ཕྱི་ལོ་ ༢༠༡༨ ཟླ་ ༣ ཚེས་ ༡༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༨ ཟླ་ ༣ ཚེས་ ༡༤ ཉིན་གྱི་ཕྱེད་ཡོལ་ཆུ་ཚོད་ ༤ ཐོག་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་འོག་ཆོས་རིག་ལས་ཁུངས་ནས་གོ་སྒྲིག་ཞུས་པའི་གདུང་སེམས་མཉམ་སྐྱེའི་མཆོད་འབུལ་སྨོན་ལམ་དུ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་མཆོད་འབུལ་སྨོན་ལམ་སྐབས་གསུང་བཤད་གནང་དོན། སྐུ་བཅར་རྣམ་རྒྱལ་གྲྭ་ཚང་གི་མཁན་རིན་པོ་ཆེ་མཆོག་གིས་དབུས་སྐྱབས་གནས་དགེ་འདུན་གྱི་སྡེ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། མི་མང་རྣམ་པ། དགེ་བསྐོས་ཀྱིས་ཆོས་རིག་ལས་ཁུངས་ཀྱི་སྐྱབས་ཐོ་སྒྲོགས་སྦྱང་གནང་བ་བཞིན། བློ་ཕམ་པའི་གནས་ཚུལ་ཞིག་ལ་ཕྱི་ཟླ་ ༣ ཚེས་ ༧ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༣།༣༠ ཡས་མས་སུ་བོད་མདོ་སྨད་རྔ་པའི་རྨེའུ་རུ་མ་ཡུལ་ཚོའི་ཐོག་ཕ་ཀ་དག་དང་མ་སྐྱིད་ལྷ་གཉིས་ཀྱི་བུ་རང་ལོ་ ༤༤ ཡིན་པ་ཚེ་ཁོ་ལགས་ཀྱིས་བོད་དང་བོད་མིའི་རྩ་དོན་སླད་རྒྱ་ནག་གཞུང་ལ་ཞི་རྒོལ་གྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་འདུག ཁོང་གིས་འབོད་སྒྲ་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཁྲི་ཕྲག་བརྟན་པར་ཤོག བོད་མིར་རང་དབང་དགོས་ཞེས་པ་དེ་ཡིན།
ཁོང་ལ་ཕྲུ་གུ་བུ་མོ་གཉིས་ཡོད་འདུག་པ་དང་། རྒྱུས་ཡོད་ཀྱིས་བརྗོད་དོན་ལྟར་ན། ཚེ་ཁོ་ལགས་དུས་རྒྱུན་ཆབ་སྲིད་ལ་དོ་སྣང་དང་བོད་དོན་ལ་སེམས་ཤུགས་ཆེན་པོ་ཡོད་མཁན་ཞིག་ཡིན་པ་མ་ཟད། བོད་ཀྱི་གནད་དོན་སྐོར་འགྲེལ་བཤད་རྒྱག་ཐུབ་མཁན་སྙིང་སྟོབས་ཅན་གྱི་མི་སྣ་ཞིག་ཡིན་པ་ཧ་ཅང་གསལ་པོ་རེད་འདུག
དེ་རིང་ང་ཚོ་འདིར་འཛོམས་དགོས་དོན་ནི། ཚེ་ཁོ་ལགས་ཀྱིས་བོད་དང་བོད་མིའི་རྩ་དོན་སླད་རྒྱ་ནག་གཞུང་ལ་ཞི་རྒོལ་གྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་སྟབས། ཐུགས་སྨོན་གནང་རོགས་ཞུ་རྒྱུ་ཡིན།
ཕྱི་ལོ་ ༢༠༠༩ ཟླ་ ༢ ཚེས་ ༢༧ ཉིན་དགེ་འདུན་པ་བཀྲ་བྷེ་ལགས་ཀྱིས་འགོ་འཛུགས་ཀྱིས་ད་བར་གཞིས་ལུས་བོད་མི་ཁྱོན་མི་གྲངས་ ༡༥༢ ནས་བོད་བསྟན་སྲིད་དང་བོད་མི་རིགས་ཆེད་རང་ལུས་མེར་སྲེག་བཏང་སྟེ། རྒྱ་གཞུང་ལ་ཞི་རྒོལ་གནང་ཡོད་པའི་ཁྲོད་ནས་སྐྱེས་པ་གྲངས་ ༡༢༦ དང་བུད་མེད་གྲངས་ ༢༦ ཆགས་ཡོད་པའི་ཁོངས་ནས་བོད་མི་གྲངས་ ༡༢༠ འདས་གྲོངས་སུ་གྱུར་ཡོད། བོད་མི་རང་ལུས་མེར་སྲེག་བཏང་མཁན་ ༥༠ ལྷག་ཙམ་ཨ་མདོ་རྔ་བ་ཁུལ་ནས་རེད་འདུག
ཚེ་ཁོ་ལགས་ཀྱིས་རང་ལུས་མེར་སྲེག་བཏང་རྗེས་རྒྱལ་སྤྱི་གསར་འགྱུར་བརྒྱུད་ལམ་ Washington Post དང་། ABC NEWS,FOX NEWS,HKFP བཅས་ཀྱི་ནང་གནས་ཚུལ་བཀོད་འདུག་པ་མ་ཟད། ཟླ་འདིའི་ཕྱི་ཚེས་ ༡༠ ཉིན་ཨི་སི་ཏོ་ནི་ཡ་ Estonia དང་། ལ་ཏི་ཝི་ཡ། Latvia ལི་ཐུ་ཝེ་ནི་ཡ་ Lithuania བཅས་ཡུ་རོབ་རྒྱལ་ཁབ་གསུམ་གྱི་གྲོས་ཚོགས་འཐུས་མི་ཉི་ཤུ་ཐམ་པས། བོད་ནང་ཛ་དྲག་གནས་སྟངས་ཡིན་པ། འགྲོ་བ་མིའི་ཐོབ་ཐང་མེད་པ། དེ་བཞིན་ཚེ་ཁོ་ལགས་ཀྱི་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བར་སེམས་འཚབ་ཧ་ཅང་ཡོད་སྐོར་ཡོངས་ཁྱབ་གསལ་བསྒྲགས་ཤིག་སྤེལ་འདུག་པའི་ནང་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཡོད་ཅེས་ཧ་ཅང་གསལ་པོ་བཀོད་འདུག
ཕྱི་ལོ་ ༢༠༡༨ ཟླ་ ༢ ཚེས་ ༡༧ བོད་རབ་བྱུང་བཅུ་བདུན་པའི་ས་ཁྱི་ལོའི་ཧོར་ཟླ་དང་པོའི་ཚེས་ ༢ ཉིན་ལྷ་སའི་གཙུག་ལག་ཁང་དུ་མེ་སྐྱོན་ཚབས་ཆེ་བྱུང་བའི་གནས་ཚུལ་ཐོན་པ་རེད། སྐབས་དེར་གནས་ཚུལ་དེ་ཙམ་ཁ་གསལ་བྱུང་མེད་ནའང་ད་ལྟའི་ཆར་ཁུངས་ལྡན་གནས་ཚུལ་འབྱོར་གསལ་ལྟར་ན། ཡུམ་དྲག་མོའི་ལྷ་ཁང་དང་། སྲོང་བཙན་ལྷ་ཁང་། མ་ཎི་ལྷ་ཁང་། གནམ་སྲས་ལྷ་ཁང་བཅས་ལ་མེ་སྐྱེན་ཚབས་ཆེ་བྱུང་ཡོད་འདུག ལྷ་ཁང་འདི་དག་ལ་རིག་གནས་གསར་རྗེས་སྐབས་གནོད་སྐྱོན་ཆེན་པོ་བྱུང་མེད་ནའང་ད་རེས་མེ་སྐྱོན་ཚབས་ཆེ་རྐྱེན་པས་རྩ་ཆེ་བའི་སྐུ་འདྲ་ཁག་ ༡༤ ལ་ཉམས་ཆག་ཆེན་པོ་བྱུང་ཡོད་པ་དང་། ཇོ་བོའི་སྐུ་བརྙན་ལ་གནོད་སྐྱོན་ཇི་ཙམ་བྱུང་ཡོད་མེད་ད་ཆ་གནས་ཚུལ་གསལ་པོ་ཞུ་ཐུབ་ཀྱི་མི་འདུག
གཙུག་ལག་ཁང་ནི། བོད་ཀྱི་རིག་དངོས་ནང་ནས་རྩ་ཆེ་ཤོས་ཡིན་པ་དང་། དེ་བཞིན་མཉམ་འབྲེལ་རྒྱལ་ཚོགས་ཀྱི་ཤེས་ཡོན་དང་། རིག་གཞུང། ཚན་རིག་བཅས་ཀྱི་ལྷན་ཚོགས་ UNESCO ཀྱི་རྩ་ཆེའི་རིག་དངོས་སྲུང་སྐྱོབ་ཁོངས་སུ་ངོས་འཛིན་གནང་ཟིན་སྟབས། འདིའི་ཐོག་ཞིབ་འཇུག་མཐིལ་ཕྱིན་པ་གནང་དགོས་ཀྱི་འདུག་ཅེས་བོད་མིའི་སྒྲིག་འཛུགས་ནས་གསུམ་བཅུའི་དུས་དྲན་ཐེངས་ ༥༩ ཐོག་ཞུས་ཟིན་པ་ཡིན། དེ་རིང་ནན་ཏན་ཞུས་པ་དང་ལྷན་མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་ལས་ཁུངས་ལ་སྙན་ཞུ་འབུལ་རྒྱུ་ཡིན།
དེ་རིང་འདིར་འཛོམས་དགོས་དོན་གཙོ་བོ་ནི། ཚེ་ཁོ་ལགས་ཀྱིས་བོད་དང་བོད་མིའི་རྩ་དོན་སླད་རྒྱ་ནག་གཞུང་ལ་ཞི་རྒོལ་གྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བར་བརྟེན། དམ་པ་དེ་ཉིད་ཀྱིས་གཙོས་རྗེས་ཤུལ་ནང་མི་སྤུན་ཉེ་རྣམས་དང་། ད་བར་གཞིས་ལུས་བོད་མི་རང་ལུས་མེར་སྲེག་གཏོང་མཁན་ཁྱོན་མི་གྲངས་ ༡༥༢ ཡོངས་དང་དེ་དག་གི་ནང་མི་སྤུན་ཉེ་རྣམས་ལ་ཚང་མས་ཐུགས་སྨོན་གནང་རོགས། ཞེས་རེ་འདུན་ཞུ་རྒྱུ་ཡིན། ཐུགས་རྗེ་ཆེ།།
