༢༠༡༨ ཟླ་ ༣ ཚེས་ ༢༧ རེས་གཟའ་མིག་དམར།
༄༅། །ཁེ་ན་ཌ་བོད་དོན་རྒྱབ་སྐྱོར་ཚོོགས་པ་དང་ཨོ་ཊ་ཝ་མཐོ་སློབ་ཀྱི་འགྲོ་བ་མི་ཐོབ་ཐང་ཞིབ་འཇུག་དང་ཤེས་ཡོན་བསྟི་གནས་ཁང་གཉིས་ཟུང་འབྲེལ་ཐོག ཡུལ་དེས་རྒྱ་ནག་དང་ཚོང་འབྲེལ་སྤེལ་བ་དེས་བོད་མིར་ཤུགས་རྐྱེན་ཇི་བྱུང་སྐོར་ཟབ་སྦྱོང་ཞིག་གོ་སྒྲིག་གནང་འདུག དེ་ཡང་ཕྱི་ཟླ་ ༣ ཚེས་ ༢༢ ཉིན་བསྐོང་ཚོགས་གནང་བའི་ཟབ་སྦྱོང་སྐབས་རྒྱལ་སྤྱིའི་ཉེས་ཡངས་ཚོགས་པའི་དྲུང་ཆེ་སྐུ་ཞབས་ Ales Neve ལགས་དང་། ཨོ་ཊ་ཝའི་གཙུག་ལག་སློབ་གཉེར་ཁང་གི་ཁྲིམས་ཀྱི་སློབ་དཔོན་ལྕམ་ Penelope Simon ལགས། ཡུལ་དེའི་གྲོས་ཚོགས་འཐུས་མི་སྐུ་ཞབས་ Gernett Genius ལགས། ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ཞིབ་འཇུག་འབྲེལ་མཐུད་པ་དཀོན་མཆོག་སྒྲོལ་མ་ལགས། དྲྭ་རྒྱའི་ཉེན་སྲུང་མཁས་ལས་པ་སྐུ་ཞབས་ Greg Walton ལགས་བཅས་སློབ་སྟོན་གནང་མཁན་ཡིན་ཞིང་། གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་། ཁྲིམས་ཀྱི་སློབ་ཕྲུག གྲོས་ཚོགས་ཀྱི་ལས་བྱེད། དེ་བཞིན་ཚོང་འབྲེལ་མི་སྣ་ཁག་གཅིག་བཅས་ཁྱོན་མི་གྲངས་ ༣༥ ནས་མཉམ་ཞུགས་གནང་འདུག
ཟབ་སྦྱོང་སྐབས་ཁེ་ན་ཌ་གཞུང་གིས་བོད་ནང་གི་བོད་མི་རྣམས་ཀྱི་འཚོ་གནས་དང་འགྲོ་བ་མིིའི་ཐོབ་ཐང་ལ་དོ་ཕོག་མི་འགྲོ་བའི་ཐོག ཚོང་འབྲེལ་གྱི་གྲོས་མཐུན་གཞག་ཕྱོགས་ཐད་ལམ་སྟོན་དང་། གྲོས་མཐུན་འཇོག་སྐབས་ཁེ་ན་ཌའི་སྲིད་གཞུང་གིས་གོ་སྐབས་བཟུང་ནས་བོད་ནང་གི་བོད་མིའི་འགྲོ་བ་མིའི་ཐོབ་ཐང་ཐད་རྟོག་ཞིབ་འཐུས་ཚང་བྱེད་དགོས་པའི་བསམ་ཚུལ་ཡང་བཏོན་འདུག
དེ་ཡང་ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ཞིབ་འཇུག་འབྲེལ་མཐུད་པ་དཀོན་མཆོག་སྒྲོལ་མ་ལགས་ཀྱིས་ཀྱང་ཚོང་འབྲེལ་སྐབས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དཔེ་མཚོན་དུ་བཞག་ནས་ལྟ་སྐབས་བོད་ནང་གི་བོད་མི་ཚོར་རང་ཉིད་ཀྱི་འཚོ་གནས་དང་ཐད་ཀར་འབྲེལ་བ་ཡོད་པའི་དཔའ་འབྱོར་དང་ཆབ་སྲིད་ཀྱི་གནད་དོན་ཅི་འདྲ་ཞིག་གི་ཐོག ཚོང་འབྲེལ་དེའི་སྐབས་ཐག་གཅོད་བྱས་ཀྱང་དེའི་ཐོག་བསམ་ཚུལ་འདོན་རྒྱུའི་གོ་སྐབས་དང་རང་དབང་རྩ་བ་ནས་མེད་སྐོར་གསུངས།
གཞན་ཡང་ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་སྤྱི་ཁྱབ་ངེས་སྟོན་པ་ཤེས་རབ་མཐར་ཕྱིན་ལགས་ཀྱིས་རྒྱ་ནག་གཞུང་གིས་དྲ་རྒྱའི་རང་དབང་ཐོག་དམ་བསྒྲགས་བྱེད་བཞིན་པའི་གནད་དོན་དང། ལྷག་པར་རྒྱ་ནག་ནང་གི་ལས་མི་ཚོར་དཀའ་ངལ་འཕྲད་སྐབས་ཞུ་གཏུག་བྱ་རྒྱུར་ཁྲིམས་ཀྱི་ལམ་ལུགས་ཚད་ལྡན་ཞིག་མེད་པའི་གནས་སྟངས་ཐོག་སེམས་འཚབ་ཀྱི་རྣམ་པ་གསལ་འདོན་དང་སྦྲགས། རྒྱ་ནག་གཞུང་གིས་བོད་མིའི་ཐོག་ལག་བསྟར་བྱེད་བཞིན་པའི་སྲིད་བྱུས་དེས་བོད་མི་རྣམས་འདོད་བློ་མི་ཁེངས་པ་མ་ཟད། རྒྱ་ནག་ནང་གི་འགྲོ་བ་མི་ཐོབ་ཐང་གི་ཁྲིམས་རྩོད་པ་མང་པོ་ཞིག་ལ་མ་ཉེས་ཁ་ཡོག་འོག་འཛིན་བཟུང་བཀག་ཉར་བྱེད་བཞིན་ཡོད་སྐོར་གསལ་འདོན་གནང་། །
