ཕྱི་ལོ་ ༢༠༡༨ ཟླ་ ༢ ཚེས་ ༢༢ རེས་གཟའ་ཕུར་བུ།
༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གནད་དོན་ཐོག་རྟོག་ཞིབ་ཆེད་མཁས་མི་སྣས་རྒྱ་ནག་གཞུང་གིས་བོད་ཀྱི་སྐད་ཡིག་སློབ་གསོའི་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་བཙོན་འཇུག་བྱེད་པར་སེམས་འཚབ་དང་། ཁོང་ཉིད་འཕྲལ་དུ་གློད་གྲོལ་གཏོང་དགོས་སྐོར་གསུང་འདུག
དེ་ཡང་ཕྱི་ལོ་ ༢༠༡༨ ཟླ་ ༢ ཚེས་ ༢༡ ཉིན་ཡོངས་ཁྱབ་བསྒྲགས་གཏམ་སྤེལ་བའི་ནང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གནད་དོན་ཐོག་རྟོག་ཞིབ་གནང་མཁན་ཆེད་མཁས་མི་སྣས་རྒྱ་ནག་གཞུང་ལ་བཀྲ་ཤིས་དབང་ཕྱུག་ལགས་ལ་རྒྱལ་ཁབ་ཁ་བྲལ་བའི་ཉེས་འཛུགས་དང་། ནེའུ་ཡོག་དུས་བབ་ཀྱིས་བཀྲ་ཤིས་དབང་ཕྱུག་ལགས་སུ་བཅར་འདྲི་བྱས་པའི་བརྙན་ཐུང་དང་རྩོམ་ཡིག་བཅས་ལ་ཉེས་འཛུགས་བྱེད་རྒྱུ་མཚམས་འཇོགས་བྱ་དགོས་པར་གསུང་འདུག
དེ་བཞིན་ཆེད་མཁས་མི་སྣས་བཀྲ་ཤིས་དབང་ཕྱུགས་ལགས་ལ་རྒྱ་ནག་གཞུང་གིས་གཞི་རྩའི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་ལོངས་སུ་སྤྱོད་པར་ཁྲིམས་འགལ་དུ་ངོས་འཛིན་བྱས་ནས་འཛིན་བཟུང་བྱེད་ཡོད་པ་རེད། ཅེས་ཀྱང་གསུང་འདུག
ཕྱི་ལོ་ ༢༠༡༧ ཟླ་ ༡༡ པའི་ནང་མཉམ་འབྲེལ་རྒྱལ་ཚོགས་ཀྱི་བཙན་དབང་གི་བཙོན་འཇུག་ཐོག་ཉམས་ཞིབ་ཚོགས་ཆུང་གིས་ཇི་ནི་བ་ནང་མཉམ་འབྲེལ་རྒྱལ་ཚོགས་ཚོགས་དུས་ ༨༠ པའི་སྐབས་བཀྲ་ཤིས་དབང་ཕྱུག་ལགས་ཀྱི་སྐོར་བསམ་ཚུལ་གླེང་ཡོད་པ་དང། ཁོང་གློད་ཀྲོལ་དགོས་པའི་ར་འདུན་ཡང་སྟོན་ཡོད་པ་རེད། ཕྱི་ལོ་ ༢༠༡༧ ཟླ་ ༢ པའི་ནང་མཉམ་འབྲེལ་རྒྱལ་ཚོགས་ཀྱི་དམིགས་བསལ་འབྲེལ་བཐུད་པ་མི་སྣ་ལྔས། རྒྱ་ནག་གཞུང་ལ་བཀྲ་ཤིས་དབང་ཕྱུགས་ལགས་འཛིན་བཟུང་དང་མུ་མཐུད་ཉེས་ཆད་ཚབ་ཆེན་ཕོག་པའི་སྐོར་ལ་སེམས་ཚབ་སྟོན་ཡོད་པ་རེད།
ཕྱི་ལོ་ ༢༠༡༧ ཟླ་༢ ནང་མཉམ་འབྲེལ་རྒྱལ་ཚོགས་ཀྱི་དམིགས་བསལ་རང་དབང་སྲུང་སྐྱོབ་ཚོགས་པའི་མི་སྣ་ལྔ་བྱས་པའི་ཚོགས་ཆུང་ཞིག་ནས་རྒྱ་གཞུང་ནས་བཀྲ་ཤིས་དབང་ཕྱུག་ལགས་ལ་ཁ་བྲལ་དང་། ཉེས་ཅན་པའི་ཉེས་འཛུགས་བྱས་པ་དེར་སེམས་འཚབ་ཤུགས་ཆེ་ཡོད་པ་མངོན་བཅུག་ཡོད།
བོད་མིའི་སྒྲིགས་འཛུགས་ཀྱི་ཕྱི་དྲིལ་ལས་ཁུངས་ཀྱི་ཕྱི་འབྲེལ་དྲུང་ཆེ་དགས་པོ་བསོད་ནམས་ནོར་བུ་ལགས་དང་མཉམ་འབྲེལ་རྒྱལ་ཚོགས་དང་འགྲོ་བ་མིའི་ཐོབ་ཐང་ཚན་པའི་འགན་འཛིན་སྐལ་ལྡན་མཚོ་མོ་ལགས་རྣམ་གཉིས་ཟླ་འདིའི་ཕྱི་ཚེས་ ༡༩ ནས་བཟུང་བདུན་གཅིག་གི་རིང་བོད་དོན་ཞུ་བཏུག་ལས་འགུལ་སྤེལ་བཞིན་ཡོད་པ་རེད་འདུག །
