༢༠༡༨ ཟླ་ ༣ ཚེས་ ༡༢ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་བསྟན་འཛིན་ལེགས་བཤད་ལགས་ཀྱིས་སྣེ་ཁྲིད་པའི་ཉམས་ཞིབ་པ་ཁག་གཅིག་ཐེ་ཝན་དུ་ཕེབས་ཏེ་ཐེ་ཝན་གྱི་ཉམས་ཞིབ་པ་དང་། དགེ་རྒན་ཆེན་མོ། སློབ་ཕྲུག གཞུང་འབྲེལ་མིན་པའི་ཚོགས་པ། ས་གནས་བོད་མི་སོགས་དང་ཐུག་འཕྲད་ཀྱིས་བོད་ཀྱི་སྲིད་བྱུས་ཉམས་ཞིབ་ཁང་གཙོ་བོར་གྱུར་བའི་བཙན་བྱོལ་བོད་མིའི་སྒྲིག་འཛུགས་དང་། རྒྱ་གཞུང་གིས་བོད་ནང་འཛུགས་སྐྲུན་སྣ་མང་བྱས་པ་དེ་དག་རྒྱུན་ལྡན་བོད་མིའི་འཚོ་བའི་ཁྲོད་ཁེ་ཕན་ཇི་ཙམ་ཐོབ་ཡོད་མེད། བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་དང་འབྲེལ་བའི་བརྗོད་གཞིའི་ཐོག་ནས་བགྲོ་གླེང་གནང་བ་མ་ཟད། དྲི་བར་གསལ་བཤད་དང་ལན་འདེབས་སོགས་གནང་ཡོད་འདུག
དེ་ཡང་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་རྣམས་ཕྱི་ལོ་ ༢༠༡༨ ཟླ་ ༣ ཚེས་ ༦ ཉིན་རྒྱབ་ཐེ་ཝན་དུ་འབྱོར་བ་དང་། ཕྱི་ཚེས་ ༧ ཉིན་གྱི་སྔ་དྲོར་དུས་རབས་ཉེར་གཅིག་ཐེབས་རྩ་ཁང་གི་འགན་འཛིན་གཞོན་པ་དང་། ཉམས་ཞིབ་པ་ལྷན་ཐུག་འཕྲད་དང་བགྲོ་གླེང་། དེ་ཉིན་དགོང་དྲོར་བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གིས་གོ་སྒྲིག་གནང་བའི་ལྷག་དཀར་བོད་དོན་ངོ་སྤྲོད་ཀྱི་ལས་རིམ་ཐོག་གཏམ་བཤད་སྤེལ།
ཕྱི་ཚེས་ ༨ ཉིན་གྱི་སྔ་དྲོ་རྒྱལ་གཉེར་ཆབ་སྲིད་གཙུག་ལག་སློབ་ཆེན་རྒྱལ་ཁབ་འཕེལ་རྒྱས་ཉམས་ཞིབ་སྡེ་ཚན་གྱི་དགེ་སློབ་རྣམས་ལ་གཏམ་བཤད་དང་། ཕྱི་ཚེས་ ༩ ཉིན་གྱི་སྔ་དྲོ་ཐེ་ཝན་རྒྱ་ནག་སྐམ་ས་ལས་དོན་ལྷན་ཁང་གི་ཉམས་ཞིབ་པ་ཁག་གཅིག་དང་ལྷན་བགྲོ་གླེང། ཕྱི་དྲོ་ཐེ་ཝན་རྒྱལ་ཁབ་སྲིད་བྱུས་གསར་པའི་རིག་མཛོད་སྡེ་ཚན་གྱི་ཉམས་ཞིབ་པ་སོགས་དང་ལྷན་བགྲོ་གླེང་གནང་།
ཕྱི་ཚེས་ ༡༠ ཉིན་གསུམ་བཅུའི་དུས་དྲན་སྲུང་བརྩིའི་མཛད་སྒོ་གྲུབ་རྗེས། ས་གནས་བོད་མི་རྣམས་དང་ཕན་ཚུན་བགྲོ་གླེང་དང་། དགོང་དྲོ་རྒྱ་གར་སྡེ་ཚན་ཞིབ་འཇུག་གནང་མཁན་གྱི་དགེ་རྒན་ཆེན་མོ་བཅས་དང་བགྲོ་གླེང་སོགས་གནང་སྟེ་ཕྱི་ཚེས་ ༡༡ ཉིན་རྒྱ་གར་དུ་ཕྱིར་ལོག་གནང་ཡོད་པ་བཅས།།
