༢༠༡༨ ཟླ་ ༢ ཚེས་ ༡ རེས་གཟའ་ཕུར་བུ།
༄༅། །བོད་ཀྱི་དགུ་བཅུ་གསུམ་ལས་འགུལ་ཚོགས་པ་ནས་གནས་ཚུལ་སྤེལ་དོན་ལྟར་ན། གཞིས་བཞུགས་ཆབ་སྲིད་བཙོན་ཟུར་རྒྱལ་གཅེས་པ་ངག་དབང་མཚོ་མོ་ལགས་ནི་སྤྱི་ལོ་ ༡༩༦༧ ལོར་ལྷ་ས་འཕན་པོ་ཁུལ་དུ་འཁྲུངས་པ་དང། ལོ་རབས་བརྒྱ་བཅུ་པར་བོད་ནང་ཅུང་ཟད་གུ་ཡངས་ཀྱི་སྲིད་ཇུས་ལག་ལེན་བྱེད་པའི་དུས་སྐབས་དང་སྟུན་ནས་རྒྱ་ར་དགོན་པར་ཆོས་ཞུགས་བྱས་ཏེ་བསླབ་པ་སློབ་གཉེར་དང་། རང་གིས་ཁས་ལེན་པའི་དམ་སྡོམ་རྣམས་མིག་འབྲས་བཞིན་སྲུང་བཞིན་བཞུགས། རབས་རྒྱ་བཅུ་པའི་དུས་མཇུག་ཏུ་བོད་ནང་སྔ་རྗེས་སུ་ཞི་རྒོལ་ཡོ་ལངས་ཀྱི་འཐབ་རྩོད་རབ་དང་རིམ་པ་བྱུང་བ་ལྟར། སྤྱི་ལོ་ ༡༩༩༣ ལོར་བོད་རང་དབང་སླར་གསོའི་ཆེད་བོད་ཀྱི་རྒྱལ་ས་ལྷ་སའི་ཁྲོམ་གཞུང་དུ་རོགས་པ་འགའ་ཤས་དང་མཉམ་དུ་ཞི་བའི་ངོ་རྒོལ་བྱས་སྟབས། སྐབས་དེ་རང་ལ་རྒྱ་གཞུང་ཉེན་རྟོག་པས་འཛིན་བཟུང་གིས་ལྷ་སའི་ཤར་ཕྱོགས་སུ་ཡོད་པའི་རྒུར་ཚ་བཙོན་ཁང་ནང་བཙོན་བཅུག་བྱས། འཛིན་བཟུང་དང་བཙོན་བཅུག་བྱས་པའི་བརྒྱུད་རིམ་ནང་ཉེས་བརྡུང་ཚད་མེད་བཏང་བ་ནི་བརྗོད་ག་ལ་དགོས།
རྒུ་ཚ་བཙོན་དུ་སླེབས་ནས་རྒྱ་གཞུང་ཁྲིམས་ཁང་ནས་ཁྲིམས་ལུགས་ཀྱི་གོ་རིམ་དང་རྒྱུད་རིམ་གང་ཡང་མེད་པར་མི་ལོ་བདུན་གྱི་བཙོན་འཇུག་ཁྲིམས་ཐག་བཅད་ནས་ལྷ་སའི་གྲྭ་བཞི་བཙོན་ཁང་དུ་བཙོན་འཇུག་བྱས།གྲྭ་བཞི་བཙོན་ཁང་ནང་ལོ་བདུན་བཞུགས་རིང་ཆབ་སྲིད་བཙོན་པ་སྤྱི་མཚུངས་ལྟར་བསམ་སྤྱོད་ལས་འདས་པའི་སྡུག་སྦྱོང་མནར་གཅོད་ཚད་ལས་འདས་པ་མྱང་དགོས་བྱུང་བའི་ལོ་རྒྱུས་བརྗོད་ཀྱི་མི་ལངས།
ལྷག་པར་སྤྱི་ལོ་ ༡༩༩༨ ལོའི་ནང་གྲྭ་བཞི་བཙོན་ཁང་དུ་རྒྱ་དམར་གྱི་རྒྱལ་དར་སྒྲེང་འཛུགས་དང་རྒྱལ་གླུ་གཏོང་བའི་བཙན་ཤེད་རང་བཞིན་གྱི་བྱེད་སྒོ་ཞིག་སྤེལ་བ་དང་། སྐབས་དེར་རྒྱལ་དར་བསྒྲེངས་འཛུགས་ཀྱི་ཐང་ཆེན་ཐོག་ཡོད་པའི་ཆབ་སྲིད་བཙོན་པ་ཚོས་རྒྱ་གཞུང་གི་བྱེད་སྒོ་དེར་མ་གྲོས་བསམ་པ་གཅིག་མཐུན་གྱིས་ངོ་རྒོལ་བྱས་པ་མ་ཟད། བོད་ལ་རང་དབང་དགོས་པའི་སྐད་འབོད་བྱེད་བྱས་པར་རྒྱ་གཞུང་ཉེན་རྟོག་གང་བྱུང་གི་མེ་མའདའ་བརྒྱབ་པ་དང།སྐབས་དེར་རྒྱལ་གཅེས་པ་གཉིས་རང་སྲོག་ཤོར་བ་དང། མང་པོ་ཞིག་འཛིན་བཟུང་དང་དམ་དྲག་མནར་གཅོད་ཚད་མེད་བཏང་ཡོད།
མཐར་སྤྱི་ལོ་ ༢༠༠༠ ལོར་རྒྱལ་གཅེས་བཙུན་མ་ཁོང་ངག་དབང་མཚོ་མོ་ལགས་ཁོང་ལོ་བདུན་གྱི་དུས་བཀག་བཙོན་བཅུག་གི་ལོ་ཚད་རྫོགས་པར་བརྟེན་རྒྱ་གཞུང་གིས་བཙོན་གྲོལ་བཏང་། སྐབས་དེར་སྐུ་གཟུགས་ཕན་མེད་གཅོང་ཅན་དུ་འགྱུར་ཡང་བཙོན་ཁང་ལས་སྲོག་སྒོ་ཐོན་ཙམ་བྱུང་ནས་ཁྱིམ་དུ་སྒུག་བསྡད་པའི་ནང་མི་སྤུན་མཆེད་དང་ངོ་འཕྲད་བྱུང་བའི་གོ་སྐལ་བཟང་པོ་ཐོབ། བཙོན་གྲོལ་རྗེས་ལ་རྒྱ་གཞུང་གིས་ཆབ་སྲིད་ཀྱི་ནག་ཉེས་བསགས་ནས་བཙོན་ཁང་ནང་བསྡད་མྱོང་བའི་མི་སྣ་ཞིག་སླར་ཡང་དགོན་པ་དང་། སློབ་གྲྭ། ལས་ཁུངས་ནང་འཛུལ་ཞུགས་མི་ཆོག་པ་བཟོས་ཡོད་ལ། སྤྱི་ཚོགས་ནང་ལས་ཀར་ཞུགས་རྒྱུར་དཀའ་ངལ་སྣ་ཚོགས་ལ་གདོང་ལེན་བྱེད་དགོས་ཀྱི་ཡོད་།ལོ་ཟླ་རིམ་པས་སོང་བ་དང་སྟུན་ནས་ཁོང་གིས་ཡུན་རིང་དཀའ་སྡུག་དང་མནར་གཅོད་ཟད་མེད་མྱངས་པའི་རྐྱེན་གྱིས་གཟུགས་གཞིའི་ནད་སྟངས་ཧ་ཅང་ཞན་པོ་ཡིན་པར་བརྟེན།སྐུ་གཟུགས་ཀྱི་གནས་སྟངས་་ཉིན་རེ་བཞིན་ཇེ་ཞན་ཇེ་སྡུག་ཏུ་སོང་ནས་མཐར་སྤྱི་ལོ་ ༢༠༡༨ ཟླ་ ༡ ཚེས་ ༢༧ ཉིན་སྨན་བཅོས་གནང་རོགས་ཞེས་འབོད་ཞུས་ནས་འཕན་པོ་རྫོང་སྨན་ཁང་ལ་བསྐྱལ་ཡང་སྟབས་མ་ལེགས་པར་སྨན་བཅོས་ཕྱིས་དྲགས་པའི་རྐྱེན་གྱིས་སྨན་ཁང་གི་སྒོ་འཛུལ་ནས་སྨན་བཅོས་བྱ་རྒྱུར་བསྒུག་བཞིན་པའི་སྐབས་སུ་སྐུ་གཤེགས་པའི་ཡིད་སྐྱོའི་གནས་ཚུལ་ཐོན་འདུག སྐུ་གཤེགས་དུས་དགུང་གྲངས་ ༥༡ ལ་ཕེབས་ཡོད།མདོར་ན།རྒྱལ་གཅེས་པ་ཁོང་ནི་ང་ཚོའི་མི་རིགས་ཀྱི་མཆོག་ཏུ་གྱུར་བའི་བུ་རྒྱུད་བཟང་པོ་ཞིག་ཡིན་ལ། ཁོང་གི་རི་རྒྱལ་ལས་དཔང་མཐོ་བ་དང་རྒྱ་མཚོ་ལས་གཏིང་ཟབ་པའི་ལྷག་བསམ་དང་སྙིང་སྟོབས་ནི་ང་ཚོས་དུས་ནམ་ཡང་རྗེས་དྲན་བྱེད་དགོས་པ་ཞིག་རེད།
