༢༠༡༨ ཟླ་ ༣ ཚེས་ ༢༨ རེས་གཟའ་ལྷག་པ།
༄༅། །སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་མཆོག་གི་ཚ་མོ་ཉི་མ་ལྷ་མོ་ལགས་ཀྱིས་ཨོ་གླིང་གྲོས་ཚོགས་Australian parliament ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་ཆུང་ནང་ཉན་ཞིབ་སྐབས་གསལ་བཤད་གནང་ཡོད།
དེ་ཡང་གུ་ཡངས་ཆབ་སྲིད་ཚོགས་པའི་ Liberal Party གྲོས་ཚོགས་འཐུས་མི་དང་། དེ་སྔ་བདེ་སྲུང་བློན་ཆེན་ཡིན་པ་སྐུ་ཞབས་ཀེ་ཝིན་ཨེན་ཌིའུ་ Kevin Andrews མཆོག་དབུ་བཞུགས་ཐོག་ཉན་ཞིབ་གནང་སྐབས། ཉི་མ་ལྷ་མོ་ལགས་ཀྱིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ཐོག་མར་རྒྱ་ནག་གཞུང་གིས་ཉེས་མེད་འཛིན་བཟུང་བཀག་ཉར་བྱས་པའི་བརྒྱུད་རིམ་ངོ་སྤྲོད་གནང་བ་མ་ཟད། མཐར་རིན་པོ་ཆེ་མཆོག་རྒྱ་ནག་གི་བཙོན་དུ་དོགས་གཞི་ཧ་ཅང་ཆེ་བའི་གནས་སྟངས་འོག་སྐུ་གྲོངས་པའི་གནས་ཚུལ་སོགས་གསུངས་པ་དང་སྦྲགས། ཨོ་གླིང་ཐོབ་ཐང་ཚོགས་ཆུང་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་དམ་པ་ཁོང་སྐུ་འདས་གྲོངས་སུ་གྱུར་བའི་གནད་དོན་ཐད་ཞིབ་འཇུག་ཆེད་ངེས་པར་དུ་རྒྱ་ནག་གཞུང་ལ་རེ་འདུན་འདོན་དགོས་པའི་འབོད་སྐུལ་ཡང་ཞུས་འདུག
ཕྱོགས་མཚུངས་ཕྱི་ལོ་ ༢༠༠༩ ནས་ཟུང་བོད་ནང་རང་ལུས་མེར་སྲེག་གི་ལས་འགུལ་བསྟུད་མར་སྤེལ་བཞིན་པའི་གནད་དོན་ཐད་ཉི་མ་ལྷ་མོ་ལགས་ཀྱིས་གསུང་དོན། ངས་ཀྱང་རང་སྲོག་བློས་གཏོང་བྱ་བརྩིས་བྱས་ཡིན། སྐབས་དེར་ངའི་བསམ་བློའི་ནང་གལ་ཏེ་ངས་དེ་འདྲ་བྱས་ཚེ་རྒྱལ་སྤྱིའི་སྤྱི་ཚོགས་ཀྱིས་བོད་མིའི་དཀའ་ངལ་ཐོག་དོ་སྣང་ཞིག་བྱེད་མི་ཡོང་ངམ་བསམ་པའི་རེ་བ་ཞིག་བཅངས་པ་ཡིན།
བོད་མི་དེ་ཙམ་མང་པོ་ཞིག་གིས་རང་ལུས་མེར་སྲེག་གི་ལས་འགུལ་སྤེལ་དགོས་དོན་ནི། རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་འོག་བོད་མི་རྣམས་ལ་རང་ཉིད་དཀའ་སྡུག་ཇི་འདྲ་མྱོང་བཞིན་པའི་ཚོར་བ་རྣམས་ཕྱིར་རང་དབང་ཐོག་འདོན་རྒྱུའི་ཐོབ་ཐང་རྩ་བ་ནས་མེད། དེར་བརྟེན་ཁོང་རྣམས་འ་ཆད་འུ་ཐུག་ནས་ལས་འགུལ་དེ་འདྲ་སྤེལ་བ་ཞིག་ཆགས་ཡོད། ཅེས་གསུངས།
སྐབས་དེར་ཉན་ཞིབ་ཚོགས་གཙོ་སྐུ་ཞབས་ཀེ་ཝིན་ཨེན་ཌིའུ་ Kevin Andrews མཆོག་གིས་ཉི་མ་ལྷ་མོ་ལགས་ཀྱི་སྙིང་སྟོབས་ལ་བསྔགས་བརྗོད་རྒྱ་ཆེ་གནང་བ་དང་སྦྲགས་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུའི་ཁས་ལེན་ཡང་གནང་འདུག
དེ་བཞིན་ངལ་སྩོལ་ Labor Party ཆབ་སྲིད་ཚོགས་པའི་གྲོས་ཚོགས་འཐུས་མི་ལྕམ་སྐུ་མེ་རི་ལིན་སྭན་སོན་ Meryln Swanson མཆོག་གིས་ཉི་མ་ལྷ་མོ་ལགས་དང་ཁོང་གི་ནང་མི་རྣམས་ལ་གདུང་སེམས་མཉམ་སྐྱེ་དང་སྦྲགས་མྱ་ངན་གུས་འདུད་ཞུས་པ་མ་ཟད། ཉི་མ་ལྷ་མོ་ལགས་ཀྱི་རང་གི་མི་རིགས་ཀྱི་དོན་དུ་ཞུམ་པ་མེད་པའི་སྙིང་སྟོབས་ལ་བསྔགས་བརྗོད་རྒྱ་ཆེ་གནང་འདུག
དེ་ཡང་ཉི་མ་ལྷ་མོ་ལགས་དེང་སྐབས་ཨོ་གླིང་གྲོང་ཁྱེར་འདྲ་མིན་ནང་ཉིན་གྲངས་བཅུ་རིང་བོད་དོན་རྒྱབ་སྐྱོར་ཐོབ་ཐབས་སླད་ལས་འགུལ་རྒྱ་ཆེ་སྤེལ་བཞིན་པ་དང་། ཁོང་གི་ཕྱག་རོགས་སུ་ཕྱི་དྲིལ་འགྲོ་བ་མིའི་ཐོབ་ཐང་ཚན་པའི་འགན་འཛིན་སྐལ་ལྡན་མཚོ་མོ་ལགས་ཀྱང་ཕེབས་ཡོད་པ་བཅས།།
