༢༠༡༨ ཟླ་ ༣ ཚེས་ ༢༠ རེས་གཟའ་མིག་དམར།
༄༅། །ཕྱི་ལོ་ ༢༠༡༨ ཟླ་ ༣ ཚེས་ ༡༩ ཉིན་རྒྱ་གར་བོད་དོན་རྒྱབ་སྐྱོར་ཚོགས་པ་ Core group for Tibetan Cause དང་། རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་མོན་རྟ་དབང་དང་ནུབ་ཀ་མེང་རྫོང་ཁུལ་གྱི་རྒྱ་ཆེ་མི་མང་དང་དགོན་སྡེ་གྲྭ་ཚང་སོགས་ས་གནས་ཀྱི་གཞུང་འབྲེལ་མིན་པའི་ཚོགས་པ་ཁག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ནས་རྒྱ་གར་འཕགས་པའི་ཡུལ་དུ་ཆིབས་སྒྱུར་བསྐྱངས་ནས་ལོ་ངོ་དྲུག་ཅུ་འཁོར་ལ་ཉེ་བའི་དུས་དྲན་སྲུང་བརྩི་ཞུ་སླད་མོན་རྟ་དབང་ཆུ་དྭངས་མ་ནས་ཏེ་ཛི་པུར་ Tezpur བར་ཞི་བའི་གོམ་བགྲོད་ཀྱི་ལས་འགུལ་ཞིག་འགོ་འཛུགས་གནང་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་ཞི་བའི་གོམ་བགྲོད་ཀྱི་ལས་འགུལ་དབུ་འབྱེད་ཀྱི་མཛད་སྒོར་༸རྒྱལ་བའི་ཞབས་བརྟན་གསུང་འདོན་དང་། སྐུ་མགྲོན་གཙོ་བོ་རྟ་དབང་དགོན་པའི་མཁན་ཟུར་གུ་རུ་སྤྲུལ་སྐུ་རིན་པོ་ཆེ་མཆོག་གིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མནྜལ་རྟེན་གསུམ་འདེགས་འབུལ་ཞུས།
ཞི་བའི་གོམ་བགྲོད་ཀྱི་ལས་འགུལ་ནང་རྟ་དབང་དང་ཉེ་འཁོར་གྱི་ས་ཁུལ་ཁག་ནས་མི་མང་ ༢༠༠ ལྷག་ཙམ་མཉམ་ཞུགས་གནང་འདུག
སྐབས་དེར་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་རིན་ཆེན་མཁའ་འགྲོ་ཀེར་མི་ R.K.Khrimey ལགས་ཀྱིས་ཞི་བའི་གོམ་བགྲོད་ལས་འགུལ་འདི་ཉིད་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་ཅིང་། ༸གོང་ས་མཆོག་གི་འཛམ་གླིང་ཞི་བདེའི་སླད་རླབས་ཆེན་གྱི་མཛད་འཕྲིན་བསྐྱངས་དང་སྐྱོང་བཞིན་པ་རྣམས་གོང་ནས་གོང་དུ་འཕེལ་བའི་གསོལ་འདེབས་ཞུ་རྒྱུ་སྤྱི་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་འཕགས་པའི་ཡུལ་དུ་ཆིབས་སྒྱུར་བསྐྱངས་ཏེ་ལོ་ངོ་དྲུག་ཅུ་འཁོར་ལ་ཉེ་བའི་དུས་དྲན་སྲུང་བརྩི་ཞུ་སླད་ཡིན་སྐོར་སོགས་ངོ་སྤྲོད་གནང་།
དབུ་འབྱེད་མཛད་སྒོ་གྲུབ་མཚམས་ཞི་བའི་གོམ་བགྲོད་པ་རྣམས་ཀྱིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་བ་དང་གྲྭ་བཙུན་རྣམས་ནས་སྨོན་ལམ་གསུང་འདོན་གནང་།
ཕྱི་ལོ་ ༡༩༥༩ ལོར་༸གོང་ས་མཆོག་ཆུ་དྭངས་མ་ཞེས་འཕགས་བོད་ས་མཚམས་སུ་༸ཞབས་སོར་བདེ་བར་འཁོད་སྐབས་མགོན་པོ་གང་ཉིད་མཆོག་ལ་གསོལ་མར་དང་ཆུར་བ་འབུལ་ལམ་ཞུས་ཏེ་ཕེབས་བསུའི་སྣེ་ལེན་ཞུ་མཁན་ལྷུན་པོ་གྲོང་གསེབ་ནས་ཡིན་པ་སྐབས་དེར་རང་ལོ་ ༡༥ སོན་པ་བློ་བཟང་དཔལ་ལྡན་ལགས་ད་ལྟ་འཚོ་ཞུགས་ཡོད་པ་དང་། ཁོང་ལ་༸གོང་ས་མཆོག་གི་མཚན་རྟགས་འཁོད་པའི་སྐུ་པར་ཞིག་ལེགས་སྐྱེས་སུ་ཕུལ་འདུག
ཆུ་ཚོད་ ༡༠།༡༥ ཐོག་ཞི་བའི་གོམ་བགྲོད་དངོས་སུ་དབུ་འཛུགས་ཀྱིས་ཆུ་ཚོད་ ༡༢།༡༥ ཐོག་སྒོར་ཟམ་མཆོད་རྟེན་དུ་འབྱོར་སྐབས་ས་གནས་མི་མང་སྟོང་ཕྲག་ལྷག་གིས་ཕེབས་བསུ་སྣེ་ལེན་གཟབ་རྒྱས་ཞུས་འདུག
ཆུ་ཚོད་ ༢ ཐོག་མཛད་སྒོ་ཞིག་དབུ་འཛུགས་ཞུས་པ་དང་། མཛད་སྒོའི་ཐོག་སྐུ་མགྲོན་གཙོ་བོ་གུ་རུ་སྤྲུལ་སྐུ་རིན་པོ་ཆེ་མཆོག་གིས་གསུང་བཤད་གནང་ཡོད། དེ་བཞིན་ས་གནས་ཀྱི་གནད་ཡོད་མི་སྣ་སྐུ་མགྲོན་སྐུ་ཞབས་ཐུབ་བསྟན་ཕུན་ཚོགས་ལགས། སྐུ་ཞབས་ངག་དབང་ནོར་བུ་ལགས་སོགས་ཀྱིས་གསུང་བཤད་གནང་ཡོད་པ་བཅས། །
