མི་ནི་སོ་ཊ་བོད་རིགས་མང་ཚོགས་རྣམས་ཀྱིས་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱི་བྱས་རྗེས་ལ་ཆེ་བསྟོད་ཀྱི་གཟེངས་རྟགས་འབུལ་རྒྱུ།

གསར་ལས་ཁང་གི་གསར་འགོད་པས།

༢༠༡༨-༠༣-༢༤

༢༠༡༨ ཟླ་ ༣ ཚེས་ ༢༤ རེས་གཟའ་སྤེན་པ།

༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། འཇིགས་བྲལ་གློག་བརྙན་བཟོ་མཁན་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་རྣམ་གཉིས་ཨ་རིའི་མངའ་སྡེ་མི་ནི་སོ་ཊར་ཕེབས་ནས་ས་གནས་དེ་གའི་གྲོས་ཚོགས་ཀྱི་འཐུས་མི་ཁག་གཅིག་མཇལ་སྟེ་བོད་དོན་སྐོར་གླེང་མོལ་གནང་ཡོད།

དེ་ཡང་མི་ནི་སོ་ཊ་ས་གནས་བོད་རིགས་སྤྱི་མཐུན་ཚོགས་པས་ ༼འཇིགས་བྲལ།༽ གློག་བརྙན་བཟོ་མཁན་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་། བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་རྣམ་གཉིས་ཆེད་དུ་གདན་ཞུས་ཀྱིས་ས་གནས་བོད་རིགས་མང་ཚོགས་ལ་གསུང་བཤད་དང་། མི་ནི་སོ་ཊར་དབུས་དང་ས་གནས་ཀྱི་གྲོས་ཚོགས་འཐུས་མིར་བོད་དོན་ཞུ་འབོད་གནང་རྒྱུའི་ལས་རིམ་གྲ་སྒྲིག་གནང་ཡོད་པ་ལྟར། ཁོང་གཉིས་ ༢༠༡༨ ཟླ་བ་ ༣ ཚེས་ ༢༢ ཉིན་ས་གནས་སུ་ཕེབས་འབྱོར་བྱུང་ཞིང་། གནམ་ཐང་དུ་ཕེབས་འབྱོར་སྐབས་ས་གནས་སྤྱི་མཐུན་ཚོགས་པའི་རྒྱུན་ལས་རྣམས་ནས་ཕེབས་བསུ་ཞུས་ཡོད།

ཕྱི་ཟླ་ ༣ ཚེས་ ༢༣ ཉིན་གྱི་སྔ་དྲོ་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག ས་གནས་སྤྱི་མཐུན་ཚོགས་པའི་ཚོགས་གཙོ་ངག་དབང་འཆི་མེད་ལགས་དང་རྒྱུན་ལས་རྣམ་པས་ཁག་སོ་སོར་དབུས་ཀྱི་གྲོས་ཚོགས་འཐུས་མི་ Kelth Ellison ལགས་དང་། མངའ་སྡེའི་གྲོས་ཚོགས་ཀྱི་འཐུས་མི་ Mary Kunesh Podein ལགས། Caroline Laine, Rodger Chamberlain ཉིན་རྒྱབ་དབུས་གྲོས་ཚོགས་ཀྱི་འཐུས་མི་ Tim Walz ལགས་དང་མཇལ་འཕྲད་གནང་ཞིང་། སྐབས་དེར་ས་གནས་ཀྱི་བོད་མི་འཇིགས་མེད་དབུ་རྒྱན་ལགས་དང་། བསྟན་འཛིན་སྒྲོལ་དཀར་ལགས་མཉམ་དུ་ཕེབས་ཡོད།

དོན་གྲུབ་དབང་ཆེན་ལགས་ཀྱིས་གྲོས་ཚོགས་འཐུས་མི་རྣམས་ལ་ ༼འཇིགས་བྲལ།༽གློག་བརྙན་བཟོ་དགོས་དོན་དང་། གློག་བརྙན་བཟོས་པའི་རྒྱུ་མཚན་ལ་བརྟེན་ནས་བཙོན་དུ་ཚུད་པའི་སྐོར། བཙོན་ཁང་ནང་དང་། བཙོན་ནས་གློད་འགྲོལ་ཐོབ་རྗེས་ཀྱི་དཀའ་ངལ་བཅས་གླེང་པའི་ལམ་ནས་བོད་ནང་གི་ཆབ་སྲིད་བཙོན་པའི་གནས་སྟངས་ངོ་སྤྲོད་གནང་ཞིང་། སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་ནས་སྤྱི་ཡོངས་ཀྱི་བོད་དོན་སྐོར་གླེང་སློང་གནང་བ་དང་། གྲོས་ཚོགས་ཀྱི་འཐུས་མི་རྣམ་པས་བོད་དང་བོད་མིའི་གནས་སྟངས་ལ་དུས་རྒྱུན་དུ་ཐུགས་སྣང་གནང་བར་ཐུགས་རྗེ་ཆེ་ཞུས་པ་མ་ཟད། གོ་སྐབས་འདི་བརྒྱུད་གྲོས་ཚོགས་ཀྱི་འཐུས་མི་རྣམ་པས་ཐུགས་ཁོམས་ནམ་བྱུང་སྐབས་བོད་མིའི་སྒྲིག་འཛུགས་ཀྱི་བསྟི་གནས་བཞུགས་སྒར་རྡ་རམ་ས་ལར་འཚམས་འདྲིར་ཕེབས་གནང་ཡོང་བའི་རེ་འདུན་ཡང་ཞུས་ཡོད།

གྲོས་ཚོགས་ཀྱི་འཐུས་མི་རྣམ་པས་དོན་གྲུབ་དབང་ཆེན་ལགས་དང་སྐུ་ཚབ་དོན་གཅོད་རྣམ་གཉིས་ཀྱི་ཞུ་དོན་རྣམས་གཟབ་ནན་གྱིས་གསན་པ་དང་། ཁོང་རྣམ་པས་བོད་དང་བོད་མིར་དུས་རྟག་ཏུ་གདུང་སེམས་མཉམ་སྐྱེ་དང་རྒྱབ་སྐྱོར་ཡོད་པའི་རྣམ་འགྱུར་གསལ་སྟོན་གནང་ཡོད་པ་རེད།

ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ངག་དབང་འཆི་མེད་ལགས་ནས། དེ་རིང་ང་ཚོའི་ས་གནས་ནས་ཆབ་སྲིད་བཙོན་ཟུར་དོན་གྲུབ་དབང་ཆེན་མགྲོན་འབོད་ཞུས་ནས་ཁོང་གི་མྱོང་བ་རྣམས་ས་གནས་མང་ཚོགས་དང་། ས་གནས་གྲོས་ཚོགས་ཀྱི་འཐུས་མི་རྣམས་ལ་འགྲེལ་བརྗོད་གནང་རྒྱུའི་གྲ་སྒྲིག་ཞུ་ཐུབ་པ་དང་། སྐུ་ཚབ་དོན་གཅོད་མཆོག་ས་གནས་སུ་གཟིགས་སྐོར་དང་མང་ཚོགས་ལ་གསུང་བཤད་གནང་རྒྱུར་གདན་ཞུ་ཐུབ་པར་ཧ་ཅང་དགའ་པོ་བྱུང་ཞེས་དང་། ཐེངས་འདིའི་མཛད་རིམ་བཟོ་སྒྲིག་གི་བརྒྱུད་རིམ་ཁྲོད་རྒྱུན་ལས་རྣམས་ཕུད་། འདི་ག་ས་གནས་ནས་ཡིན་པའི་བོད་མི་འཇིགས་མེད་དབུ་རྒྱན་ལགས་དང་། བསྟན་འཛིན་སྒྲོལ་དཀར་ལགས་ནས་གང་ཅིའི་མཐུན་འགྱུར་རོགས་རམ་གནང་བར་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན་ཅེས་གསུང་གི་འདུག
ངག་དབང་འཆི་མེད་ལགས་ནས་གསུང་པར་གཞིགས་ན། ཕྱི་ཟླ་ ༣ ཚེས་ ༢༤ དགོང་མོ་དོན་གྲུབ་དབང་ཆེན་ལགས་དང་། སྐུ་ཚབ་དོན་གཅོད་རྣམ་གཉིས་ནས་མང་ཚོགས་ལ་གསུང་བཤད་གནང་རྒྱུ་དང་། གོ་སྐབས་འདི་བརྒྱུད་མི་ནི་སོ་ཊ་བོད་རིགས་སྤྱི་མཐུན་ཚོགས་པས་ས་གནས་མང་ཚོགས་ཡོངས་ཀྱི་ཚབ་ཞུས་ཏེ་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱི་བྱས་རྗེས་ལ་ཆེ་བསྟོད་ཀྱི་གཟེངས་རྟགས་ཤིག་ཀྱང་འབུལ་རྒྱུ་ཡིན་ཞེས་གསུངས།
མི་ནི་སོ་ཊ་བོད་རིགས་སྤྱི་མཐུན་ཚོགས་པ་ནི་བྱང་ཨ་རིའི་ཁྱབ་ཁོངས་ཀྱི་ས་གནས་སྤྱི་མཐུན་ཚོགས་པ་ཆེ་གྲས་ཤིག་ཡིན་པ་དང་། དོན་གྲུབ་དབང་ཆེན་ལགས་ལ་ཆེ་བསྟོད་ཀྱི་གཟེངས་རྟགས་ཕུལ་བ་དེ་ནི་མི་ནི་སོ་ཊར་བོད་རིགས་སྤྱི་མཐུན་ཚོགས་པས་བོད་ཀྱི་ཆབ་སྲིད་བཙུན་ཟུར་ཞིག་ལ་ཆེ་བསྟོད་ཀྱི་གཟེངས་རྟགས་ཕུལ་བ་ཐེངས་གཉིས་པ་ཡིན་ཞིང་། ཐེངས་དང་པོ་དེ་ཞིང་གཤེགས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་ཕུལ་ཡོད་པ་ཁོང་གི་ཚ་མོ་ཉི་མ་ལྷ་མོ་ལགས་ནས་བཞེས་ཡོད་པ་བཅས།།

གསར་གནས།