༢༠༡༨ ཟླ་ ༣ ཚེས་ ༡༦ རེས་གཟའ་པ་སངས།

༄༅། །རྒྱལ་སྤྱིའི་བོད་དོན་ལས་འགུལ་ཁང་ International Campaing for Tibet དབུ་བརྙེས་ནས་ལོ་ངོ་ ༣༠ འཁོར་བའི་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འདྲི་མཛད་པའི་ནང་འཁོད་དོན། ཕྱི་ལོ་ ༡༩༥༠ ང་གྲངས་ལོ་མཇུག་མཚམས་དང་ཕྱི་ལོ་ ༡༩༦༠ སྐབས་རྒྱ་ནག་དམར་ཤོག་འགོ་ཁྲིད་མཁྲེགས་འཛིན་པ་ཚོས་དྲག་པོའི་དམག་ཤུགས་འོག་ནས་བོད་ཀྱི་གནད་དོན་དེ་རྩ་མེད་དུ་གཏང་ཐུབ་རྒྱུ་ཡིན་པར་ཡིད་ཆེས་བྱས་ཡོད། འོན་ཀྱང་ད་ཆ་ལོ་ངོ་ ༦༠ འཁོར་ལ་ཉེ་བའི་མཚམས་འདིར་ཡང་བོད་ཀྱི་གནད་དོན་ནམ་ཡང་རྩ་ཡལ་དུ་གཏང་མ་ཐུབ་པར་གནས་ཡོད།

 སྤྱིར་རྒྱལ་ཁབ་སོ་སོ་སྒེར་ལས་སྤྱིའི་ཁེ་ཕན་དེ་གཙོ་ཆེ་བ་ཡིན།  ལྟ་གྲུབ་དེར་གཞི་བཅོལ་ནས་ངོས་རང་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་མཉམ་གནས་བྱ་རྒྱུར་འདོད་བབ་ཡོད། སྤྱི་མཐུན་ཚོགས་པའི་ཐ་སྙད་ཀྱང་རྒྱ་སྐད་ནང་ gongheguo ཡོད། དེར་བརྟེན་རྒྱ་མིའི་ལམ་སྲོལ་ནང་དུའང་ལམ་ལུགས་དེ་ཡོད་པ་ཞིག་རེད།  དེ་ཡང་སྐར་མ་བརྒྱད་ཅན་གྱི་གསུང་འཕྲིན་དེའི་ནང་༸གོང་ས་མཆོག་གིས་མུ་མཐུད་བཀའ་སློབ་སྩལ་དོན། བོད་ཀྱི་གནད་དོན་དེ་འགྲོ་བ་མིའི་ཐོབ་ཐང་གི་གནད་དོན་རྐྱང་པ་ཞིག་ལ་ངོས་འཛིན་བྱེད་མི་རུང་།  བོད་ཀྱི་གནད་དོན་བརྗོད་སྐབས་བོད་ཀྱི་ཐུན་མིན་ཆོས་དང་རིག་གཞུང་བཅས་པར་སྲུང་སྐྱོབ་ཀྱི་གནད་དོན་ཞིག་ཆགས་ཡོད།

 ད་ཆ་བོད་ཀྱི་གནའ་རབས་ཀྱི་རིག་གཞུང་ལ་དོ་སྣང་བྱེད་མཁན་ཁྲོད་རྒྱ་རིགས་གཙོས་མི་མང་ཇེ་མང་དུ་འགྲོ་བཞིན་ཡོད། རིག་གཞུང་དེ་དག་རྒྱ་གར་གནའ་རབས་དཔལ་ནཱ་ལེནྡཱ་ནས་དར་བ་ཞིག་ཡིན།  ཚན་རིག་པ་ཚོས་ཀྱང་དོ་སྣང་བྱེད་བཞིན་འདུག

 བློའི་རྣམ་གཞག་དང་སེམས་ཁམས་རིག་པའི་ལྟ་གྲུབ་དང་འབྲེལ་བའི་བོད་ཀྱི་གནའ་བོའི་རིག་གནས་དེ་དག་གིས་འགྲོ་བ་མི་རིགས་སྤྱིའི་ལུས་སེམས་བདེ་ཐང་ཡོང་རྒྱུར་ཞབས་འདེགས་རྒྱ་ཆེ་བསྒྲུབ་ཐུབ་རྒྱུ་རེད། དཔལ་ནཱ་ལེནྡཱི་ལེགས་བཤད་ལ་མཚོན་ནའང་ལེགས་བཤད་དེ་དག་ཆ་ལག་ཚང་བ་ཞིག་ད་ཆ་གཟིགས་དགོས་ན་བོད་ཡིག་དང་བོད་སྐད་ནང་ཡོད་པ་ནང་བཞིན་ཧ་ལམ་སྐད་ཡིག་གཞན་ནང་རྙེད་དཀའ། དེར་བརྟེན་བོད་མི་ཚོས་སངས་རྒྱས་ཀྱི་བསྟན་པར་ཞབས་འདེགས་ཕུལ་བྱུང་ཞིག་སྒྲུབ་ཐུབ་ཡོད། ཅེས་ཕལ་ཆེར་ཞུ་ཆོག  ནང་པ་མིན་མཁན་ཚོ་ལའང་ནང་ཆོས་ནས་གསུང་པའི་ཚད་མ་རིག་པ་དང་སེམས་ཁམས་རིག་པའི་རྣམ་གཞག་དེ་དག་ཕན་ཐོགས་ཡོང་ངེས། སྤྱིར་རྣམ་གཞག་དེ་དག་ནང་པའི་གཞུང་ནས་གསུངས་ཡང་རྣམ་གཞག་དེ་དག་རིས་མེད་ཀྱི་རྣམ་གཞག་ཡིན་སྟབས་ཤེས་ཡོན་གྱི་ངོ་བོའི་ཐོག་ནས་གཟིགས་དགོས།

ང་ཚོས་རྒྱུན་ལྡན་ལུས་པོའི་འཕྲོད་བསྟེན་གལ་ཆེར་བརྩི་བ་ལྟར་ངོས་ཀྱིས་བསམ་བློའི་འཕྲོད་བསྟེན་དགོས་གལ་ཡིན་པ་བརྗོད་བཞིན་ཡོད། དེ་བྱུང་ན་ལུས་སེམས་གཉིས་ཀ་བདེ་ཐང་ཞིག་ཡོང་ཐུབ། དེར་བརྟེན་བོད་ཀྱི་གནའ་རབས་སྲོལ་རྒྱུན་རིག་གནས་དེ་དག་གནའ་བོའི་ལེགས་བཤད་ཡིན་པ་ཙམ་རྒྱུ་མཚན་དུ་བྱས་ནས་གཅེས་ཉར་བྱེད་དགོས་ཟེར་བ་ཞིག་མ་རེད། རིག་གནས་དེ་དག་དེང་དུས་སྤྱི་ཚོགས་ནང་དགོས་མཁོ་དང་འབྲེལ་བ་ཡང་ཧ་ཅང་ཡོད་པ་ཞིག་ཆགས་ཡོད།

བོད་རྒྱ་གཉིས་མཐུན་འགྲིག་བྱུང་ན་ཕྱོགས་གཉིས་ཀར་ཁེ་ཕན་ཡོང་རྒྱུ་རེད། རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་ང་ཚོ་བསྡད་པ་ཡིན་ན་ང་ཚོས་རྒྱ་མི་རིགས་ལ་བོད་བརྒྱུད་ནང་བསྟན་སོགས་གནའ་བོའི་རིག་གནས་དེ་དག་བརྒྱུད་ཞབས་འདེགས་ཏན་ཏན་ཞུ་ཐུབ་རྒྱུ་དང་། བོད་མི་ཚོར་མཚོན་ནའང་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་མཉམ་སྡོད་བྱེད་སྐབས་དཔལ་འབྱོར་གྱི་ཁེ་ཕན་ཡོང་ངེས། ཞེས་བཀའ་སློབ་སྩལ་བ་མ་ཟད། དབུ་མའི་ལམ་གྱི་སྲིད་བྱུས་སྐོར་བཀའ་སློབ་སྩལ་དོན།

ཕྱི་ལོ་ ༡༩༧༤ ཙམ་ནས་ང་ཚོས་རང་བཙན་རྩོད་རྒྱུ་མིན་པའི་ཐག་གཅོད་བྱས་ཡོད། དེར་བརྟེན་ད་ཆ་དབུ་མའི་ལམ་གྱི་སྲིད་བྱུས་རྒྱུན་སྐྱོང་བྱེད་བཞིན་པ་འདིར་ཨ་རིས་གཙོས་སྲིད་གཞུང་མང་པོས་རྒྱབ་སྐྱོར་བྱེད་བཞིན་ཡོད། ལྷག་པར་ཨ་རིའི་སྲིད་འཛིན་ཨོ་བྷ་མ་མཆོག་གིས་ཕོ་བྲང་དཀར་པོའི་གསར་འགོད་གསལ་བསྒྲགས་སྤེལ་བ་བརྒྱུད་དབུ་མའི་ལམ་གྱི་ལངས་ཕྱོགས་ལ་རྒྱབ་སྐྱོར་གནང་ཡོད། ཕྱོགས་མཚུངས་རྒྱལ་ཁབ་གཞན་མང་པོ་ཞིག་གིས་རྒྱབ་སྐྱོར་གནང་བཞིན་ཡོད།   ལྷག་པར་རྒྱ་མི་རིགས་ཚོས་གནས་ཚུལ་ངོ་མ་གང་ཡིན་རྟོགས་སྐབས་བོད་དོན་ལ་དགའ་པོའི་ཐོག་ནས་རྒྱབ་སྐྱོར་བྱེད་མཁན་ཇེ་མང་དུ་འགྲོ་བཞིན་འདུག

ཁྱེད་ཚོའི་ཚོགས་པ་དེར་མཚོན་ན་ཚོགས་པ་དེ་བཙུགས་ནས་ལོ་ངོ་ ༣༠ རིང་བོད་དོན་ཐོག་ཁ་ཞེ་གཉིས་ཀྱིས་རྒྱབ་སྐྱོར་གནང་ཡོད། ངོས་ཀྱིས་དུས་རྟག་ཏུ་བོད་དོན་ལ་རྒྱབ་སྐྱོར་བྱས་པ་དེ་བོད་མིར་རྒྱབ་སྐྱོར་བྱས་པ་ཙམ་མིན་པར་བདེན་དོན་ལ་རྒྱབ་སྐྱོར་བྱས་པ་ཞིག་རེད། ཅེས་བརྗོད་བཞིན་ཡོད།  དེར་བརྟེན་ཁྱེད་ཚོས་རྒྱ་ནག་ནང་དུའང་དཀའ་ངལ་འོག་ཚུད་པའི་རྒྱ་མི་རིགས་ཚོ་ལ་རོགས་རམ་གནང་ཐུབ་ན་ཧ་ཅང་ཡག་པོ་རེད། ཅེས་བཀའ་སློབ་སྩལ།།

 ༼  གསུང་འཕྲིན་ངོ་མ་ཨིན་ཡིག་ནས་འདི་ག་ཕྱི་དྲིལ་བོད་ཡིག་ཚན་པས་ཕབ་སྒྱུར་ཞུས་པས་ཨིན་ཡིག་ལ་རྩ་འཛིན་ཡོང་བ་ཞུ། ༽