ལས་རིམ་གཅིག་ནི་བཀའ་བློན་འོས་འདེམས་ཆགས་ཀྱི་ཡོད། འབུམ་རམས་པ་པདྨ་དབྱངས་ཅན་ལགས་མང་མོས་ཐོག་ནས་བཀའ་བློན་བདམས་ཐོན་བྱུང་ཐུབ་ཡོད་པ་རེད།  མོ་རང་ཡིན་ནའང་བོད་མིའི་སྒྲིག་འཛུགས་ནང་ཕྱག་ལས་གནང་རྒྱུའི་འདོད་པ་ཡོད་པ། དེ་འདྲའི་ཐོག་ནས་མི་རིང་བར་དམ་འབུལ་ཞུ་རྒྱུ་དང་ལས་ཀ་དངོས་སུ་འགོ་འཛུགས་བའི་ཐོག་ནས་ལས་དོན་དེ་དག་ལམ་ལྷོངས་ཡོང་བར་གྲོས་ཚོགས་ངོས་ནས་སྨོན་འདུན་ཞུ་རྒྱུ་ཡིན།  ལས་རིམ་གལ་ཆེ་ཤོས་གཅིག་དཔལ་ལྡན་སྲིད་སྐྱོང་མཆོག་གིས་བཀའ་ཤག་གི་གཞུང་འབྲེལ་གསལ་བཤད་དེ་ཆགས་ཡོད་པ་རེད། དེའི་ཐོག་ལ་སྤྱི་འཐུས་མང་པོ་ཞིག་གིས་ཆ་ཤས་བཞེས་ནས། གནད་དོན་མང་པོ་ཞིག་གླེང་སློང་གནང་ཡོད་སྟབས། དེའི་ཐོག་ནས་འཛིན་སྐྱོང་གི་ལས་དོན་གནང་ཕྱོགས་ཡིན་ནའང་འདྲ། ཆབ་སྲིད་ཀྱི་ལྟ་གྲུབ་འཛིན་སྟངས་ཟེར་ན་འདྲ། གང་ལྟར་གནས་ཚུལ་དེའི་ཐོག་ནས་མ་འོངས་པར་ལག་བསྟར་གནང་བའི་སྐབས་སུ་དོན་དང་མཐུན་པ་གནད་དུ་སྨིན་པ་ཞིག་ཡོང་ཐུབ་རྒྱུ་ཆབ་སྲིད་ཀྱི་གནས་སྟངས་ཡིན་ནའང་འདྲ། འཛིན་སྐྱོང་གི་ལས་དོན་ཡིན་ནའང་འདྲ་དེ་འདྲ་ཡོང་ཐུབ་རྒྱུར་གྲོས་ཚོགས་ཀྱི་འཐུས་མི་རྣམ་པས་དགོངས་འཆར་ཕུལ་བ་དང་། འཛིན་སྐྱོང་བཀའ་ཤག་གིས་དགོངས་བཞེས་གནང་ཕྱོགས་ཀྱི་ཐོག་ནས་ལས་རིམ་དེ་དག་ཡག་པོ་བྱུང་སོང་ཞེས་ཞུ་རྒྱུ་ཡིན།

ལས་རིམ་སྐྱོང་པའི་སྐབས་སུ་༸སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་དང་། ༸སྐུའི་བླ་སྨན་པ་ཟུར་པ་སྨན་པ་ཡེ་ཤེས་དོན་ལྡན་གཉིས་ལ་རྒྱ་གར་གཞུང་གིས་གཞུང་འབྲེལ་གྱི་ཐོག་ནས་གལ་ཆེའི་གཟེངས་རྟགས་གནང་བ་དང་། ཐོབ་ཐུབ་པ་དེ་ལ་གྲོས་ཚོགས་འདིའི་ཐོག་ནས་འཚམས་འདྲི་དང་ བཀྲ་ཤིས་བདེ་ལེགས་ཞུ་རྒྱུ་ཡིན། དེ་ནས་བཀུར་འོས་སྤྱི་འཐུས་རྣམ་པ་དང་། འཛིན་སྐྱོང་བཀའ་ཤག་གི་ཐོག་ནས་དཔལ་ལྡན་སྲིད་སྐྱོང་མཆོག་གིས་དབུས་བཀའ་བློན་རྣམ་པས་གྲོས་ཚོགས་ཀྱི་ལས་རིམ་ནང་ལ་ཆ་ཤས་བཞེས་པའི་སྐབས་སུ་བསམ་ཚུལ་སྤུང་རྒྱུ་དང་། དེ་བཞིན་བོད་མིའི་སྒྲིག་འཛུགས་ཀྱི་འཛིན་སྐྱོང་རེད། བོད་དོན་བདེན་མཐའ་གསལ་ཐབས་དེ་ཚོའི་ཐོག་ལ་གཙོ་བོ་དངོས་ཤུགས་རྒྱུད་གསུམ་ནས་ཐུགས་ཕན་སོས་རྒྱུའི་རེ་བ་དང་ཡིད་ཆེས་ཞུ་གི་ཡོད། དེ་བཞིན་གྲོས་ཚོགས་ཀྱི་ལས་རིམ་ཆ་ཚང་བ་ཐོག་མར་ཚོགས་གཙོ་གཉིས་ཀྱིས་གང་སྒྲིག་པ་ནང་བཞིན་མཇུག་སྐྱོང་ཐུབ་པ་དེ། གཙོ་བོ་གྲོས་ཚོགས་ཀྱི་ཚོགས་མི་རྣམ་པ་ཚང་མའི་ཐོག་ནས་ནུས་པ་མཉམ་སྤུང་དང་། འགན་ཁུར་མཉམ་བཞེས་ཀྱི་ཐོག་ནས་བྱུང་བ་ཡིན་དུས་འཛིན་སྐྱོང་བཀའ་ཤག་དང་བཀུར་འོས་སྤྱི་འཐུས་ཚང་མ་ལ་ཐུགས་རྗེ་ཆེ་ཞུ་རྒྱུའི་འདོད་པ་བྱུང་།

དེ་བཞིན་ལས་རིམ་སྐྱོང་པའི་སྐབས་སུ་བཀུར་འོས་སྤྱི་འཐུས་རྣམ་པས་ཆ་ཤས་བཞེས་སྟངས་ཡིན་ནའང་འདྲ། དེ་བཞིན་འཛིན་སྐྱོང་བཀའ་ཤག་གི་ཐོག་ནས་ཆ་ཤས་བཞེས་སྟངས་ཡིན་ནའང་འདྲ། ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་ལ་སྔར་ལས་ཐུགས་སྣང་ཆེ་བ་གནང་གི་ཡོད་པ་དང་། དེ་བཞིན་ཡར་རྒྱས་ཀྱི་རྣམ་པ། བགྲོ་གླེང་སོགས་ཀྱི་གནས་ཚད་ཡག་ཏུ་འགྲོ་གི་ཡོད་པའི་ཚོར་སྣང་བྱུང་། ཡིན་ནའང་གྲོས་ཚོགས་ཚོགས་ཐེངས་ལྔ་པ་འདིའི་ཐོག་སྒེར་སོ་སོ་དཀར་འདོན་ཡོང་ཐབས་ལ་བཅའ་ཁྲིམས་ལུང་འདྲེན་གནང་རྒྱུ་དང་། ཚོགས་སྡེ་སྒེར་སོ་སོ་ནས་ཡིག་ཆུང་སྙན་སྒྲོན་གནང་རྒྱུ། དེ་བཞིན་སོ་སོ་དང་འབྲེལ་བའི་ཐོག་ནས་ཡིག་ཆ་སྙན་སྒྲོན་གནང་མཁན་དེ་འདྲའི་རིགས་ཤིག་བྱུང་སོང་། གཞན་ཡང་སྤྱི་འཐུས་ནང་ཕན་ཚུན་ལ་ཚིག་མཚོན་བཤད་རེས་བྱེད་རྒྱུ་དེ་འདྲ་ཤུགས་ཆེན་པོ་ཐོན་སོང་བསམ་པའི་ཚོར་སྣང་བྱུང་། འབྱུང་འགྱུར་དེའི་རིགས་མི་ཡོང་བ་གཙོ་འདོན་གནང་དགོས་རྒྱུ་གལ་ཆེན་པོ་འདུག རྒྱུ་མཚན་ག་རེ་རེད་ཟེར་ན། ང་ཚོ་སྤྱི་པའི་སྤྱི་མི་ཞིག་ཆགས་ཀྱི་ཡོད། དེའི་ཐོག་ནས་སྒེར་ལས་སྤྱི་པའི་སྒྲིག་འཛུགས་དང་། སྤྱི་པའི་ལས་དོན་ཐོག་ལ་གལ་ཆེ་རྩི་མཁན་ཡིན་དུས་དེ་ཚོའི་ཐོག་ལ་ཏོག་ཙམ་དགོངས་པ་བཞེས་དགོས་རྒྱུ་གལ་ཆེན་པོ་འདུག་ཅེས་ཞུ་འདོད་བྱུང་།

དེ་ནས་བཀའ་མོལ་གསུང་བའི་སྐབས་སུ་ཡིན་ནའང་། ཚོགས་གཙོ་ལ་ཁ་ཕྱོགས་ནས་གསུང་དགོས་པ། དེ་ཡང་སྐད་ཡིག་གཞན་བེད་སྤྱོད་གཏོང་དུས་ཚོགས་གཙོ་ལ་བཀའ་འཁྲོལ་ཞུ་དགོས་པ་དང་། གཞན་ཡང་གྲོས་ཚོགས་ཀྱི་ཚོགས་མི་དང་། ཟུར་ཉན་པ། ལས་བྱེད་བཅས་ཀྱི་མིང་འབོད་གནང་དགོས་དུས་ཚོགས་གཙོ་ལ་བཀའ་འཁྲོལ་ཞུ་དགོས། ལས་རིམ་རྣམ་གཞག་སྟོན་པ་དེ་ཚོ་ཚད་དང་ལྡན་པ་ཞིག་ཡོང་ཐུབ་དགོས་རྒྱུར་ད་དུང་དགོངས་བཞེས་གནང་དགོས་ཀྱི་འདུག དེ་བཞིན་ཚོགས་སྡེ་བྱེ་བྲག་པ་དང་། སྒེར་སོ་སོའི་སྤྱོད་ཚུལ་ཐོག་ལ་གླེང་སློང་བྱེད་མི་དགོས་པ་གཙོ་འདོན་གནང་དགོས་རྒྱུ་དེ་གལ་ཆེན་པོ་རེད། རྒྱུ་མཚན་གང་ཡིན་ཞེ་ན། ང་ཚོ་གྲོས་ཚོགས་ཀྱི་སྡིངས་ཆ་འདི་གཙོ་བོ་བོད་སྤྱི་པ་དང་བོད་མི་ས་ཡ་དྲུག་གི་ཁེ་ཕན་དང་འབྲེལ་བ་ཆགས་ཀྱི་ཡོད། དེ་འདྲའི་དོན་གནད་ཁག་ལ་བགྲོ་གླེང་དང་དུས་ཚོད་མང་བ་གཏོང་ཐུབ་པ་ཡིན་ན། འཕྲལ་ཕུགས་གཉིས་ཀ་ལ་ཕན་ཐོགས་ཆེ་བ་ཡོང་བ་དང་། གྲོས་ཚོགས་ཀྱི་ཆེ་མཐོང་དང་སྐད་ཡིག་ཡིན་ནའང་འདྲ། གནས་ཚད་མཐོ་རུ་འགྲོ་རྒྱུ་རང་བཞིན་གྱིས་ཆགས་ཀྱི་འདུག དེའི་ཐོག་ལ་གྲོས་ཚོགས་ཀྱི་ཚོགས་མི་ཚང་མས་དགོངས་པ་ཟབ་བཞེས་དགོས་རྒྱུ་གལ་ཆེན་པོ་རེད་འདུག་ཅེས་ཞུ་འདོད་བྱུང་།

དེ་བཞིན་བོད་མིའི་སྒྲིག་འཛུགས་ལ་བཅའ་ཁྲིམས་ཀྱི་འགན་དབང་བཀུར་བའི་གནད་དོན་རིགས་གཅིག་ཡོད་པ་རེད། གཙོ་བོ་བོད་དོན་བདེན་མཐའ་གསལ་ཐབས་དང་། བཙན་བྱོལ་བོད་མིའི་སྤྱི་ཚོགས་བདེ་ཐབས། བོད་ཀྱི་ཁོར་ཡུག་སྲུང་སྐྱོབ། གནས་སྐབས་སུ་གཞིས་ལུས་བོད་མི་རྣམས་དཀའ་ངལ་ལས་སྐྱོབ་ཐབས་བྱ་རྒྱུ་དེ་དག་འཁོད་ཡོད། ལྷག་པར་སྒྲིག་འཛུགས་ཀྱིས་བསྒྲུབ་བྱ་གཙོ་བོ་ནི། བོད་བདེན་མཐའ་གསལ་ཐབས་ཀྱི་ཐབས་བྱུས་ཡང་དག་ལ་འབད་བརྩོན་གནང་དགོས་རྒྱུ་དེ་ཆགས་ཀྱི་ཡོད། དེར་བརྟེན་ང་ཚོ་བོད་མིའི་སྒྲིག་འཛུགས་ཀྱི་འགན་ཁུར་མཁན་ཚང་མས་དོན་གནད་གལ་ཆེ་བ་དེ་དག་གི་ཐོག་ལ། ཐབས་དང་བྱུས་ལྡན་པའི་ཐོག་ནས་འགན་ཁུར་སྔར་ལྷག་གནང་དགོས་རྒྱུ་དང་། ཉེ་ཆར་དཔལ་ལྡན་སྲིད་སྐྱོང་མཆོག་གིས་བཀའ་ཤག་གི་གསལ་བཤད་ནང་དུ། ཉེ་བའི་ལོ་གཉིས་གསུམ་གྱི་ནང་དུ་འགྱུར་བ་འགྲོ་རྒྱུའི་ཁོར་ཡུག་གཅིག་ཡོད་སྐོར་གསུངས་པ་རེད། དེ་ཡང་ཁེ་དང་ཉེན་ཁ་གཉིས་ཀ་ཡོད་པ་ཞིག་གསུངས་དུས་འཛིན་སྐྱོང་བཀའ་ཤག་དང་བཀུར་འོས་གྲོས་ཚོགས་ཀྱི་འཐུས་མི་ཡིན་ནའང་འདྲ། ང་ཚོ་བོད་ཀྱི་འཐབ་རྩོད་ཀྱི་ནུས་པ་དེ་ཤུགས་ཆེ་རུ་གཏོང་ཐུབ་རྒྱུ་དང་། དམིགས་ཚད་འཛིན་ཐུབ་དགོས་པ་དེ་གལ་ཆེན་པོ་མཐོང་གི་འདུག དེ་བཞིན་རྒྱ་ཆེ་མང་ཚོགས་ནས་ཀྱང་། དེ་ལ་ཐུགས་སྣང་དང་གཞོགས་འདེགས་ཞུ་ཐུབ་དགོས་ཀྱི་འདུག དེ་འདྲའི་ཐོག་ལ་ལྷག་བསམ་དང་སེམས་ཤུགས་སྔར་ལས་ཆེ་རུ་འགྲོ་ཐུབ་རྒྱུའི་ནུས་པ་འདོན་དགོས་ཀྱི་འདུག་ཅེས་ཞུ་རྒྱུ་ཡིན།

དེ་བཞིན་བོད་ནང་གི་བོད་མི་དང་བཙན་བྱོལ་ནང་གི་བོད་མི་རྣམས་རེད། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རེ་དང་ཡིད་ཆེས་གནང་བ་དང་། བོད་མིའི་སྒྲིག་འཛུགས་ལ་ཆེ་མཐོང་དང་ནུས་པ་ཞིག་རང་བཞིན་གྱིས་སླེབ་ཀྱི་ཡོད་པ་རེད། དེ་བཞིན་ལོ་རྒྱུས་ཀྱི་བྱུང་རབས་དང་འབྲེལ་བའི་ཐོག་ནས། གལ་ཆེའི་སྒྲིག་འཛུགས་ཀྱི་རང་བཞིན་ཞིག་ཆགས་ཀྱི་ཡོད་སྟབས། བོད་མི་རིགས་ཀྱི་ཆོས་དང་། རིག་གཞུང་། སྐད་ཡིག གོམས་གཤིས་དེ་དག་ཚང་མར་རྒྱལ་སྤྱིའི་ནང་ནས་ཆེ་མཐོང་དང་། དམིགས་བསལ་ཐུགས་སྣང་གནང་སའི་གཞི་ཆགས་ཡོད། དེ་དག་གི་ནུས་པའི་འབྱུང་ཁུངས་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་དང་། དེ་བཞིན་ཁོང་གི་ཐུགས་བསྐྱེད་ལ་བརྟེན་ནས་བྱུང་བ་ཡིན་དུས། ང་ཚོས་དུས་རྒྱུན་དུ་ལས་དོན་གང་བརྩམ་པ་ཡིན་ནའང། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ལ་བསམ་ཤེས་ཞུ་ཐུབ་དགོས་པ་དང་། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རེ་གང་གནང་གི་ཡོད་པ་བཞིན། སྒྲིག་འཛུགས་ཀྱི་ལས་ཀྱི་སྣེ་མོར་གཏོགས་པ་དང་། བོད་རྒྱ་ཆེའི་མང་ཚོགས་ཡིན་ནའང་འདྲ། བཀའ་བཞིན་བསྒྲུབ་པའི་མཆོད་པས་མཉེས་པ་ཞུ་ཐུབ་དགོས་རྒྱུ་དེ་ང་ཚོ་བོད་མི་ཚང་མའི་དམིགས་ཡུལ་དང་ལས་འགན་གལ་ཆེ་ཤོས་ནང་གི་ཆེ་ཤོས་ཤིག་ཆགས་ཀྱི་འདུག

དེ་བཞིན་ཁ་སང་དབུ་འབྱེད་ཀྱི་གཏམ་བཤད་སྐབས་ཞུས་པ་ནང་བཞིན་བོད་སྤྱི་མཐུན་གྱི་བསོད་ནམས་གོང་མཐོར་ཡོང་ཐབས་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་དགུང་སྐེག་གི་སྔོན་འགྲོའི་ལོ་ཆགས་ཀྱི་ཡོད་པ་རེད། ལོ་གཞུག་མ་དངོས་གཞིའི་ལོ་ཆགས་ཀྱི་ཡོད་པ་རེད། དེ་ཚོའི་ཐོག་ལ་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ལ་ཉེར་འཚེ་ཕྲ་མོ་ཙམ་ཡང་མི་བཞེས་པའི་གསོལ་འདེབས་ཞུ་རྒྱུ་དང་། ལྷག་པར་ང་ཚོ་ཚུར་མཐོང་ཉེར་འཚེ་དེ་འདྲ་མི་བཞེས་པའི་ཆེད་དུ་སྲོག་བླུ་གཏོང་རྒྱུ་དང་། དགེ་སྒྲུབ་སྡིག་སྤོང་བྱ་རྒྱུ་དེ་ཚོའི་ཐོག་ལ་འབད་བརྩོན་ཞུ་ཐུབ་དགོས་རྒྱུ་ཧ་ཅང་གལ་ཆེན་པོ་འདུག་ཅེས་ཞུ་འདོད་བྱུང་།

སྤྱི་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རྒྱུན་དུ་ང་ཚོ་ཆོལ་ཁ་ཆོས་ལུགས་དང་བཅས་པའི་མཐུན་ལམ་ནི་ཆབ་སྲིད་དང་སྤྱི་ཚོགས་ཀྱི་གནས་སྟངས་ཐོག་ནས་གལ་ཆེན་པོ་ཞིག་ལ་རྩི་ཡི་ཡོད་སྟབས་ང་ཚོས་ཞབས་རིམ་དང་དགུང་སྐེག་ནང་ནས་ཞབས་རིམ་ཡག་ཤོས་དེ་ང་ཚོའི་ཆིག་སྒྲིལ་གྱི་ནུས་པ་དེ་འགྱུར་བ་མེད་པ་དང་ལྕགས་ཀྱི་གོང་བུ་ནང་བཞིན་ཟེར་ན་མི་འདུག གང་ལྟར་དེ་འདྲ་ཞིག་བོད་མི་ཚང་མས་བསམ་བློ་བཏང་ནས་བཅངས་དགོས་རྒྱུ་དེ་གལ་ཆེན་པོ་འདུག་ཅེས་ཞུ་རྒྱུ་ཡིན།

དེ་བཞིན་ང་ཚོ་བཙན་བྱོལ་ལ་གནས་པའི་རིང་ལ་ང་ཚོ་ནང་ཁུལ་གྱི་ཆབ་སྲིད་ལྟ་བུའི་འཁོར་ལོ་བསྐོར་བ་ཡིན་ན། ང་རང་ཚོ་ནུས་པས་མི་འདང་བ་གསལ་པོ་རེད། ནུས་པས་མི་འདང་བ་ཟེར་དུས། གང་ཟག་སྒེར་གཅིག་གིས་སྒེར་གཅིག་ལ་ཁ་གཏད་གཅོག་མི་ཐུབ་པའི་གནས་སྟངས་མ་རེད། ང་རང་ཚོ་བཙན་བྱོལ་གྱི་གནས་སྟངས་ཚང་མ་གཞན་དབང་སྟབས་བསྟུན་ཉག་གཅིག་ཆགས་ཀྱི་ཡོད། དེ་བཞིན་མི་འབོར་དང་། དཔལ་འབྱོར། སྤྱི་ཚོགས་ཀྱི་གནས་བབ་ཚང་མའི་ཐོག་ནས་ཡོང་དཀའ་བ་ཆགས་ཀྱི་ཡོད། དེར་བརྟེན་བོད་མི་ཚང་མ་ནུས་པ་མཉམ་སྤུངས་དང་འགན་འཁུར་མཉམ་བཞེས་ཡོང་ཐུབ་རྒྱུ་ལ་ཚང་མས་འབད་བརྩོན་གནང་དགོས་ཀྱི་འདུག་ཅེས་ཞུ་རྒྱུ་ཡིན།

དེ་ནས་སྤྱི་ཚོགས་ནང་ལ་འགན་འཁུར་མཁན་དང། བོད་མི་མང་ཚོགས་ཡིན་ནའང་འདྲ་སྤྱི་ཚོགས་དྲ་རྒྱའི་ནང་ལ་འགན་འཁུར་མེད་པའི་གཏམ་བཤད་འདྲ་མིན་གནང་རྒྱུ་དང་། དེ་བཞིན་རྩོམ་འབྲི་རྒྱུ་ལ་སོགས་པ་འདྲ་མིན་གནང་རྒྱུ་དེ་ཚོའི་གྲས་དེར་དགོངས་པ་བཞེས་དགོས་རེད་བསམ་གྱི་འདུག དང་པོ་སྒེར་སོ་སོའི་ཐོག་ནས་སྤྱི་ཚོགས་ལ་ཕན་པའི་ཕྱག་ལས་ག་རེ་གནང་ཐུབ་ཡོད། ནུས་པ་ག་རེ་ཐོན་ཡོད། དེ་བཞིན་སོ་སོའི་ཁྱིམ་ཚང་དང་། སོ་སོའི་ཉེ་འབྲེལ་ལ་ཕན་ཐོགས་ཐུབ་རྒྱུའི་ནུས་པ་དང་ཕྱག་ལས་ག་རེ་གནང་ཡོད། མཐའ་ན་སོ་སོའི་སྒོ་གསུམ་ལུས་ངག་ཡིད་གསུམ་གྱི་སྤྱོད་པ་ཉིན་མ་རེ་རེ་ཚུན་ཆད་དུ་མིའི་སྤྱི་ཚོགས་དང་མཐུན་པ་ཡོང་གི་འདུག་དང་མི་འདུག་ཞིབ་དཔྱད་བྱས་ནས། རྗེས་སུ་གཞི་ནས་སྤྱི་ཚོགས་དྲ་རྒྱ་དེ་ཚོ་བེད་སྤྱོད་གཏོང་རྒྱུ་དང་། བཀའ་མོལ་གསུང་རྒྱུ། རྩོམ་འབྲི་རྒྱུ་དེ་འདྲ་གནང་ཐུབ་ན། ང་ཚོའི་སྤྱི་ཚོགས་ཀྱི་གནས་ཚད་དེ་ཡང་ཚད་དང་ལྡན་པ་ཡོང་རྒྱུ་དང་། དེ་བཞིན་སྤྱི་ཚོགས་ལ་ཕན་པ། བོད་མིའི་ཆིག་སྒྲིལ་ལ་ཕན་པ། བོད་ཀྱི་ཆོས་དང་སྐད་ཡིག རིག་གཞུང་བཅས་ལ་ཕན་ཐོགས་དང་། ནུས་པ་ངེས་ཅན་ཐོན་ཐུབ་པའི་རེ་བ་ཆེན་པོ་འདུག དེར་བརྟེན་དེ་ཚོའི་ཐོག་ལ་དགོངས་པ་བཞེས་རོགས་ཞེས་དེ་རིང་དམིགས་བསལ་འབོད་བསྐུལ་ཞུ་འདོད་བྱུང་།

གྲོས་ཚོགས་འདི་ཚར་པའི་རྗེས་ལ་སྤྱི་འཐུས་རྣམ་པ་ས་བགོས་ཕྱོགས་བསྐྱོད་ཕེབས་ཀྱི་ཡོད་པ་རེད། སྐབས་དེ་དུས་མང་ཚོགས་ནས་ཀྱང་ཐུགས་སྣང་དང་མཉམ་ཞུགས་ཡོང་ཐབས་བྱེད་དགོས་ཀྱི་འདུག སྐབས་དེར་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་དང་། བོད་ནང་གི་བོད་མིའི་གནས་སྟངས། དེ་བཞིན་རྒྱལ་སྤྱིའི་ཆབ་སྲིད་ཀྱི་གནས་བབ། རྒྱ་ནག་གི་ཆབ་སྲིད་ཀྱི་འགྱུར་འགྲོས། ང་ཚོའི་གྲོས་ཚོགས་ཀྱི་ལས་རིམ་དེ་དག་ངོ་སྤྲོད་དང་། གོ་རྟོགས་སྤེལ་གྱི་ཡོད་པ་རེད། དེ་བཞིན་བཙན་བྱོལ་བོད་མིའི་གཞིས་ཆགས་ཀྱི་གནས་སྟངས་དང་། མི་མང་གི་འཕྲོད་བསྟེན། ཤེས་ཡོན། སྤྱི་ཚོགས་ཀྱི་ཐོག་ལ་འཚོ་བའི་གནས་སྟངས་ཚང་མ་ལ་གཟིགས་ཞིབ་བྱས་ནས། སྙན་ཐོ་གནང་རྒྱུ་དང་། ལྷན་ཁང་ཁག་ལ་འབྲེལ་བ་ཆགས་པ་དེ་ཚོ་དམིགས་བསལ་གྱི་འབོད་བསྐུལ་དང་། ཡིག་ཆུང་གཏོང་རྒྱུ་གནང་གི་ཡོད་པ་རེད། དེ་ཚོ་ཚད་དང་ལྡན་པ། ཞལ་གསལ་པོ་ཡོང་རྒྱུར་མང་ཚོགས་ཀྱི་ཐོག་ནས་ཆ་ཤས་བཞེས་རྒྱུ་ལ་རག་ལུས་པ་ཡིན་སྟབས། མང་ཚོགས་ཀྱི་ཐོག་ནས་ཆ་ཤས་ཡག་པོ་བཞེས་ཐུབ་པའི་རེ་བ་ཞུ་ཡི་ཡོད།

དེ་བཞིན་སྤྱི་འཐུས་ལྷན་ཚོགས་ཀྱི་ཐོག་ནས། གྲོས་ཚོགས་ཚོགས་ཐེངས་བཞི་པའི་སྐབས་སུ། སྤྱི་འཐུས་བཞུགས་མོལ་ཚོགས་འདུ་ཞིག་ཚོགས་པ་རེད། ད་རེས་ཚོགས་ཐེངས་ལྔ་པའི་སྐབས་སུ་བཞུགས་མོལ་ཚོགས་འདུ་ཞིག་ཚོགས་པ་རེད། དེའི་ནང་དུ་ཆབ་སྲིད་ཀྱི་ལས་འགུལ་སྤེལ་ཕྱོགས་དེ་ཚོ་ང་ཚོས་བང་རིམ་བསྒྲིགས་ཡོད་སྟབས་བཀུར་འོས་སྤྱི་འཐུས་རྣམ་པས་ཀྱང་། ཆབ་སྲིད་ཀྱི་ལས་འགུལ་སྤེལ་རྒྱུ་དེ་ཚོ་ཚད་དང་ལྡན་པ་ཡོང་ཐུབ་རྒྱུ་དང་། དེ་བཞིན་འབྲེལ་ཡོད་ས་གནས་ཁག་ཡིན་ནའང་། མཐུན་འགྱུར་དང་ནུས་པ་མཉམ་སྤུངས་ཡོང་ཐབས་བྱ་དགོས།

དེ་རིང་ང་ཚོ་སྐབས་བཅུ་དྲུག་པའི་གྲོས་ཚོགས་ཚོགས་དུས་ལྔ་པ་ཚགས་ཚུད་པོ་ཡོང་རྒྱུར། མཐུན་འགྱུར་གལ་ཆེ་བ་གཅིག་དེ། ཚོད་དཔག་འཆར་རྩིས་ཚོགས་ཆུང་གི་སྙན་ཐོ་དང་ལས་བསྡོམས་ཆགས་ཀྱི་ཡོད་པར་བརྟེན་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་དང་། ཚོགས་མི་ཚང་མ་ལ་ཐུགས་རྗེ་ཆེ་ཞུ་རྒྱུ་ཡིན།

དེ་བཞིན་ཚོགས་དྲུང་གཙོས་པའི་ཚོགས་དྲུང་ལས་ཁུངས་ཀྱི་ལས་བྱེད་ཡོངས་དང་། གྲོས་ཚོགས་ཀྱི་ལས་རིམ་ཐད་གཏོང་གནང་མཁན་ཕྱི་དྲིལ་ལས་ཁུངས་ཀྱི་དྲ་བརྙན་སྡེ་ཚན་དང་། ཀམ་པུ་ཊར་སྡེ་ཚན། གཏོང་ལེན་ཁྲིམས་ཡིག་ཡིག་ཆ་བཟོ་བཀོད་ཀྱི་མཐུན་འགྱུར་གནང་མཁན་དཔལ་འབྱོར་ལས་ཁུངས་ཀྱི་སྔོན་རྩིས་སྡེ་ཚན་དང་། ལོ་རྒྱུས་འབྲི་རྩོམ་ཚན་པ། བར་བརྒལ་ལས་བཀོད་སྡེ་ཚན་གྱི་འགན་འཛིན་ཚང་མ་ལ་ཐུགས་རྗེ་ཆེ་ཞུ་རྒྱུ་དང་། ལྷག་པར་དེ་རིང་གྲོས་ཚོགས་སྐྱོང་པའི་སྐབས་སུ་ལས་ཉིན་བཅུའི་རིང་ལ་སྔ་པོ་རེད། ཕྱི་པོ་བཞུགས་རྒྱུ་རེད། ཕྱི་ནང་གི་བདེ་འཇགས་ཀྱི་ཆེད་དུ་བདེ་སྲུང་ལས་ཁུངས་ཀྱི་ལས་བྱེད་རྣམས་ནས་ཐུགས་སྣང་དང་འགན་ཁུར་ཆེན་པོ་གནང་བར་བརྟེན་དེ་རིང་གོ་སྐབས་འདི་བརྒྱུད་དེ་ཐུགས་རྗེ་ཆེ་ཞུ་རྒྱུ་ཡིན། དེ་རིང་གྲོས་ཚོགས་འདི་གྲོལ་ནས་ཟླ་བ་དྲུག་རྗེས་ལ་དཔལ་ལྡན་བཀའ་ཤག་ལྷན་རྒྱས་དང་། བཀུར་འོས་སྤྱི་འཐུས་རྣམ་པ། གཟུགས་ཁམས་བདེ་པོའི་ཐོག་ནས་ལྷན་འཛོམས་ཡོང་རྒྱུའི་རེ་བ་དང་སྨོན་ལམ་ཞུ་ཡི་ཡོད།

མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་ཅིང་ཐུགས་བཞེད་ལྷུན་གྱིས་འགྲུབ་པ་དང་། བོད་དོན་བདེན་མཐའ་མྱུར་དུ་གསལ་བའི་སྨོན་འདུན་ཞུ་རྒྱུ་ཡིན། ཐུགས་རྗེ་ཆེ། ཞེས་གསུང་བཤད་གནང་རྗེས་གྲོས་ཚོགས་རྒྱལ་ཁའི་ངང་ནས་གྲོལ་ཡོད་པ་བཅས།།