ཕྱི་ལོ་ ༢༠༡༨ ཟླ་ ༢ ཚེས་ ༢༣ རེས་གཟའ་པ་སངས།
༄༅། །ཕྱི་ལོ་ ༢༠༡༨ ཟླ་ ༢ ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཉི་ཧོང་ནང་སྙན་གྲགས་ཆེ་བའི་གསར་འགོད་པ་དང་། རྒྱལ་ཡོངས་སློབ་སྟོན་ཚོགས་ཆུང་ Institute of National Fundamentals གི་ཚོགས་གཙོ་ལྕམ་སྐུ་ས་ཀུ་ར་ཡི་ཡོ་ཤི་ཀོ་ Sakurai Yoshiko ལགས་ཀྱི་ Genron ཞེས་པའི་བརྙན་འཕྲིན་ཁང་དུ་བཅར་འདྲི་དང་ལེན་གནང་འདུག་པ་མ་ཟད། ཉེ་ཧོང་ནང་གི་ཚགས་ཤོག་གཞན་ཁག་གཅིག་གི་བཅར་འདྲི་ལའང་དང་ལེན་གནང་འདུག
བཅར་འདྲིའི་སྐབས་དཔལ་ལྡན་སྲིད་སྐྱོང་མཆོག་གིས་རྒྱ་ནག་གཞུང་གིས་བོད་ས་བཙན་བཟུང་བྱས་ཏེ་བོད་མིར་དྲག་གནོན་དང་། བོད་མིའི་ཐུན་མིན་ཆོས་དང་རིག་གཞུང་ལ་ཉེན་ཚབས་སྤྲད་པ། མི་མང་ས་ཡ་མང་པོ་འཚོ་བརྟེན་བྱེད་བཞིན་པའི་བོད་མཐོ་སྒང་ནས་རྒྱུག་བཞིན་པའི་ཆུ་བོ་ཆེ་ཁག་གི་རང་བྱུང་ཁོར་ཡུག་གཏོར་སྐྱོན་བཏང་བའི་རྗེས་འབྲས་དང་། རྒྱལ་སྤྱིའི་ཐོག་ནས་བོད་མིའི་འཚེ་མེད་ཞི་བའི་འཐབ་རྩོད་དང་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཅིའི་ཕྱིར་བྱེད་བཞིན་ཡོད་སྐོར། དེ་བཞིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་ཞུ་ཕྱོགས་སྐོར་ལ་གསུང་གནང་འདུག་པ་མ་ཟད།
དཔལ་ལྡན་སྲིད་སྐྱོང་མཆོག་གིས་ས་ཀུ་ར་ཡོ་ཤི་ཀོ་ལགས་ཀྱིས་བོད་མིའི་རང་དབང་འཐབ་རྩོད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་སྲིད་སྐྱོང་མཆོག་དང་ལྷན་གྲོས་མོལ་ཞེས་པའི་དཔེ་དེབ་བྲིས་གནང་བར་ཐུགས་རྗེ་ཆེ་ཞུས་གནང་འདུག དཔེ་དེབ་དེའི་ནང་ཉེ་ཧོང་གིས་བོད་མིའི་རང་དབང་འཐབ་རྩོད་དང་དྲང་བདེན་ལ་རྒྱབ་སྐྱོར་ཅིའི་ཕྱིར་བྱེད་དགོས་དོན་དང་། བོད་མི་རྣམས་སོ་སོའི་རང་ཡུལ་དུ་ལོག་པའི་རེ་སྨོན། བོད་མི་རྣམས་སོ་སོའི་རང་དབང་འཐབ་རྩོད་བྱེད་ཐུབ་པའི་ནུས་པ། ༸གོང་ས་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་དང་ལྷན་གྲོས་མོལ་བྱུང་བ་རྣམས་དཔེ་དེབ་དེའི་གསལ་ཡོད། དཔལ་ལྡན་སྲིད་སྐྱོང་མཆོག་གིས་མི་མང་པོ་ཞིག་གིས་དཔེ་དེབ་དེ་ཀློག་ནས་བོད་དོན་གོ་རྟོགས་རྒྱ་ཆེ་སྤེལ་ཐུབ་པའི་རེ་བ་ཡོད་སྐོར་གསུང་འདུག
དེ་རྗེས་ཅི་པ་བཟོ་འཕྲུལ་བསྟི་གནས་ཁང་ Chiba Institute of Technology གིས་དཔལ་ལྡན་སྲིད་སྐྱོང་མཆོག་ཉེ་ཧོང་ནང་འཚམས་གཟིགས་སུ་ཕེབས་པར་ཆེ་བསྟོད་ཀྱིས་དགུང་ཚིགས་སུ་མགྲོན་འབོད་ཞུས་ཡོད་པ་དང་། སྐབས་དེར་ཅི་པ་བཟོ་འཕྲུལ་བསྟི་གནས་ཁང་གིས་འདི་ལོར་བོད་མི་སློབ་ཕྲུག་གསུམ་ལ་ཅི་པ་བསྟི་གནས་ཁང་དུ་སློབ་སྦྱོང་སླད་སློབ་ཡོན་གནང་རྒྱུ་ཡིན་པ་གསུངས་འདུག སྐབས་དེར་དཔལ་ལྡན་སྲིད་སྐྱོང་མཆོག་གིས་བསྟི་གནས་ཁང་དེའི་ནང་སློབ་གཉེར་བྱེད་བཞིན་པའི་སློབ་ཕྲུག་བསྟན་འཛིན་ཀུན་དགའ་ལགས་དང་བསྟན་འཛིན་རྣམ་རྒྱལ་ལགས་དང་ཐུག་འཕྲད་ཀྱིས་བཀའ་མོལ་གནང་འདུག །
