༄༅། ། དཔལ་ས་སྐྱ་སྨོན་ལམ་ཐེབས་རྩ་ཁང་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་གཉིས་ཀྱིས་གོ་སྒྲིག་འོག་སྐབས་དང་པོའི་ས་སྐྱ་གཞི་རིམ་དགེ་འོས་འཛིན་གྲྭའི་བསླབ་པ་མཐར་སོན་གྱི་མཛད་སྒོ་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཚོགས།
དེ་ཡང་ཕྱི་ལོ་༢༠༡༨ ཟླ་༢ ཚེས་༡༣ ཉིན་གྱི་སྔ་དྲོ་ཆུ་ཚོད་༡༠ ཐོག་སྐབས་དང་པོའི་ས་སྐྱ་གཞི་རིམ་དགེ་འོས་འཛིན་གྲྭའི་བསླབ་པ་མཐར་སོན་གྱི་མཛད་སྒོ་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཚོགས་ཡོད་པ་དང་། དགེ་འོས་འཛིན་གྲྭ་དེ་བཞིན་ཕྱི་ལོ་༢༠༡༦ ཟླ་༧ ནས་ཕྱི་ལོ་༢༠༡༨ ཟླ་༢ བར་ཚོགས་ཡོད། ༧སྐྱབས་མགོན་༧གོང་མ་ཁྲི་འཛིན་རིན་པོ་ཆེ་མཆོག་གི་སྐུ་ཚབ་མཁན་པོ་ངག་དབང་རྒྱལ་མཚན་ལགས་བསླབ་པ་མཐར་སོན་གྱི་མཛད་སྒོའི་ཐོག་མཉམ་ཞུགས་གནང་ཡོད་པ་དང་། བསླབ་པ་མཐར་སོན་གྱི་མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་བཅར་གནང་ཡོད། ཤེས་རིག་བཀའ་བློན་མཆོག་ནས་སྐབས་དང་པོའི་དགེ་འོས་སློབ་ཐོན་པ་རྣམས་ལ་ཕྱག་འཁྱེར་རེ་གནང་བ་དང་འབྲེལ་དགེ་ལས་སློབ་ཕྲུག་ཡོངས་ལ་བོད་ཀྱི་སྐད་ཡིག་དང་། ཡ་རབས་བཟང་སྤྱོད། ཆོས་ལུགས་ལ་མ་བརྟེན་པའི་བཟང་སྤྱོད་སོགས་ཀྱི་སྐོར་ལ་བཀའ་སློབ་ལམ་སྟོན་བསྩལ།
