ཕྱི་ལོ་ ༢༠༡༨ ཟླ་ ༢ ཚེས་ ༢༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༨ ཟླ་ ༢ ཚེས་ ༢༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཉི་ཧོང་གྲོས་ཚོགས་སུ་ཆེད་ཕེབས་གནང་ཡོད་པ་དང་། སྲིད་སྐྱོང་མཆོག་གིས་ད་ལྟའི་ཆར་ཉི་ཧོང་ནང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ནང་ཚོགས་མི་ ༩༠ ཡོད་པའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཚང་མའི་ནང་ནས་ཆེ་ཤོས་དེ་ཆགས་ཡོད་སྟབས་བསྔགས་བརྗོད་དང་ཐུགས་རྗེ་ཆེ་ཞུས་གནང་འདུག
དེ་ཡང་དཔལ་ལྡན་སྲིད་སྐྱོང་མཆོག་གྲོས་ཚོགས་སུ་ཕེབས་འབྱོར་སྐབས་གུ་ཡང་མང་གཙོ་ཚོགས་པའི་སྐུ་ཚབ་ཚོགས་མི་སྐུ་ཞབས་ཤི་མོ་མུ་ར་ཧ་ཀུ་བྷུན་ Shimomura Hakubun མཆོག་གིས་དབུས་ཆབ་སྲིད་ཚོགས་པ་ཚང་མའི་སྐུ་ཚབ་རྣམས་ཀྱིས་ཕེབས་བསུའི་སྣེ་ལེན་ཟབ་རྒྱས་ཞུས་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གྲོས་ཚོགས་མཇལ་འཕྲད་ཚོགས་ཁང་དུ་ཕེབས་སྐབས་ཚོགས་ཁང་ནང་དུ་ཉི་ཧོང་དང་བོད་ཀྱི་རྒྱལ་དར་མང་པོ་ཞིག་བསྒྲེངས་འཛུགས་གནང་ཡོད་པ་དང་གྲོས་ཚོགས་འཐུས་མི་རྣམས་ཀྱིས་ཡར་བཞེངས་ཏེ་དཔལ་ལྡན་སྲིད་སྐྱོང་མཆོག་ལ་གུས་བཀུར་གྱི་རྣམ་པ་ཤུགས་ཆེ་སྟོན་གནང་འདུག
དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། སྐུ་ཞབས་ཤི་མོ་མུ་ར་ཧ་ཀུ་བྷུན་མཆོག་དང་ལྕམ་སྐུ་ས་ཀུ་ར་ཡོ་ཤི་ཀོ་ Sakurai Yoshiko ལགས་རྣམ་གཉིས་ཀྱིས་བོད་དོན་ཐད་ཤ་ཚ་དང་ཐུག་འཁུར་ཧ་ཅང་ཆེན་པོ་གནང་བར་ཐུགས་རྗེ་ཆེ་ཞུ་རྒྱུ་དང་། ད་ལྟའི་ཆར་འཛམ་གླིང་ནང་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེ་ཤོས་དེ་ཉི་ཧོང་ཆགས་ཀྱི་ཡོད་སྟབས་ཚོགས་གཙོ་མཆོག་ལ་འཚམས་འདྲི་དང་ཐུགས་རྗེ་ཆེ་ཞུ་རྒྱུ་མ་ཟད། ནམ་རྒྱུན་ཡོ་རོབ་དང་ཨ་རི་སོགས་སུ་ཕྱོགས་བསྐྱོད་འགྲོ་སྐབས་ངས་སྤོབས་པ་མཐོ་པོའི་སྒོ་ནས་ཉི་ཧོང་ནང་གྲོས་ཚོགས་བོད་དོན་རྒྱབ་སྐྱོར་བ་མང་ཤོས་ཡོད་པ་རེད། ཅེས་ཞུ་གི་ཡོད་ཅེས་དང་།
གཞན་ཡང་དཔལ་ལྡན་སྲིད་སྐྱོང་མཆོག་གིས། ཨ་རི་གཞུང་ནས་བོད་ཀྱི་སྲིད་བྱུས་ཁྲིམས་ཡིག་ཞེས་ ༢༠༠༢ ལོར་གཏན་འབེབས་གནང་ཡོད་པ་དང་། དེ་བཞིན་ཡོ་རོབ་གྲོས་ཚོགས་ནས་ཀྱང་བོད་པའི་ངོ་བོ་སྲུང་སྐྱོབ་དང་རྒྱ་ནག་གཅིག་གི་སྲིད་བྱུས་གཞིར་བཟུང་བོད་ལ་མིང་དོན་མཚུངས་པའི་རང་སྲིད་རང་སྐྱོང་གི་ཐོབ་ཐང་ཡོང་སླད་བོད་རྒྱ་གཉིས་བར་ཞི་མོལ་གནང་དགོས་པའི་གྲོས་ཆོད་ཐེངས་མང་བཞག་ཡོད་པས། དེ་རིང་ངས་ཉི་ཧོང་གྲོས་ཚོགས་འཐུས་མི་རྣམས་ལ་ཡང་བོད་ཀྱི་ཆོས་དང་རིག་གཞུང་། སྐད་ཡིག་སྲུང་སྐྱོབ། དེ་བཞིན་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གྱིས་བོད་རྒྱ་ཞི་མོལ་དགོས་པའི་གྲོས་ཆོད་ཞིག་འཇོག་ཐུབ་པའི་འབད་བརྩོན་གང་ཐུབ་གནང་རོགས་ཞུ་རྒྱུ་ཡིན་ཞེས་གསུང་འདུག
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་རྒྱ་ནག་གཞུང་གི་སྡུག་རྩུབ་ཅན་གྱི་སྲིད་བྱུས་འོག་ད་ལྟའི་བོད་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་དང་། སེར་རྟ་བླ་རུང་སྒར་དང་ཡ་ཆེན་སྒར་གཏོར་བཤིག་གི་ཛ་དྲག་གནས་སྟངས། དེ་བཞིན་དེང་སྐབས་རྒྱལ་སྤྱིའི་ནང་རྒྱ་ནག་དང་འབྲེལ་བའི་ལྷོ་ཤར་གཉིས་ཀྱི་རྒྱ་ནག་རྒྱ་མཚོ་དང་། སེན་ཀ་ཀུ་གླིང་ཕྲན། Senkaku Islands འབྲོག་ལམ་སོགས་ཀྱི་གནད་དོན་སྐོར་ལའང་གསུང་བཤད་གནང་འདུག
སྲིད་སྐྱོང་མཆོག་གིས་བོད་ནང་རྒྱ་ནག་བཙན་འཛུལ་བྱུང་བ་དེ་རྒྱལ་ཁབ་གཞན་སུ་ལའང་འབྱུང་སྲིད་པ་དང་ང་རང་ཉི་ཧོང་དུ་སླེབས་དགོས་པའི་རྒྱུ་མཚན་གཅིག་ནི། ཉི་ཧོང་མི་མང་རྣམས་ལ་དེ་དྲན་སྐུལ་ཞུ་རྒྱུ་ཆེད་ཡིན། དེ་དང་མཉམ་དུ་བོད་ཀྱི་གནད་དོན་དྲང་བདེན་དང་ཚེ་མེད་ཞི་བའི་འཐབ་རྩོད་ཀྱི་དམིགས་དཔེ་ལྟ་བུ་ཞིག་ཡིན་སྟབས་དེ་ལ་རྒྱབ་སྐྱོར་བྱས་པ་ཡིན་ན་དྲང་བདེན་དང་ཞི་བའི་རིན་ཐང་ལ་རྒྱབ་སྐྱོར་མཚོན་གྱི་ཡོད་པ་དང་གལ་སྲིད་དེ་ལྟར་མ་གནང་ཚེ་དྲག་པོའི་ཐབས་ལམ་ལ་ཤུགས་ཀྱི་རྒྱབ་སྐྱོར་མཚོན་གྱི་ཡོད་པ་གསུང་འདུག
དེ་ནས་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཤི་མོ་མུ་ར་ཧ་ཀུ་བྷུན་མཆོག་གིས་བོད་མི་རྣམས་ལོ་ངོ་སྟོང་ཕྲག་ལྷག་རིང་འཚེ་མེད་ཞི་བའི་ལམ་ལ་བསྐྱོད་བཞིན་ཡོད་པ་དང་། བོད་ཀྱི་ནང་ཆོས་ནས་བྱུང་བའི་ལེགས་བཤད་དེ་དག་གིས་དེང་སྐབས་འཛམ་གླིང་ནང་ཞི་བདེ་སྐྲུན་རྒྱུར་ནུས་པ་དང་ཕན་ཐོགས་ཆེན་པོ་ཡོད་པས་བོད་ཀྱི་གནད་དོན་གསལ་ཆེད་གྲོས་ཚོགས་འཐུས་མི་ཚང་མས་ནུས་པ་མཉམ་སྤུང་དང་འབད་བརྩོན་སྔར་ལྷག་བྱ་དགོས་སྐོར་གསུང་།
དེ་བཞིན་ལྕམ་སྐུ་ས་ཀུ་ར་ཡོ་ཤི་ཀོ་ལགས་ཀྱིས་ཉི་ཧོང་དང་བོད་གཉིས་ནི་གཞི་རྩའི་ནང་པའི་རྒྱལ་ཁབ་ཡིན་པ་དང་། བོད་དོན་རྒྱབ་སྐྱོར་བྱེད་པ་བརྒྱུད་ཉི་ཧོང་གི་གཞིའི་རྩའི་དྲང་བདེན་དང་འཚེ་མེད་ཞི་བའི་རིན་ཐང་སྲུང་སྐྱོབ་བྱེད་རྒྱུ་ལའང་ཕན་ཐོགས་ཆེན་པོ་ཡོད་སྐོར་གསུང་འདུག་པ་བཅས།།
