༢༠༡༨ ཟླ་ ༣ ཚེས་ ༡༥ རེས་གཟའ་ཕུར་བུ།

༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༨ ཟླ་ ༣  ཚེས་ ༡༨ ཉིན་གྱི་སྔ་དྲོ་ཆུ་ཚོད་ ༩།༣༠ ཙམ་ལ་རྒྱ་གར་བྱང་ཕྱོགས་ཇམ་མུ་ཀ་ཤི་མིར་མངའ་སྡེའི་ཡ་གྱལ་ཇམ་མུ་མཐོ་སློབ་ Central University of Jammu ནས་ཇི་ལྟར་གདན་ཞུ་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་མཐོ་སློབ་དེའི་བསླབ་པ་མཐར་སོན་གྱི་མཛད་སྒོ་ཐེངས་དང་པོའི་སྐུ་མགྲོན་དུ་ཆིབས་སྒྱུར་བཀའ་དྲིན་བསྐྱངས་གནང་མཛད།

མཛད་སྒོའི་ཐོག་རྒྱ་གར་གཞུང་གི་བློན་ཆེན་སྐུ་ཞབས་ཇི་ཏེནྡར་སིངྒ་ Jitendra Singh མཆོག་དང་། དེ་སྔའི་རྒྱ་གར་དམག་སྤྱི་ཟུར་པ་སྐུ་ཞབས་ཝིཇ་ N C Vij མཆོག་ཕེབས་རྒྱུ་མ་ཟད། རིག་པའི་ཆུ་གཏེར་སོགས་ཆེ་བསྟོད་ཀྱི་ཕྱག་ཁྱེར་འབུལ་བཞེས་གནང་རྒྱུ་ཡིན་འདུག

དེ་ཡང་མཐོ་སློབ་ཀྱི་འཛིན་སྐྱོང་འགན་འཛིན་སྐུ་ཞབས་ར་ཝི་ཀུ་མཱར་ལགས་ཀྱིས་གསུང་དོན།  ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་༸གོང་ས་ཏཱ་ལའི་བླ་མ་མཆོག་ཐེངས་འདིར་མཐོ་སློབ་ཀྱི་བསླབ་པ་མཐར་སོན་གྱི་མཛད་སྒོའི་སྐུ་མགྲོན་གཙོ་བོར་ཆིབས་སྒྱུར་བསྐྱངས་ཏེ་སློབ་ཐོན་ཟིན་པའི་སློབ་ཕྲུག་རྣམས་ལ་ཕྱག་འཁྱེར་དང་གསེར་གྱི་རྟགས་མ་སོགས་གཟེངས་རྟགས་ཁག་གཅིག་ཀྱང་གསོལ་སྩལ་མཛད་གཏན་འཁེལ་ཡོད། ཅེས་སོགས་གསུངས།  སྤྱིར་མཐོ་སློབ་དེ་ཕྱི་ལོ་ ༢༠༡༡ ཟླ་ ༨ ཚེས་ ༨ ཉིན་གསར་འཛུགས་གནང་བ་ཞིག་ཡིན་འདུག

ཕྱོགས་མཚུངས་ཕྱི་ཚེས་ ༡༩ ཉིན་ཝཱ་ཎ་དབུས་བོད་ཀྱི་གཙུག་ལག་སློབ་ཁང་ CIHTS  དུ་རྒྱ་གར་རྒྱལ་ཡོངས་མཐོ་སློབ་མཐུན་ཚོགས་ཀྱི་ལོ་འཁོར་ཚོགས་ཆེན་ Association of Indian Universities ཐོག་ཆིབས་སྒྱུར་བཀའ་དྲིན་བསྐྱངས་ནས་རིགས་བདག་རྣམས་ལ་བཀའ་སློབ་སྩལ་གནང་མཛད་རྗེས་ཕྱི་ཚེས་ ༢༠ ཉིན་བཞུགས་སྒར་དུ་ཆིབས་༸ཞལ་སྒྱུར་གཏན་འཁེལ་ཡོད་པ་བཅས།།