༢༠༡༨ ཟླ་ ༣ ཚེས་ ༢༣ རེས་གཟའ་པ་སངས།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ ༢༠༡༨ ཟླ་ ༣ ཚེས་ ༢༣ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༣ ཚེས་ ༢༢ དགོང་དྲོ་ཆུ་ཚོད་ ༧།༣༠ ཐོག་ཐེ་ཝན་རྒྱལ་ས་ཐེ་པེའི་ནང་ཆགས་པའི་ “འོད་སྣང་དུས་རབས་དཔེ་དེབ་ཀློག་ཁང་” ཞེས་པའི་འཛིན་ཁང་ནང་དོན་གཅོད་ཟླ་བ་ཚེ་རིང་ལགས་ཀྱིས་ “༸གོང་ས་ཏཱ་ལའི་བླ་མ་མཆོག་བོད་ནས་༸ཞལ་གྱེས་པའི་ཉིན་མོ་” ཞེས་པའི་བརྗོད་གཞིའི་ཐོག་ནས་ངོ་སྤྲོད་ཀྱི་སློབ་ཁྲིད་གནང་ཡོད།
དེ་ཡང་དོན་གཅོད་ཟླ་བ་ཚེ་རིང་ལགས་ཀྱིས་བརྙན་པར་ནང་རྒྱལ་རབས་ལོ་རྒྱུས་ཐོག་བོད་དེ་རང་བཙན་གཙང་མའི་རྒྱལ་ཁབ་གཅིག་གི་ངོ་བོའི་ཐོག་ནས་ཕྱིའི་རྒྱལ་ཁབ་ཁག་གཞན་དང་གཞུང་འབྲེལ་བཙུགས་པ་མ་ཟད། རང་བཙན་གཙང་མའི་རྒྱལ་ཁབ་གཅིག་གི་ངོ་བོ་མཚོན་པའི་དངུལ་ཊམ་སོགས་མདོར་ན་ཁྲིམས་ཐོག་དཔང་རྟགས་ཁུངས་འཕེར་ཐུབ་པའི་ཡིག་ཆ་ཁག་གཅིག་ངོ་སྤྲོད་གནང་།
ཕྱོགས་མཚུངས་རྒྱ་ནག་གཞུང་དང་ལྷན་ “གྲོས་མཐུན་དོན་ཚན་བཅུ་བདུན་” ཟེར་བ་བཞག་པའི་སྔ་རྗེས་ཀྱི་བརྒྱུད་རིམ་དང་སྐབས་དེའི་སྤྱི་ཚོགས་ཀྱི་གནས་སྟངས། ལྷག་པར་ ༡༩༥༩ ཟླ་ ༣ པའི་ནང་བོད་ཀྱི་རྒྱལ་ས་ལྷ་སར་བོད་མི་ཚོས་རྒྱ་གཞུང་ལ་ངོ་རྒོལ་རྔམ་སྟོན་བྱེད་དགོས་པའི་རྒྱུ་རྐྱེན། མཐར་༸གོང་ས་༸སྐྱབས་མགོན་ཆེན་པོ་མཆོག་རང་ཡུལ་བཞག་ནས་རེ་ཞིག་བཙན་བྱོལ་དུ་ཉེན་གཡོལ་ཆེད་༸ཞལ་གྱེས་དགོས་བྱུང་བའི་རྒྱུ་རྐྱེན་དབྱེ་ཞིབ་དང་འབྲེལ་ངོ་སྤྲོད་གཟབ་རྒྱས་གནང་རྗེས་ཚོགས་བཅར་བ་ཁག་གཅིག་གིས་བོད་དེ་ “ཞིང་བྲན་ལམ་ལུགས་” ཟེར་བ་དང་། ཁག་གཅིག་གིས་༸གོང་ས་མཆོག་བྲོས་བྱོལ་དུ་ཆིབས་སྒྱུར་སྐྱོང་སྐབས་ཨ་རིའི་གསང་བའི་ལས་ཁུངས་ནས་རོགས་རམ་ཞུས་ཡོད་མེད་སོགས་ཀྱི་གནད་དོན་ཐོག་དོགས་འདྲི་བྱུང་བ་རྣམས་ལ་རྒྱབ་ལྗོངས་ཀྱི་ལོ་རྒྱུས་དང་སྦྲགས་ལན་འདེབས་གསལ་བཤད་མཐིལ་ཕྱིན་པ་གནང་ཡོད།
ཐེངས་འདིའི་བོད་དོན་ངོ་སྤྲོད་སློབ་ཁྲིད་ནི་ “བོད་ཀྱི་འཛིན་གྲྭ ” ཞེས་པའི་སློབ་མ་རྣམས་ཀྱིས་གོ་སྒྲིག་གནང་བ་ཞིག་ཡིན་ཞིང་ལྷན་ཚོགས་སྐབས་མི་གྲངས་སུམ་ཅུ་ཙམ་གྱིས་རང་མོས་ཐོག་མཉམ་ཞུགས་གནང་བ་མ་ཟད། ཚོགས་ཁང་གཡར་གླ་མཚུན་ཚོགས་བཅར་བ་རྣམས་ཀྱིས་མ་སྐུལ་དང་བླངས་ཐོག་ནས་སྤྲད་ཡོད་པ་བཅས།།
