ཕྱི་ལོ་ ༢༠༡༨ ཟླ་ ༢ ཚེས་ ༢༦ རེས་གཟའ་ཟླ་བ།

༄༅། །ཕྱི་ལོ་ ༢༠༡༨ ཟླ་ ༢ ཚེས་ ༢༣ ཉིན་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་བསྟན་འཛིན་ལེགས་བཤད་ལགས་ཀྱིས་སྣེ་ཁྲིད་པའི་ཉམས་ཞིབ་པ་ཁག་གཅིག་རྒྱ་གར་དབུས་གཞུང་བདེ་སྲུང་ལས་ཁུངས་ཀྱི་ཉམས་ཞིབ་བསྟི་གནས་ཁང་ CENJOWS དང་། ལྡིན་ལྡི་ལིར་རྟེན་གཞི་བྱས་པའི་ཤིབ་ནཱ་དར་ཉམས་ཞིབ་སློབ་གཉེར་ཁང་ཐུན་མོང་གིས་གོ་སྒྲིག་གནང་བའི་ཉམས་ཞིབ་ལྷན་ཚོགས་སུ་མཉམ་ཞུགས་གནང་ཡོད།

དེ་ཡང་ལྷན་ཚོགས་སུ་མཉམ་ཞུགས་གནང་མཁན་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཚན་པའི་འགན་འཛིན་ཛམ་ལྷ་བསྟན་པ་རྒྱལ་མཚན་ལགས་དང་། འབུམ་རམས་པ་བསྟན་འཛིན་བདེ་གསལ་ལགས་གཉིས་ཀྱིས་བོད་ནི་ཅིའི་ཇིར་རྒྱ་གར་ལ་གནད་འགག་ཆེན་པོ་ཆགས་ཡོད་པའི་སྐོར་དང་། དེ་བཞིན་བོད་བརྒྱུད་ནང་བསྟན་གྱི་བྱེད་སྒོ་ཁག་ལ་རྒྱ་ནག་གཞུང་གིས་ཐེ་བྱུས་དང་སྲིད་བྱུས་འཛིན་ཕྱོགས། བླ་སྤྲུལ་རྣམ་པའི་ཡང་སྲིད་ཀྱི་བྱུང་རབས་དང་དེའི་ཐོག་ལ་ཆབ་སྲིད་འཛིན་ཕྱོགས་བཅས་ཀྱི་བརྗོད་གཞིའི་ཐོག་གཏམ་བཤད་དང་ཕན་ཚུན་གོ་བསྡུར་སྦྱང་བཤད་གནང་འདུག

སྐབས་དེར་བསྟན་འཛིན་ལེགས་བཤད་ལགས་ཀྱིས་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་ཀྱི་ཁྱབ་ཚད་དང་ལས་དོན་གནང་ཕྱོགས་སྐོར་ངོ་སྤྲོད་གནང་འདུག
ལྷན་ཚོགས་ནང་མཉམ་ཞུགས་གནང་མཁན་རྣམས་ནི། རྒྱ་གར་དབུས་གཞུང་བདེ་སྲུང་ལས་ཁུངས་ཀྱི་ཉམས་ཞིབ་བསྟི་གནས་ཁང་ CENJOWS གི་ཉམས་ཞིབ་པ་དང་། ལྡི་ལིར་གནས་སྡོད་རྒྱ་གར་དམག་དཔོན་ཟུར་པ་ཁག་གཅིག དེ་བཞིན་ལྡི་ལིར་རྟེན་གཞི་བྱས་པའི་ཤེས་ཡོན་བསྟི་གནས་ཁང་ཁག་གི་མཁས་དབང་སོགས་ཡིན་འདུག །