ཕྱི་ལོ་ ༢༠༡༨ ཟླ་ ༡ ཚེས་ ༣༠ རེས་གཟའ་མིག་དམར།
༄༅། །འདི་གར་ཨོ་སི་ཀྲི་ལི་ཡ་སྐུ་ཚབ་དོན་གཅོ
དེ་ཡང་སྐུ་ཚབ་དོན་གཅོད་མཚོ་མགོ་ལྷག་པ་ལགས་ཀྱིས་ཁྱབ་ཁོངས་བོད་རིགས་ཡོངས་ནས་སྤྱི་ཡོངས་ལས་དོན་བྱེད་ཕྱོགས་དང་འབྲེལ་བའི་གསུང་བཤད་གནང་བའི་ཐོག་ཕྱི་ལོ་ ༢༠༡༨ འདི་བཞིན་བོད་མིའི་སྒྲིག་འཛུགས་ཀྱི་དཔལ་ལྡན་བཀའ་ཤག་ནས་ཐུགས་རྗེ་ཆེ་ཞུའི་ལོར་སྲུང་བརྩི་གནང་རྒྱུའི་གཏན་འབེབས་གསལ་བསྒྲགས་གནང་དོན་ལྟར། ཨོ་སི་ཀྲི་ལིའི་གཞུང་མང་གཉིས་དང་། བོད་མི་དང་བོད་དོན་ཐོག་རྒྱབ་སྐྱོར་མཐུན་འགྱུར་གནང་མཁན་ཚོགས་པ་སྒྲིག་འཛུགས་དང་མི་སྒེར་སོ་སོར་ཐུགས་རྗེ་ཆེ་ཞུའི་ལས་འགུལ་སྤེལ་ཕྱོགས་སྐོར་ལམ་སྟོན་དང་གོ་བསྡུར་སྦྱང་བཤད་གནང་།
སྐུ་མགྲོན་གཙོ་བོ་ཕྱི་འབྲེལ་དྲུང་ཆེ་ཟུར་པ་ཨ་ཏི་ཤ་བསྟན་འཛིན་ཕུན་ཚོགས་ལགས་ཀྱིས་འབྱུང་འགྱུར་བོད་རིགས་མཐུན་ཚོགས་ཁག་གི་ལས་དོན་ཚགས་ཚུད་དང་ལེགས་སྤེལ་ཉེས་འགོག་གི་ལམ་སྟོན་གནང་ཞིང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་གདོང་འདུས་སྐྱིད་འཛོམས་ལགས་ཀྱིས་དང་བླངས་དཔྱ་དངུལ་བསྡུ་འབུལ་ཞུ་དགོས་པའི་གལ་གནད་དང་། གྲོས་ཚོགས་ནས་དབུ་མའི་ལམ་གྱི་སྲིད་བྱུས་གཏན་འབེབས་གནང་བའི་སྐོར་གསུང་བཤད་གནང་།
ཚོགས་ཆེན་ཐོག་ཨོ་སི་ཀྲི་ལི་ཡར་གནས་སྡོད་བོད་རིགས་ཡོངས་ནས་གདུང་སེམས་མཉམ་སྐྱེའི་རྩ་བའི་དམ་བཅའ་དང་ཆབ་སྲིད་ལངས་ཕྱོགས་གཏན་འབེབས་གནང་བའི་ཐོག
༡༽ བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གནང་རྒྱུར་ཚོགས་པ་དང་བོད་མི་དོ་བདག་སོ་སོས་ལས་དོན་ཇི་བཞིན་སྤེལ་དགོས་སྐོར་དང་།
༢༽ ཨོ་གླིང་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འགུལ་སྤེལ་ཕྱོགས་དང་དེའི་འགྲོ་གྲོན་དཔལ་འབྱོར་འདུ་འགོད་བྱེད་ཕྱོགས།
༣༽ ཨོ་གླིང་རྒྱལ་ཡོངས་བོད་རིགས་མཐུན་ཚོགས་ཀྱི་ལས་དོན་བྱེད་ཕྱོགས་དང་། གལ་ཆེའི་ཆབ་སྲིད་ལས་འགུལ་སྤེལ་ཕྱོགས།
༤༽ རྒྱ་རིགས་མི་མང་ལ་འབྲེལ་བ་ཞུ་བའི་ལས་དོན་ཚགས་ཚུད་ཡར་རྒྱས་གཏོང་ཕྱོགས།
༥༽ སྐུ་ཚབ་དོན་གཅོད་ལས་ཁང་ནས་བོད་རིགས་ཚོགས་པ་ཁག་ལ་དང་བླངས་དཔྱ་དངུལ་བསྡུ་འབུལ་ཞུ་ཕྱོགས་དང་། དཔྱ་དེབ་གསར་བཟོ་དང་བསྐྱར་བཟོ་གནང་ཕྱོགས་ཀྱི་ལམ་སྟོན་བཅས་ཀྱི་ཐོག་གོ་བསྡུར་ལྷུག་པོ་གནང་མཐར་གྲོས་ཆོད་བཞག་པ་དང་། གྲོས་ཆོད་ནང་གསལ་ལས་དོན་གང་མྱུར་ལག་བསྟར་ཐུབ་ཐབས་སུ་གྲོས་ཆོད་ཀྱི་ངོ་བཤུས་ས་གནས་བོད་རིགས་མཐུན་ཚོགས་ཁག་ལ་ཚོགས་འདུ་མ་གྲོལ་གོང་ནས་འགྲེམས་སྤེལ་ཞུས།
ཚོགས་འདུའི་ལས་དོན་གལ་གནད་ཆེ་བ་ཞིག་ནི། རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་དང་དྲུང་ཆེ་འོས་འདེམས་གནང་རྒྱུ་ཡིན་པ་ལྟར་ཚོགས་འདུའི་ཉིན་མཐའ་མར་ཚོགས་བཅར་བ་ཡོངས་ནས་འོས་བསྡུ་གནང་བའི་གྲུབ་དོན་དུ་ཨེ་སི་ཊི་བོད་རིགས་མཐུན་ཚོགས་ཀྱི་ཚོགས་གཙོ་དངོས་གྲུབ་རྒྱལ་མཚན་ལགས་ཚོགས་གཙོ་དང་། ཝིག་ཊོ་རི་ཡ་བོད་རིགས་མཐུན་ཚོགས་ཀྱི་ཚོགས་གཙོ་བསྟན་འཛིན་བློ་བཟང་ལགས་དྲུང་ཆེར་འོས་འདེམས་བསྐོ་གཞག་གནང་བར་སྐུ་ཚབ་དོན་གཅོད་མཚོ་མགོ་ལྷག་པ་ལགས་ཀྱིས་རྟེན་འབྲེལ་མཇལ་དར་སྒྲོན་འབུལ་དང་འབྱུང་འགྱུར་ལས་དོན་གང་ལེགས་ཡོང་བའི་རེ་སྨོན་གནང་།
ཚོགས་འདུའི་ཐོག་བོད་རིགས་མཐུན་ཚོགས་ཁག་གི་འཐུས་མི་ནས་སྤྱི་སྨན་དགོངས་འཆར་མི་ཉུང་བ་ཞིག་གནང་ཐོག ཚོགས་བཅར་བ་ཡོངས་ནས་བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༧ཞབས་པད་བསྐལ་བརྒྱར་བརྟན་ཅིང་། རླབས་ཆེན་གྱི་བཞེད་དགོངས་མཐའ་དག་གེགས་མེད་ལྷུན་གྱི་འགྲུབ་པ་དང་། སྐུ་ཚེ་འདི་ཉིད་དུ་བོད་གཞིས་བྱེས་མཉམ་འཛོམས་ཀྱི་ཉི་མ་མྱུར་དུ་ཤར་ཏེ་སླར་ཡང་གངས་ལྗོངས་ཆོས་སྲིད་གཉིས་ལྡན་གྱི་རྒྱལ་ཁབ་ཆེན་པོར་བདེ་སྐྱིད་རྫོགས་ལྡན་གྱི་དགའ་སྟོན་དཔལ་ལ་རོལ་བའི་སྨོན་འདུན་རྩེ་གཅིག་ཏུ་ཞུས་ཏེ་ཚོགས་འདུ་རྒྱལ་ཁའི་ངང་གྲོལ་བ་དང་བཅས།།
