ཕྱི་ལོ་ ༢༠༡༨ ཟླ་ ༢ ཚེས་ ༡༩ རེས་གཟའ་ཟླ་བ།

༄༅། །ཕྱི་ལོ་ ༢༠༡༨ ཟླ་ ༢ ཚེས་ ༡༧ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་སྐུ་ཞབས་སཡི་རིལ་རྭ་མ་ཕོ་ས་ Cyril Ramaphosa མཆོག་ལྷོ་ཨ་ཕི་རི་ཁའི་སྲིད་འཛིན་ཇེ་ཀོབ་ཛུ་མ་ President Jacob Zuma མཆོག་སྲིད་འཛིན་ལས་གནས་ནས་དགོངས་པ་ཞུས་རྗེས་ལྷོ་ཨ་ཕི་རི་ཁའི་སྲིད་འཛིན་དུ་བསྐོ་གཞག་བྱུང་བར་དགའ་བསུའི་འཚམས་འདྲི་ཞུས་གནང་ཡོད།

དེ་ཡང་དཔལ་ལྡན་སྲིད་སྐྱོང་མཆོག་གིས་འཚམས་འཕྲིན་ནང་འཁོད་དོན། སྐུ་ཞབས་སཡི་རིལ་རྭ་མ་ཕོ་ས་མཆོག་ལྷོ་ཨ་ཕི་རི་ཁའི་སྲིད་འཛིན་དུ་བསྐོ་གཞག་བྱུང་བར་ངས་སྙིང་ཐག་པ་ནས་དགའ་བསུའི་འཚམས་འདྲི་ཞུ་རྒྱུ་དང་འབྲེལ་ལས་དོན་མཐའ་དག་བྱ་བ་ལམ་ལྷོང་ཡོང་བའི་སྨོན་འདུན་ཞུ་རྒྱུ་ཡིན། ཞེས་འཁོད་ཡོད་པ་མ་ཟད། དཔལ་ལྡན་སྲིད་སྐྱོང་དེ་སྔ་ཧར་ཝ་ཌི་ Harvard མཐོ་སློབ་ཏུ་ཡོད་སྐབས་སྲིད་འཛིན་གསར་པ་མཆོག་གིས་ལྷོ་ཨ་ཕི་རི་ཁ་ནི་རྩ་ཁྲིམས་གཞིར་བཟུང་འདྲ་མཉམ་དང་རང་དབང་ཡོད་པའི་རྒྱལ་ཁབ་གཙོ་གྲས་ཤིག་ཡིན་པའི་སྐོར་གསུང་བཤད་གནང་བ་དེ་དག་ཉན་རྒྱུའི་གོ་སྐབས་བྱུང་བ་དེ་ཐུགས་དྲན་གསོ་གནང་ཡོད།

དེ་བཞིན་སྲིད་སྐྱོང་མཆོག་ཉེ་ཆར་ལྷོ་ཨ་ཕི་རི་ཀའི་ནང་ཕྱོགས་ཕེབས་གནང་བ་དེ་སེམས་འགུལ་ཧ་ཅང་བྱུང་སྐོར་དང་། ལྷོ་ཨ་ཕི་རི་ཁའི་ནང་ཞི་བའི་ཐབས་ལམ་ལམ་ལྷོངས་བྱུང་ཡོད་པ་བཞིན། བོད་ཀྱི་གནད་དོན་དེ་ཡང་ཞི་བའི་ཐོག་ནས་གསལ་ཐུབ་པའི་ཡིད་ཆེས་ཡོད། ཅེས་འཁོད་འདུག

སྐུ་ཞབས་ས་ཡི་རིལ་རྭ་མ་ཕོ་ས་མཆོག་ནི་ལྷོ་ཨ་ཕི་རི་ཀའི་སྲིད་འཛིན་ཟུར་པ་སྐུ་ཞབས་ནེལ་སོན་མན་ཌེ་ལ་དམ་པ་ (Nelson Mandela) མཆོག་དང་ཧ་ཅང་བློ་ཐག་ཉེ་བོ་ཡིན་པ་མ་ཟད། ལྐོག་ཟ་རུལ་སུངས་ཀྱི་གནད་དོན་ཐོག་མངོན་གསལ་དོད་པོ་ལས་དོན་ཤུགས་ཆེ་སྤེལ་གནང་མཁན་ཞིག་ཀྱང་ཡིན། །

༼མ་ཡིག་ངོ་མ་ཨིན་ཡིག་ཐོག་ཡོད་པས་དེར་རྩ་འཛིན་ཡོང་བ་ཞུ།༽