལེགས་བྱང་སྲུང་བའི་མཐོ་སློབ་གསར་འཛུགས་མཛད།
གཞི་རྩའི་འཚོ་བའི་མཐུན་རྐྱེན་རང་དགར་ཕུན་སུམ་ཚོགས།

ཁྱེད་ཀྱི་པང་དུ་མི་ལོ་དྲུག་ཅུའི་འཚོ་བར་རོལ།
དྲིན་ཤེས་ཚོར་བ་ལྕི་ཡང་ལེགས་གསོའི་ཚིག་གིས་ཕོངས།
བཀའ་དྲིན་ཆེ་འོ་དྲིན་ཆེན་རྒྱ་གར་མི་མང་ཚོ།
ཁྱེད་ཚོའི་ཐུགས་དཀྱེལ་ཡངས་པའི་ནུས་པ་ཤེས་བཞིན་གུས།
མཛེས་སྡུག་ལྡན་པའི་ཡུལ་འདི་གོ་ལའི་གཙུག་གི་རྒྱན།
སྲིད་ན་འདྲན་ཟླ་བྲལ་བ་རྒྱ་གར་འཕགས་པའི་ཡུལ།
རླབས་ཆེན་རྒྱལ་ཁབ་ཁྱེད་ལ་གུས་ཕྱག་གྲངས་མེད་འབུལ།
ཐུགས་རྗེ་ཆེའོ་བཀའ་དྲིན་ཆེའོ་འཕགས་པའི་ཡུལ།
ཐུགས་རྗེ་ཆེའོ་བཀའ་དྲིན་ཆེའོ་འཕགས་པའི་ཡུལ།