ཕྱི་ལོ་ ༢༠༡༨ ཟླ་ ༢ ཚེས་ ༢༦ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གནས་མཆོག་རྡོ་རྗེ་གདན་དུ་སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པ་སྐྱབས་རྗེ་ཀཿཐོག་དགེ་རྩེ་རིན་པོ་ཆེ་མཆོག་མཇལ་ཁ་ཞུས་གནང་འདུག ཀཿཐོག་དགེ་རྩེ་རིན་པོ་ཆེ་མཆོག་ནི་ཉེ་ཆར་གནས་མཆོག་རྡོ་རྗེ་གདན་དུ་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་ ༢༩ པ་ཚོགས་སྐབས་སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པར་གཏན་འཁེལ་བསྐོ་གཞག་བྱུང་ཡོད།
དེ་ཡང་ཆོས་རིག་བཀའ་བློན་མཆོག་གིས་རིན་པོ་ཆེ་མཆོག་ལ་མཎྡལ་རྟེན་གསུམ་འདེགས་འབུལ་དང་། དེ་རྗེས་བཀའ་ཤག་གི་འཚམས་འཕྲིན་འབུལ་གནང་འདུག་པ་མ་ཟད། ཆོས་རིག་ལས་ཁུངས་ཀྱི་མ་འོངས་ལས་འཆར་དང་ལས་དོན་སྐོར་ངོ་སྤྲོད་ཞུས་པ་དང་ཆབས་ཅིག་དེང་སྐབས་བཙན་བྱོལ་བོད་མིའི་དགོན་སྡེ་གྲྭ་ཚང་ཁག་གི་ནང་དུ་གྲྭ་རྒྱུན་ཉུང་དུ་འགྲོ་བཞིན་པའི་དཀའ་ངལ་སྐོར་དང་འབྲེལ་ད་ལྟ་ཡོད་བཞིན་པའི་གྲྭ་བཙུན་རྣམས་ཀྱི་གནས་ཚད་གོང་མཐོར་གཏོང་རྒྱུའི་ཐབས་ལམ་ཇི་དགེ་སྐོར་ཕན་ཚུན་བཀའ་མོལ་གནང་ཡོད།
མཇལ་བཅར་གྲུབ་རྗེས་བཀའ་བློན་མཆོག་གནས་མཆོག་རྡོ་རྗེ་གདན་དུ་ཡོད་པའི་དགའ་ལྡན་འཕེལ་རྒྱས་གླིང་དང་། ཞེ་ཆེན་བསྟན་གཉིས་དར་རྒྱས་གླིང་། རྣམ་གྲོལ་གླིང་དགོན་པ། ས་སྐྱའི་དགོན་པ། ཀརྨ་ཆོས་འཁོར་གླིང་། རྙིང་མའི་དགོན་པ། གཏེར་སྒར་དགོན་པ་བཅས་དགོན་སྡེ་ཁག་ཏུ་ཆོས་མཇལ་ཕེབས་གནང་བ་མ་ཟད། གཏེར་སྒར་དགོན་དུ་རྒྱལ་ཚབ་རིན་པོ་ཆེ་མཇལ་ཁ་ཞུས་གནང་འདུག
གནས་མཆོག་རྡོ་རྗེ་གདན་དུ་གཞུང་འབྲེལ་ཕྱོགས་ཕེབས་དང་བསྟུན་རྒྱལ་ས་པ་ཊི་ནར་ཕེབས་སྟེ། ཉེ་སྔོན་༧གོང་ས་མཆོག་གིས་བཀའ་སློབ་ལམ་སྟོན་མཛད་པ་བཞིན་རྒྱ་གར་གཞུང་མང་གཉིས་ནས་བོད་མི་རྣམས་ལ་མཐུན་འགྱུར་རྒྱབ་སྐྱོར་གནང་བར་བཀའ་དྲིན་རྗེས་དྲན་ཞུ་སླད་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་བྷི་ཧར་དང་ཨུ་ཏར་པར་དེཤ་མངའ་སྡེ་ཁག་གཉིས་སུ་ཡོད་པའི་ནང་པའི་གནས་ཆེན་ཁག་བརྒྱད་ལ་མཆོད་རྟེན་གསར་བཞེངས་གནང་བའི་ཁོངས་ནས་ཡངས་པ་ཅན་དུ་བཞེངས་གནང་བའི་མཆོད་རྟེན་གྱི་ལས་གཞིར་གཟིགས་རྟོག་གནང་རྒྱུ་རེད་འདུག །
