༢༠༡༨ ཟླ་ ༣ ཚེས་ ༢༨ རེས་གཟའ་ལྷག་པ།

༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། དཔལ་ལྡན་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ནས་དེ་རིང་སྔ་དྲོ་རཱཇ་པུར་ཁུལ་དུ་྄རྟེན་གཞི་བྱས་པའི་ས་སྐྱ་མཐོ་སློབ་ཏུ་བོད་མིའི་སྒྲིག་འཛུགས་ཆོས་རིག་ལས་ཁུངས་དང་ས་སྐྱ་མཐོ་སློབ་གཉིས་ཟུང་འབྲེལ་ཐོག་གོ་སྒྲིག་ཞུས་པའི་རིས་མེད་བགྲོ་གླེང་ཐེངས་གསུམ་པའི་དབུ་འབྱེད་མཛད་སྒོའི་སྐུ་མགྲོན་གཙོ་བོར་དབུ་བཞུགས་གནང་། 

དེ་ཡང་དེ་རིང་སྔ་དྲོ་ཕྱག་ཚོད་ ༩ པའི་ཐོག་སྐུ་མགྲོན་གཙོ་བོ་དཔལ་ལྡན་བཀའ་བློན་མཆོག་དང་ས་སྐྱ་མཐོ་སློབ་ཀྱི་མཁན་པོ་མཁྱེན་རབ་བཟང་པོ་མཆོག་ཞབས་སོར་འཁོད་རྗེས་སྐུ་མགྲོན་གཙོ་བོ་མཆོག་ནས་སྣང་གསལ་མར་མེ་ཞལ་འབྱེད་དང་འབྲེལ་མཛད་སྒོ་དབུ་འཛུགས་གནང་། 

འདུས་ཚོགས་ནས་རྒྱུན་ཆགས་གསུམ་པ་དང་ཤེས་རབ་སྙིང་པོ་གསུང་འདོན་བསྟུན་རྟེན་འབྱུང་གསོལ་ཇ་འབྲས་བསིལ་འདེགས་ཕུལ་ཞུས། དེ་རྗེས་ས་སྐྱ་མཐོ་སློབ་ཀྱི་མཁན་པོ་ཐུབ་བསྟན་རབ་གསལ་མཆོག་ནས་ཕེབས་བསུ་དང་མཐོ་སླ྄ོབ་ཀྱི་ངོ་སྤྲོད་གསུང་བཤད་གནང། དཔལ་ལྡན་ཆོས་རིག་བཀའ་བློན་མཆོག་ནས་རིས་མེད་བགྲོ་གླེང་གི་ལས་རིམ་གྱི་དགོས་དམིགས་དང་། བགྲོ་གླེང་པས་དགོངས་གཞི་ཇི་ལྟར་བཅང་དགོས་ཚུལ། བགྲོ་གླེང་དེ་བཞིན་གལ་གནད་ཆེན་པོའི་ཐོག་ཚོགས་དགོས་དོན་དང་། ལྷག་པར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དེ་སྔོན་ཆོས་ཚོགས་ཤིག་གི་སྐབས་རིས་མེད་བགྲོ་གླེང་བསྐོང་ཚོགས་དགོས་ལུགས་བཀའ་སློབ་ཕེབས་ཡོད་པའི་སྐོར་དང་། ཐེངས་དེའི་བགྲོ་གླེང་དེ་ཚད་མའི་སྐོར་དང་དེའི་ནང་ནས་བརྗོད་གཞི་༼སངས་རྒྱས་པའི་ཚན་མའི་གཞུང་སློབ་དཔོན་ཕྱོགས་གླང་གིས་མཛད་པའི་ཚད་མ་ཀུན་བཏུས་དང་། གཡུང་དྲུང་བོན་གྱི་ཚད་མའི་གཞུང་འགྲོ་མགོན་བློ་གྲོས་རྒྱན་མཚན་གྱིས་མཛད་པའི་ཚད་མའི་དེ་ཁོ་ན་ཉིད་ཀུན་ལས་བཏུས་པ་རིག་པའི་གཏེར་མཛོད༽ དེ་འདེམས་དགོས་དོན་སོགས་སྐོར་སོགས་བཀའ་སློབ་ཟབ་རྒྱས་བསྩལ་བར་གནང་།

བགྲོ་གླེང་དེ་བཞིན་ཕྱི་ཟླ་ ༣ ཚེས་ ༢༨ ནས་ ༣༡ བར་ཉིན་གྲངས་བཞིའི་རིང་ཚོགས་རྒྱུ་དང་། ཐེངས་དེའི་བགྲོ་གླེང་ནང་བོད་ཀྱི་ཆོས་ལུགས་ཆོད་བརྒྱུད་ཁག་ནས་གསུང་བཤད་གནང་མཁན་བཅུ་གཅིག་དང་།ཝ་ཎ་དབུས་གཙུག་ལག་སློབ་གཉེར་ཁང་ནས་ཆེད་མངགས་ཚད་མའི་ལོ་རྒྱུས་ཐོག་དཔྱད་རྩོམ་དང་གཏམ་བཤད་གནང་མཁན་མཁས་པ་ཞིག་གདན་འདྲེན་ཞུས་ཡོད། མཉམ་ཞུགས་གནང་མཁན་དགོན་སྡེ་འདྲ་མིན་ནསབཙུན་པ་དང་བཙུན་མ་གྲངས་ ༡༧༠ ཙམ་ཡོད།